Mathui 3 - Ṉa Alaofua Falu 1923 1949

¹ Ma asi maṉa eri wane ni babataesi na tha Jone e lae mai, kai ṉata i la fanua kwasi i Judia,

² Kei una eri, Muki akeletania manatamulua; uria na tooa i thalo ni karafi naa.

³ Uria na wane eri bonaa na tha Aisaia ṉa porofeta e ṉata sulia, be una eri, Liṉana ṉata lana tee wane kei ’ei la fanua kwasi, Muki beta tala tha Lord ka kwaimaakwali, Beta tala nia ki ka kokoto.

⁴ Ma Jone eri boo na maku nia na ifuna kamela, tee uṉee do i liitana; ma faṉa nia siko ki ma dudualiṉa.

⁵ Asi maṉa eri toa na Jerusalema kera lae isana, bia toa i Judia sui boo, bia toa ana fanua ne to kakali ki mai i Jodana;

⁶ Ma nia e babataesi kera i la kafo i Jodana, keka faaroṉo ana abula taa la kera ki.

⁷ Sui si maṉa nia rikia wane oro ana Farisi ki bia Sadiusi ki keki lae mai ana babataesi la nia, nia ka soree isada, Kamulua kwalafana baekwa i toloki, ni tei ne faaroṉo kamulua muki thaka faisia rakeiria ne ni u?

⁸ Mania muka fuṉu ana foee do ne farana manata akele la:

⁹ Ma musi laloma una eri i manatamulua, Amilia tha Aberahamo ana maka kamilia: sulia ku soree isamulua, tha God e thaitoomana tharasi lana wela ki ana fau nei ki ifatha Aberahamo.

¹⁰ Ma si maṉa eri mena kera alua naa matau e teo naa sana laila ’ai ki: mania ’ai ni sui bana ne ai si fuṉu ana foee do lea, keka kasia, ma keka naṉa ania i la era.

¹¹ Nau ku babataesi kamulua boo ana kafo uria manata akele la: ma ni nia na kai lae mai buriaku e sukwai ka tatha iaku, na butu nia ki e ai kwasi farana ṉali lana: nia kai babataesi kamulua atha Spirit Abu bia era:

¹² Na teteru nia ni abana, ma nia kai faafalu teefau asi kula ni uri lana uiti nia, ma nia kei ofua uiti nia uri la biu ni aludo, ma efona nia kai naarea kai akofia ana era na kesi talaana kwaemaeli lana.

¹³ Asi maṉa eri tha Jesus e toto mai i Galili ka lae mai uri Jodana isatha Jone, fasi ka babataesi nia.

¹⁴ Sui tha Jone sa kai lufi nia, ka una eri, So ni nau soki babataesi nau, ma oko bii lae mai isaku?

¹⁵ Ma tha Jesus e luua, ka soree isana, Alamatai nia si kada eri: sulia fasi e farakoroa na koki faamamane una eri ana kokoto la ni sui boo. Ma nia kai bii alamatai nia neri.

¹⁶ Ma tha Jesus, buriana na kera babataesi nia, ka tae u boo si maṉa eri faisia i la kafo: ma rikia fasi, thalo lo ki ka ifi uri nia, ma nia ka rikia Spirit tha God kai sifo mai mala ta bola, sisifo mai ka dau ani nia;

¹⁷ Ma lio fasi, liṉana tee ṉata la too mai thalo lo ki, ka una eri, Kaluwane liliothaua nau funia; e lea iaku uri nia.