Mathui 8 - Ṉa Alaofua Falu 1923 1949

¹ Si maṉa nia sifo mai faisia gwa tolo eri, malului wane oro kera lae iburiana.

² Ma rikia fasi, tee nonii wane uru e thauṉia e lae mai isana, ka faabaita nia, ka una eri, Lord, mado so thathamia, o thaitoomana faafalu laku.

³ Ma tha Jesus e falea kau abana, ka sua nia, ma ka una eri, Ku thathamia boo; oe oki falu. Ma si maṉa eri u boo uru nia eri ka ai faisi nia.

⁴ Ma tha Jesus ka soree isana, Ada oko faaroṉoa ta wane; lae kamua, oko fatai oe isana wane ni foa, ma oko falea si do na tha Mosesi e sorea, ana faamamane la isada.

⁵ Ma si maṉa na tha Jesus e fula i Kapaneama, tee senitiurione e lae mai isana, ka ṉata kwaitakoi isana,

⁶ Ka una eri, Lord, wane ni ra nau kai teo bana i la biu, e matai ana afemae, e fi nia ka thasiasia naa.

⁷ Ma nia ka soree isana, Kwai lae kau, kwai faamaruki nia.

⁸ Senitiurione eri e luua, ka sorea, Lord, kwasi farana soki kotho mai fara raraofana biu nau: talitoona boo oki sorea mai si baea, ma wane ni ra nau kai maruki.

⁹ Uria ni nau wane kera inoto lau boo iaku, ku inoto ana toa ana firua: ma ku soree isana wane nei, Lae, ma nia kai lae; ma ku soree isata wane lau, Lae mai, ma nia kai lae mai; ma ku soree isana wane ni ra nau, Ilia si do nei, ma nia kai ilia.

¹⁰ Si maṉa na tha Jesus e roṉoa, nia ka kwele, ma ka soree isana toa na kera lae iburiana, Mamana ku soree isamulua, e ai kwasi fulatoona fitooa ne baita una eri, i Isirela mena ka ai.

¹¹ Ma nau ku soree isamulua, Toto toa oro keki too mai ibali tae lana thato ma ibali su lana thato, keki lae mai ma keki teoreri isatha Aberahamo, ma tha Aesaka, ma tha Jekofo, ana tooa i thalo:

¹² Ma kaluwane tooa ki keki u kau anida i la maerodo nai maa: si kula ana aṉi la ma didilifo la.

¹³ Ma tha Jesus ka soree isana senitiurione eri, Lae kamua; sulia fitoo lamu, keki ilia ifamu. Ma wane ni ra eri ka maruki ana kadee maṉa eri.

¹⁴ Ma si maṉa na tha Jesus e fula i maafera tha Pita, nia rikia kini na waifuṉa nia e teo, ka matai asi fule.

¹⁵ Ma nia suana abana, ma fule eri ka ai faisi nia; ma kini eri e tatae, ka ra ifada.

¹⁶ Toto e thaulafia naa, kera talaia mai toa oro na spirit taa ki ka ni anida isana: ma nia ka arasia spirit eki ana tee si baea, ma ka faamarukia toa eki sui na kera matai:

¹⁷ Fasi keki faamamanea si do na tha Aisaia ṉa porofeta e sorea, be una eri, Talani nia e ṉalia feda la kulu ki, ma ka ṉalia mataia kulu ki.

¹⁸ Ma si maṉa na tha Jesus e rikia malului wane baita keka to kali nia, nia ka sorea keki lae uri bali laba.

¹⁹ Ma tee wane ni kekeda e fula isana, ka soree isana, Wane ni kwaifamanatai ae, kwai lae iburiamu atona bana si kula noki lae uria.

²⁰ Ma tha Jesus ka soree isana, Fokisi ki adalua malau ki, ma thaaro nei mamatalea ki adalua nui ki; ma Kaluwane imole e ai ana ta si kula fasi ka reriṉania gwauna iei.

²¹ Ma tee nonii wane lau ana toa ne toleda ka soree isana, Lord, alamatai nau kwai lae, kwai alua fasi maka nau inao.

²² Ma tha Jesus ka soree isana, Lae mai iburiaku; ma oki akwasia toa mae ki keki alua wane kera ne mae.

²³ Ma si maṉa nia tae naa i la foorua, toa nia ne toleda keka lae iburiana.

²⁴ Ma rikia fasi, i la amali ka tagathalea faamau, adedea lua ka kwae naa fafia foorua eri: ma nia kei biṉa ana.

²⁵ Ma toa nia ne toleda kera fula isana, keka tharasia, ma keka una eri, Oko faamaruki kulu, Lord; kuki mae naa.

²⁶ Ma nia ka soree isada, Uria ta na muki mau, toa na fitooa kamulua e faekwa? Ma si maṉa eri nia tatae, ka sorea thauthau ma amali; ma amali ka daununu asia naa.

²⁷ Ma wane eki keka kwele, keka una eri, Wane ufita nai nia, na thauthau ma amali ni mena kai ade sulia bae lana?

²⁸ Ma si maṉa nia fula ibali laba ana fanua toa i Gadara ki, ro nonii wane na spirit taa ki ni anida keko toda ania, kero too mai kula ni aluwanea keko lae mai, kero mamaliaa ka tatha, adedea ka ai ta wane si talaana tatha la ana tala eri.

²⁹ Ma rikia fasi, kero ’ai faamau, keko una eri, Ta si ta fetei na meki kwaimani bi oe fafia, oe Kaluwane tha God? o lae mai kunei fasi oki kwae fifi iamilia asi maṉa ne ai u bana neri?

³⁰ Ma asi kula ne ni da faisida tee aini botho oro keki faṉa ada.

³¹ Mania spirit taa eki kera ṉata kwaitakoi isana, keka una eri, Mada so arasi kamilia, oki arasi kamilia kau i la botho loko ki.

³² Ma nia ka soree isada, Lae. Ma kera kotho i maa, keka kotho i la botho eki: ma rikia fasi, aini botho eri sui bana kera thaka ugwasu ana kula ne gigiloa uri la amali, ma keka mae i la amali eri.

³³ Ma toa na kera thareda keka thaka, ma kera lae kau i la toaa susu, keka uunu sulia si do eki sui bana, bia si do ne uria ro wane na spirit taa ki e toto anida.

³⁴ Ma rikia fasi, toa eri sui bana ana toaa susu eri keka lae mai fasi keka toda tha Jesus: ma si maṉa na kera riki nia, keka ṉata kwaitakoi isana sa nia ka lae faisia oli lana fanua kera ki.