Mathui 27 - Ṉa Alaofua Falu 1923 1949

¹ Ma lalae uusuwadia naa, wane inoto ni foa ki sui bana bia ulunao ana toa eki keki furia ṉata see tha Jesus fasi keka thauṉi nia:

² Ma keka kania, keka tolea kau, keka fale nia ifatha Paelate ṉa wane ni kotu.

³ Sui tha Judasi, wane ne faaalamai nia, si maṉa ne thaitoomana na kera sorea kwae lana, ka akeletania manatana, ma nia ka oli fafia ulu tafulu malefo ba ki ana silifa isana wane inoto ni foa ki bia ulunao ki,

⁴ Ka una eri, Nau ku abula taa na nau ku faaalamai nia abuna wane ne ai si abula taa ana ta si do. Ma keka sorea, Do kai oga kamilia neri? oe oki baelia.

⁵ Ma nia ka u ana malefo eki la biu baita tha God, ma ka lae nana; ma nia lae kau, ka lio.

⁶ Ma wane inoto ni foa ki keka ṉalia malefo eki, keka sorea, E ai kesi alamatania alu lana i la fuila malefo, sulaania kera usia abu ania.

⁷ Ma kera furia ṉata, sui keka usia si kula na kera thathauwai nia kwadee do ki iei, fasi keka kwaiṉei nia toa ana fanua eeta ki.

⁸ Mania kera alaṉia kula eri, Kula ana abu, lalae mai ka fula itaraena.

⁹ Asi maṉa eri kera faamamanea si do na tha Jeremaia ṉa porofeta e sorea, be una eri, Ma kera ṉalia ulu tafulu malefo ana silifa, usi lana wane na kera soe ania, na kwalafa tha Isirela kera soe ania;

¹⁰ Ma kera falea uria kula ne kera thathauwai nia kwadee do ki iei, sulaania sore la na tha Lord e soree isaku.

¹¹ Ma tha Jesus ka takwe inaofana wane ni kotu: ma wane ni kotu ka soetoona, ka una eri, Oe ṉa Kiṉa Ju ki? Ma tha Jesus ka soree isana, Oi sorea.

¹² Ma si maṉa na wane inoto ni foa ki ma ulunao ki kera alaṉi nia asi do ki, nia e ai si luuda ana ta si do.

¹³ Sui tha Paelate ka soree isana, Osi roṉoa do oro nei ki toa nei keki alaṉi oe ania?

¹⁴ Ma nia e ai si luua boo ana ta tee si baea mena: adedea wane ni kotu eri ka kwele faamau.

¹⁵ Ana fafaṉa eri wane ni kotu ade la kai ililia kai lulubea tee wane na kera kania kai lae ifana malului wane eri, wane eri na kera thathamia.

¹⁶ Asi maṉa eri adalua tee wane kera kania, wane na toa oro kera thaitoomana, kera alaṉia atha Barabasi.

¹⁷ Mania si maṉa na kera ofu na mai, tha Paelate ka soree isada, Ni tei na mulu thathamia kwai lubea kai lae ifamulua? Barabasi, mado tha Jesus na kera alaṉia ana Christ?

¹⁸ Uria ne thaitoomana do uria bana manatade uga isana na keka fale nia.

¹⁹ Si maṉa nia kai ono ana do ni ono la ana kotu, kwaina e kwaiarasi isana, ka una eri, Oko to faisia wane kokoto ena: uria na do oro e uri nau itaraena i la moosubolea sulaani nia.

²⁰ Ma wane inoto ni foa ki ma ulunao ki keka gaea malului wane eki fasi keka gania tha Barabasi, ma keka thaunia tha Jesus.

²¹ Wane ni kotu e luuda, ka soree isada, Nifenia wane ana ro wane nei ki mulu thathamia kwai lubea kai lae ifamulua? Ma keka sorea, Tha Barabasi.

²² Tha Paelate ka soree isada, Ma si ta na kwai ilia atha Jesus na kera alaṉia ana Christ? Kera sui keka sorea, Keka fota fafi nia ana ’ai rarafolo.

²³ Ma wane ni kotu ka sorea Uria ta, si ta ne taa nia ilia? Ma keka bii ’ai baita ka tatha, keka una eri, Keka fota fafi nia ana ’ai rarafolo.

²⁴ Si maṉa na tha Paelate e rikia na si nia si tatha, ma ṉalu la kai bii too, nia ṉalia kafo, ma ka taua ro aba nia ki inaofana malului wane eri, ka una eri, Nau ku ai ana abuna wane kokoto nei: kamulua muki baelia.

²⁵ Sui toa eri sui bana kera luua, keka sorea, Abuna kai to fafi kamilia, ma wela kamilia ki.

²⁶ Sui nia ka lubea tha Barabasi ka lae ifada: ma tha Jesus nia kwae tataria ana suila, sui ka falea fasi keka fota fafi nia ana ’ai rarafolo.

²⁷ Sui toa ana firua wane ni kotu kera tolea tha Jesus i la biu baita kera, ma keka ofua aini toa ana firua sui bana isana.

²⁸ Ma kera tanusia tooni nia, keka faatooni nia ana tooni memenaa.

²⁹ Ma buriana na kera eeroa kwalo totora, keka alua i gwauna, ma fa ue i aba aola nia; ma kera boururu inaofana, keka aefara iana, keka una eri, Kiṉa Ju ki ae!

³⁰ Ma kera ṉisufi nia, ma keka ṉalia fa ue eri, keka kwaea ana gwauna.

³¹ Ma buriana na kera aefara naa ania, keka tanusia tooni eri faisia, ma kera faatooni nia ana tooni nia ki, ma keka tole nia kau uria fota fafi lana ana ’ai rarafolo.

³² Ma si maṉa na kera lae mai, keka fulatoona tee wane i Saerini, thatana tha Saimona: nia kera tolobarea kai lae, fasi kai ṉalia ’ai rarafolo nia.

³³ Ma si maṉa na kera fula asi kula na kera alaṉia ana Gologotha, ma si ṉata eri e una eri, Si kula gwa lelete,

³⁴ Kera falea waene na kera dola ana do ukaa ifana sa kai kuufia: ma buriana ne kuufitoona, ka lalakwee kuufia.

³⁵ Ma buriana na kera fota naa fafi nia, keka ukalia tooni nia ki faisida, keka ilala; fasi si do na ṉa porofeta e sorea kai mamana, be una eri, Kera ukalia ṉa maku nau ki faisi kera, Ma tooni nau kera ilala uria:

³⁶ Sui keki ono, keki lio uri nia kula eri.

³⁷ Ma si do na kera alaṉi nia ania kera alua fafi nia isana gwauna, kera keda, THA JESUS NAI NIA KIṈA JU KI.

³⁸ Ma si maṉa eri kera fota fafia ro wane na kera laulau ki bi nia, ta wane ibali aba aola nia, ma ta wane ibali aba mauli.

³⁹ Ma toa na kera tatha keka bae fafi nia, keki isua gwauda,

⁴⁰ Ma keka una eri, Wane oki ogea biu baita tha God, ma oki kasia ana ulu fa boṉi, faamaruki oe fasi talaamu: so ni oe Kaluwane tha God, oki sifo mai faisia ’ai rarafolo ena.

⁴¹ Una eri lau boo wane inoto ni foa ki keka aefara iana, bia wane ni kekeda ki ma ulunao ki, keka sorea,

⁴² Nia fafaamarukia toa eeta; sui ka dora ana faamaruki lana i talaana. Mada sa nia Kiṉa Isirela; kai sifo mai faisia ’ai rarafolo, ma mika fitoona.

⁴³ Nia kai fitoona tha God; kai suusi nia maṉa eri, mada sa nia thathami nia: uria ne sorea, Nau Kaluwane tha God.

⁴⁴ Ma wane na kera laulau ki lau boo na kera fota fafidaroa bi nia keka bae ana baea eri lau boo fafi nia.

⁴⁵ Ma too ana ona si kadee maṉa maerodo ka to fafia fanua eri sui boo lalae ka fula ana sikwana si kadee maṉa.

⁴⁶ Ma fuliṉana sikwana si kadee maṉa tha Jesus ka ’ai ana ’ai la baita, ka una eri, Eli, Eli, lama, sabakathani? si do eri e una eri, God nau, God nau, uria ta na oko akwasi nau?

⁴⁷ Tei wane ana toa kera takwe kula eri, si maṉa na kera roṉoa, keka sorea, Wane nei kei eilia tha Elaeja.

⁴⁸ Ma si maṉa eri u boo ta wane iada e fita, ka ṉalia ṉa fulo, ka lula ana waene ne afae, ma ka alua i gwauna fa ue, ka falea ifana sa kai kuufia.

⁴⁹ Ma tei wane iada kera sorea, To ana; kulu rikia fasi mada sa tha Elaeja kai lae mai uria faamaruki lana.

⁵⁰ Tha Jesus ka ’ai lau ana ’ai la baita, ma ka luka ana maṉona.

⁵¹ Ma rikia fasi, maku ne taru faisia maana kadee biu lalo ana biu baita tha God e seṉa, too mai i gwauna ka seṉa uri aaena; ma fanua nei iano ka igiigi; ma fau ki ka dekwe;

⁵² Ma kwaiṉeia ki ka laa; ma seena toa oro na kera abu na kera bibiṉa keka tataeda;

⁵³ Ma kera lae mai faisia kwaiṉeia ki buriana tatae lana, keka lae i la toaa susu abu, keka fatai kera isana toa oro.

⁵⁴ Ma si maṉa na senitiurione, ma toa na kera to bi nia keki lio uria tha Jesus, kera rikia anunu eri, bia si do na kera ilidaki, keka mau faamau, keka una eri, Kaluwane tha God mamana boo nai nia.

⁵⁵ Ma kini oro ki kera to kula eri, keki lio da mai, na kera lae buriana tha Jesus ita mai Galili, keki ra ifana:

⁵⁶ Ni Meri Makadaline ka ni isada, bia ni Meri thainana tha Jemesi ma tha Josesi, bia thainana kaluwane tha Sebede ki.

⁵⁷ Ma lalae e thaulafia naa, tee wane inoto i Arimathia mai, thatana tha Josefa, ka lae mai, wane na tha Jesus e tole nia lau boo:

⁵⁸ Wane eri e lae isatha Paelate, ka gania seena tha Jesus. Sui tha Paelate e sorea keki falea.

⁵⁹ Ma buriana na tha Josefa e ṉalia seena, ka afoa ana maku falu ne kwakwaoa,

⁶⁰ Ma ka alua i la kwaiṉeia nia u boo ne falu, do nia garua i la kale: ma nia abulisia tee gwa fau baita i maana kwaiṉeia eri, sui ka lae nana.

⁶¹ Ma ni Meri Makadaline e to kula eri, bia ruana Meri lau, keki ono otofana kwaiṉeia eri.

⁶² Sui lalae boṉi Tagudo e dani, wane inoto ni foa ki bia Farisi ki kera ofu mai isatha Paelate,

⁶³ Keka una eri, Arai ae, mili manatatoona wane ba ne mamalaoe e sorea, maṉa nia maruki u, Buriana ulu fa boṉi kwai tatae lau.

⁶⁴ Mania oki sorea keki fono toi lea faisia kwaiṉeia eri lalae ka fula ana ula fa boṉi, ada mado e ai toa nia ne toleda keki lae mai la rodo, keki bili nia kau, ma keka soree isana toa nai, Nia tatae naa faisia toa mae: ma garo la nei buri kai taa ka tatha ana do nai nao.

⁶⁵ Tha Paelate ka soree isada, Toa ana firua kamulua na keki fono toi keki to bada: lae amulua, muki fono toi ana fono toi lea la na mulu thaitoomana.

⁶⁶ Mania keka lae neri, keka fono toi lea faisia kwaiṉeia eri, keka faaṉadoa fau eri ana do ni faaṉado lana, wane ana firua na keki toi keki to bida.