Mathui 9 - Ṉa Alaofua Falu 1923 1949

¹ Ma nia tae i la ta foorua, ka fai folo uri bali laba, ma ka fula i la toaa susu nia.

² Ma rikia fasi, kera ṉalia mai tee nonii wane afemae e thauṉia isana, kai teo i la thamataia: ma tha Jesus e rikia fitooa kera, ka soree isana wane eri afemae e thauṉia, Kaluwane nau, kai lea i manatamu: abula taa la oe ki kera manata lubea naa.

³ Ma rikia fasi, tei wane ana wane ni kekeda ki keka sorea i manatada. Wane nei kei bae ni faretoliṉi lana tha God.

⁴ Ma tha Jesus, uria ne thaitoomana manatada, ka sorea, Uria ta na muki manatatoona si do taa ki i manatamulua?

⁵ Nifenia si do na sore lana e kwaiakaori ka tatha, Abula taa la oe ki kera manata lubea naa; mado kwai sorea, Tatae, oki lae?

⁶ Ma sui fasi muka thaitoomana na Kaluwane imole sukwaia ni ania i fanua nei iano uria manata lube lana abula taa la ki (nia kei bii soree isana wane na afemae e thauṉia), Tatae, ṉalia thamataia oe, ma oki lae uri biu oe.

⁷ Ma nia tatae, ka lae uri biu nia.

⁸ Ma si maṉa na malului wane eki kera rikia, keka mau, ma keka fare inoto atha God, ne falea sukwaia una eri ifana imole.

⁹ Ma si maṉa na tha Jesus e tatha faisia kula eri, nia rikia tee nonii wane, kera alaṉia ana tha Mathiu, kai ono asi kula ni ṉali lana takisi ki: ma nia ka soree isana, Lae mai iburiaku. Ma nia tatae, ka lae iburiana.

¹⁰ Ma lalae mai, si maṉa nia kai teoreri sana faṉa la i biu, rikia fasi, wane oro na kera ṉalia takisi ki, bia toa oro na kera abula taa, kera fula mai, keka teoreri isana bia toa nia ne toleda.

¹¹ Ma si maṉa na Farisi ki kera rikia, keka soree isana toa nia ne toleda, Uria ta na Wane ni kwaifamanatai kamulua kai faṉa bia wane na kera ṉalia takisi ki, ma toa na kera abula taa?

¹² Ma si maṉa na tha Jesus e roṉoa, nia ka sorea, Toa na kera lukatai kesi rofea doketa, talitoona boo toa na kera matai.

¹³ Ma sui lae, muki thaitoomana fasi maalutana si ṉata eri, Ku thathamia tatakomi la, do ni foa la e ai: sulia e ai kwasi fula uria aili lana toa na kera kokoto, ku fula uria aili lana toa na kera abula taa uria manata akele la.

¹⁴ Ma asi maṉa eri toa na tha Jone e toleda kera fula isana, keka una eri, Uria ta na ni kamilia bia Farisi ki miki abu ana faṉa asi maṉa oro ki, ma toa noki toleda e ai kesi abu boo ana faṉa?

¹⁵ Ma tha Jesus ka soree isada, Kala wane na keki abetania wane seelea keki thaitoomana tatao la, asi maṉa na wane seelea eri ni isada? ma fa boṉi ki kai fula na keki talaia wane seelea faisi kera, keki bii abu ana faṉa.

¹⁶ E ai ta wane si alua si maku falu fafia ta lafui tooni; sulia si na sa kai suusia kai mu faisia tooni eri, ma kai bii mu baita.

¹⁷ Bia e ai kesi lula waene na kera bii thauwai nia i la lafui uṉee do ki tala waene: ada uṉee do eki ka busu, ma waene eri ka kiki, ma uṉee do eki ka taa bonaa: keki lula waene na kera bii thauwai nia i la uṉee do seelea ki, ma ro do eki kai lea.

¹⁸ Si maṉa na nia kei ṉata sulia si do eki isada, rikia fasi, tee nonii wane ne gwauwai ka fula, ka faabaita nia, ma ka una eri, Thari nau bii mae boo si maṉa eri: una ena mena, lae mai, oki alua abamu fafi nia, ma nia kai maruki.

¹⁹ Ma tha Jesus ka tatae, ka lae iburiana, ma toa nia ne toleda lau boo.

²⁰ Ma rikia fasi, tee kini, ne nanai aṉaruu sulia tee tafulu fa ṉali ma ro fa ṉali, e fula mai buriana, ka suana tagwarana tooni nia:

²¹ Uria nia sorea i manatana, Mada sa kwai suana tooni nia mena, nau kwai maruki.

²² Ma tha Jesus e akele buri, ka riki nia ma ka sorea, Thari nau ae, kai lea i manatamu; fitooa oe e faamaruki oe. Ma kini eri ka maruki bonaa too asi kadamaṉa eri.

²³ Ma si maṉa na tha Jesus e fula i maafera wane eri ne gwauwai, ma ka rikia toa keki ufia aga, ma toa oro keki ṉalu,

²⁴ Nia ka soree isada, Mulu lae amulua fasi kunei: thari nei e ai si mae, kai biṉa bana. Ma kera wawaela, keka aefara iana.

²⁵ Ma buriana na kera arasia toa eri i maa, nia ka kotho kau, ka rau ana abana; ma thari eri ka tatae.

²⁶ Ma kera uunu sulia si do eri ka talo i la fanua eri sui bana.

²⁷ Ma si maṉa na tha Jesus e tatha faisia kula eri, ro wane maade rodo keko lae iburiana, keki ’ai, ma keki una eri, Oki tatakomi kamarea mai, oe kaluwane tha Defeta.

²⁸ Ma si maṉa nia fula i la biu, ro wane eki na maade rodo keko fula isana: ma tha Jesus ka soree isadaroa, Moro fitoo na nau ku talaana ili lana si do nei? Keko soree isana, Iu, Lord.

²⁹ Sui nia ka suana maada, ka una eri, Sulaania fitooa kamaroa keki ilia ifamaroa.

³⁰ Ma maada ka laa. Ma tha Jesus ka bae fifi asia isada, ka una eri, Ada ta wane ka roroṉoa.

³¹ Ma sui si maṉa na kero lae kau, keko faaroṉo falado ana thatana, ka talo i la fanua eri sui bana.

³² Ma si maṉa na kera lae kau, rikia fasi, kera tolea mai tee wane fokone ato na spirit taa ni ania isana.

³³ Ma buriana na kera arasia naa spirit taa eri, wane eri fokone ato ka bae: ma malului wane eri kera kwele, ma keka una eri, E ai kesi ririkia ta do unei i Isirela.

³⁴ Ma Farisi ki keka sorea, Nia kai arasia spirit taa ki ana spirit ne inoto ana spirit taa ki.

³⁵ Ma tha Jesus e lae olili i la toaa susu ki ma toaa faekwa ki, kai kwaifamanatai la biu ni ofu la kera ki, ma ka ṉata sulia faaroṉoa lea ana tooa, ma kai faamarukia toa na si do oro ki e thauṉida bia toa na kera matai ana mataia oro ki bana.

³⁶ Ma si mana nia rikia malului wane eki, nia ka tatakomida, uria na kera feda ma kera asi kera, mala sifi ne ai ada ta wane ni fono toi kalida.

³⁷ Sui nia ka soree isana toa nia ne toleda, Unii do ne rafo e oro mamana boo, ma toa ni ra ki kera ununa.

³⁸ Mania muki gani ana Lord ana unii do eri, fasi nia kai arasia kau toa ni ra ki la unii do nia ne rafo.