Mathui 4 - Ṉa Alaofua Falu 1923 1949

¹ Sui tha Spirit kai tolea tha Jesus uri la fanua kwasi fasi tha devil kai bae aliṉana.

² Ma si maṉa ne toto e ai si faṉa sulia fai tafulu fa thato ma fai tafulu fa rodo, buriana nia ka thaofa.

³ Ma do eri na kai bae aliṉana imole kai fula neri, kai soree isana, So ni oe Kaluwane tha God, oki sorea ṉa fau nei ki kai lioe berede.

⁴ Ma nia luua, ka sorea, Kera keda, Imole so ka maruki ana talitoona bana berede e ai, kai maruki ana bae la ni sui bana na kei asia faisia fokona tha God.

⁵ Sui tha devil kai tole nia uri la toaa susu ne abu; ma ka takwelaṉania asi kula ne fane ka tatha i duuna biu baita tha God,

⁶ Ma ka soree isana, So ni oe Kaluwane tha God, oki fusi ani oe iano: uria na kera keda, Nia kai faaroṉoa angel nia ki ani oe: Ma keki kwau oe ia i abada, Ada mado e ai aaemu kai too ana gwa fau.

⁷ Tha Jesus ka soree isana, Sui lau kera keda, Osi ilitoona tha Lord na God oe.

⁸ Sui lau, tha devil ka tole nia alaa uria gwauna gwa tolo ne fane da ia, ma ka fatai nia tooa ki sui bana ana fanua nei iano isana, bia inotoa na ana do eki;

⁹ Ma ka soree isana, Si do fu ki sui bana kwai falea ifamu, mada soki aru iano, oko faabaita nau.

¹⁰ Sui tha Jesus ka soree isana, Oi lae kamua, Satan: uria na kera keda, Oki faabaita tha Lord na God oe, ma nia talitoona boo oki ra ifana.

¹¹ Sui tha devil ka lae faisi nia; ma rikia fasi, angel ki keka fula, keka ra ifana.

¹² Ma si maṉa na tha Jesus e roṉoa na tha Jone kera suia naa uri la lokafu, nia ka lae uri Galili;

¹³ Me akwasia i Nasaretha, lalae mai ka to i Kapaneama, fanua ni fafo asi, i oli lana Sebiulona ma i Nafatalae:

¹⁴ Fasi keka faamamanea si do na tha Aisaia ṉa porofeta e sorea be una eri,

¹⁵ Fanua i Sebiulona ma fanua i Nafatalae, Tala sula amali bali laba i Jodana, Galili fanua Jenetaele ki,

¹⁶ Toa na kera oono i la maerodo Keka rikia lalaa la baita, Ma toa na kera oono i la fanua ana nuna maea, Lalaa la ka laa mai ifada.

¹⁷ Too asi maṉa eri tha Jesus thafalia kai ṉata, ma ka una eri, Muka akeletania manatamulua; uria na tooa i thalo ni karafi naa.

¹⁸ Me liliu sula amali i Galili, nia ka rikia ro wai doorana, tha Saimona na kera alaṉia atha Pita, bia doorana na tha Adaru, keki ala ana furei la amali; uria na kero ro wane ana de la.

¹⁹ Ma nia ka soree isada, Moki lae mai iburiaku, kwai tole kamaroa ana de lana imole.

²⁰ Ma si maṉa eri u boo keka akwasia furei eki, ma keko lae iburiana.

²¹ Ma too kula eri nia lae ka rikia lau ta ro wai doorana, tha Jemesi kaluwane tha Sebedi, bia doorana na tha Jone, i la foorua bia maka kera tha Sebedi, keko uthea ada furei kera ki; ma nia ka ailida.

²² Ma si maṉa eri u boo keko akwasia foorua eri bia maka kera, ma keko lae iburiana.

²³ Ma tha Jesus e liliufia i la Galili ka sui, ka kwaifamanatai la biu ni ofu la kera ki, ma ka ṉata sulia faaroṉoa lea ana ṉa tooa, ma ka faamarukia toa na si do oro ki e thauṉida bia toa na kera matai ana mataia oro ki bana i maalutana toa eri.

²⁴ Ma thatana ka talofia i Siria sui: ma keka talaia mai toa eki sui bana na kera matai isana, toa na mataia oro ki e thauṉida ma seede fi, toa spirit taa ki ni anida, ma toa na futamae e thauṉida, ma toa afemae e thauṉida; ma nia ka faamarukida.

²⁵ Ma malului wane keka lae iburiana, kera toto mai i Galili, i Dikapolisi, i Jerusalema, i Judia ma ibali laba i Jodana.