Nehemiah 1 - Ṉa Alaofua Falu 1923 1949

¹ Ṉata lana tha Niimaea, kaluwane tha Akalaea. Ma lalae mai ana fa madami Kisilu, ana ruana taṉafula fa ṉali eri, si maṉa ku to bakua i biu kiṉa nei i Susana,

² Tha Ananae, tee nonii wane ana dooraku kera, ka lae mai, ma tei wane bi nia faisia i Juda; ma nau ku soetooda sulia Ju eki na kera maruki mai fanua eri, na oretana toa na kera to bada faisia toa maalimae ki kera lauda na ba, ma sulia Jerusalema.

³ Ma keka soree isaku, Oretana toa eki faisia toa maalimae ki kera lauda na ba, na kera to bada i fanua eri, keka to ana taa la baita ma faare faekwa la iada: sulufau baita eri lau boo, ne toto kakalia Jerusalema, kera oge teefau bona ania, ma era e akofia baba ana maethakaa eki ne ni ania.

⁴ Ma lalae mai, roṉoa naa si ṉataa eki, nau ku ono bakua, ku aṉi, ku tatao sulia tei fa boṉi; ma nau ku abu ana faṉa, ku foa inaofatha God na i thalo lo,

⁵ Ku una eri, Nau ku nata kwaitakoi kau isamu, Jihova ae, God na i thalo lo, God inoto ka tatha ne kwaifamaui, nia neri na ka ade sulia alaofua ne kania na ba, ma tatakomia nia uria toa eki na keka liothau iana ma keka betaa si ṉataa fifi nia ki:

⁶ Alamatania fasi aliṉamu kai fafuroṉo, ma maamu kai tharai, fasi oki roṉoa foa la wane ni ra oe nei na nau kwai foa inaofamu asi maṉa eri, afa thato mafa rodo, uria toa ni ra oe eki na kwalafaa tha Isirela, ma nau kwai faaroṉo lalaa ana abula taa la kwalafaa tha Isirela ki, na mili abula taa ania uri oe na ba: ni nau ma toa maka nau ki mili abula taa boo.

⁷ Abula lamilia uri oe e ’uria si do ne dura naa; ma misi ade sulia si ṉataa fifi eki, mado ṉa lo, mado si ṉataa oolo eki, no ṉata fifi sulia isana wane ni ra oe ba na tha Mosisi.

⁸ Nau ku ṉata kwaitakoi kau isamu, onotoona fasi bae lamu no ṉata fifi ania isana wane ni ra oe ba na tha Mosisi, be una eri, Mada sa mulu ade garo, nau kwai foatata ani kamulua uri maalutana kulee toa eki:

⁹ Ma lalae sa muka akele buri uri nau, muka betaa si ṉataa fifi nau ki, muka ade sulia, boro so kera ’u tataka mena ana tei toa iamulua uria si kula ne tau asia mena ifara thalo lo, ni nau kwai ofuda mai faisia si kula eri, kwai talaida uria si kula na ku filia na ba fasi kwai alua thataku kai to mania.

¹⁰ Si maṉa eri toa nei ki na ṉa toa ni ra oe ki ma kulee toa oe, no tae faisida na ba ana mamanaa baita oe ma abamu ne sukwai.

¹¹ Arai Lo ae, nau ku ṉata kwaitakoi kau isamu, alamatai nia fasi aliṉamu kai fafuroṉoa foa la wane ni ra oe, ma foa la toa ni ra oe nei ki, na mili thathamii faare baita ana thatamu: ma oko falea fasi mamanaa ifana wane ni ra oe itaraena, oko falea tatakomia ifana i maana wane nei. (Uria ni nau wane ku ṉalia titiu ni kuu la ifana kiṉa nei.)