Mathui 26 - Ṉa Alaofua Falu 1923 1949

¹ Ma lalae mai, si maṉa na tha Jesus e suia si baea eki sui boo, nia ka soree isana toa nia ne toleda,

² Mulu thaitoomana ro fa boṉi naa e to faisia fafaṉa tathafafi la, ma Kaluwane imole keki falea fasi keki fota fafi nia ana ’ai rarafolo.

³ Asi maṉa eri wane inoto ni foa ki, ma wane ni kekeda ki, ma ulunao eki ana toa eri, keka ofu mai la labata aofia ni foa, na kera alaṉia atha Kaiafasi;

⁴ Ma kera furia ṉata fasi keka raua tha Jesus ana lole la, fasi keka thauṉia.

⁵ Ma keka sorea, Asi maṉa na fafaṉa e ai, ada toa eri keki ṉalu.

⁶ Asi maṉa na tha Jesus e to i Bethani, i la biu tha Saimona, wane uru e thauṉia,

⁷ Tee kini e fula isana fafia bii gwai na usi lane baita faamau i la fau ne dadaa, ma ka kikia fafia gwauna, si maṉa nia kai teoreri isana faṉa la.

⁸ Ma si maṉa na toa ne toleda kera rikia, keka rakeiri, keka una eri, Do eri kera faakoka uria ta nania?

⁹ So e ai, gwai nei do keka usi ania uria malefo oro, ma keka falea ifana toa na kesi rikii do.

¹⁰ Ma tha Jesus e thaitoomana, ka soree isada, Uria ta na muki sorea kini nei? nia ilia si ra lea ani nau.

¹¹ Uria na toa na kesi rikii do keki to ṉado bada isamulua; ma nau kwasi to ṉado isamulua.

¹² Uria ne kikia gwai nei ana seeku nania, do e ilia fasi seeku kai gwai maasia kwaiṉei laku.

¹³ Mamana ku soree isamulua, Nifei bana toto keki ṉata sulia faaroṉoa lea nei iei la fanua ni sui bana, si do eri lau boo na kini nei e ilia toto keki ṉata sulia ana manatai lana.

¹⁴ Sui tee wane ana akwala ma ro wane eki, na kera alaṉia atha Judasi Isikarioto, e lae isana wane inoto ni foa ki,

¹⁵ Ka sorea, Si ta na mulu thathamia muki falea ifaku, fasi kwa fale nia ifamulua? Ma keka olotoona ulu tafulu malefo ana silifa ifana.

¹⁶ Ma too asi maṉa eri nia ka rofe uria si maṉa ne kwaiakaori fasi ka fale nia ifada.

¹⁷ Afa boṉi totonao ana fafaṉa berede e ai ta lefena iei, toa ne toleda kera fula isatha Jesus, keka una eri, Si kula ifei no thathamia mika naare iei maakwali oe oki ania tathafafi la ba?

¹⁸ Ma nia ka sorea, Muki lae i la toaa susu isatha do, ma muka soree isana, Wane ni kwaifamanatai e sorea, Si maṉa nau karaṉia na mai; kwai ania tathafafi la i biu oe bia toa nau ku toleda.

¹⁹ Ma toa ne toleda kera ili boo sulaania si do na tha Jesus e soree isada; ma keka naarea tathafafi la eri ka teo naa.

²⁰ Ma toto e thaulafia naa, nia kai teoreri sana faṉa la bia akwala ma ro wane ne toleda;

²¹ Ma si maṉa na keki faṉa ada, nia ka sorea, Mamana ku soree isamulua, Tee nonii wane iamulua kai faaalamai nau.

²² Ma lioda ka dila ka tatha, ma kera sui boo keka soree isana, Mado ni nau neri, Lord?

²³ Ma nia luuda, ka sorea, Wane ne tonia abana bi nau i la tobosulu, nia na kai faaalamai nau.

²⁴ Kaluwane imole kai lae boo ana lae la na kera keda suli nia: ma sui taa la kai thauṉia wane eri na kai faaalamai nia Kaluwane imole! e lea ana wane eri mada se ai si futa u boo.

²⁵ Sui tha Judasi, wane ne faaalamai nia, e luua, ka sorea, Mado ni nau neri, Rabae? Nia ka soree isana, Oi sorea.

²⁶ Ma si maṉa na keki faṉa, tha Jesus e ṉalia berede, ka sore lea, ma ka nia; ka falea ifana toa ne toleda, ma ka sorea, Nalia, muki ania; seeku nai nia.

²⁷ Ma nia ka ṉalia titiu, ka sore lea, ma ka falea ifada, ka una eri, Kamulua sui muki kuu ania;

²⁸ Uria na abuku nai nia ana alaofua falu, ne igwa ifana toa oro uria doanita la ana abula taa la ki.

²⁹ Ma nau ku soree isamulua, Kwasi kuu lau ana foana faene nei, kai to uria fa boṉi kwai kuu falu ania bi kamulua ana tooa Maka nau.

³⁰ Ma buriana na kera ṉulia tee fa ṉu e sui, keki kotho i maa, keki lae uria gwa tolo i Olifesi.

³¹ Sui tha Jesus ka soree isada, Kamulua sui muki taofai kamulua suli nau afa rodo nei: uria na kera keda, Kwai thauṉia wane ni toi la kalia sifi, ma sifi ana aini do eri ka akota.

³² Sui buriana keki tatae nau, kwai lae inaomulua uri Galili.

³³ Tha Pita e luua, ka soree isana, Mada sa kera sui keki taofai kera suli oe, nau e ai dodoloa kwai taofai nau.

³⁴ Tha Jesus ka soree isana, Mamana ku soree isamu, Afa rodo nei boo, maṉa kukua e ai si ’ei u, ni oe ulu fa sore lana oki sorea o dora bamu iaku.

³⁵ Tha Pita ka soree isana, So mae la ni mena kera to’oa kwai mae bi oe, nau sa kwa sorea kwa dora iamu e ai. Toa ne toleda sui kera ṉata una eri lau boo.

³⁶ Sui tha Jesus e lae bida uria si kula kera alaṉia ana Gethesemane, ma ka soree isana toa nia ne toleda, Muki ono kunei, si maṉa kwai lae laba, kwai foa.

³⁷ Ma nia ka talaia tha Pita ma ro kaluwane tha Sebede ki bi nia, kai liodila ma kai taa faamau iana.

³⁸ Sui nia ka soree isada, Maṉoku e liodila ka tatha, karaṉia kwai mae naa: muki to kunei, muka tharai bi nau.

³⁹ Ma nia ka lae kau uria tee si kula karaṉi bana, ka aru fafia maana, ma ka foa, ka una eri, Maka nau ae, mada sa kera talaana, titiu nei kei tatha nana faisi nau: sui, uria bana nau ku thathamia e ai, mamana lana ni oe.

⁴⁰ Ma nia lae mai sana toa ne toleda, ka rikia keki biṉa ada, ma nia ka soree isatha Pita, Nea! o dora ana tharai la bi nau sulia ta tee kadee maṉa?

⁴¹ Muka tharai ma muka foa, fasi e ai musi liu i la bae aliṉa la: spirit imole e fifarao boo, ma sui seena e feda.

⁴² Ma ruana nia ka lae lau kau, ka foa, ka una eri, Maka nau ae, mada sa do nei e ai kesi talaana sa kai tatha kau, si maṉa kwasi kuufia u, si do no thathamia keki ilia.

⁴³ Ma nia fula lau, ka rikia keki biṉa ada, uria na maade fafokulu.

⁴⁴ Ma nia akwasida lau, ka lae kau, ula lau kai foa, ka sorea lau si baea ba ki.

⁴⁵ Sui nia lae mai sana toa ne toleda, ka soree isada, Biṉa namulua, muki mamalo: rikia fasi, kadee maṉa ba ni karaṉi naa, ma Kaluwane imole keki faaalamai nia i abana toa na kera abula taa.

⁴⁶ Tatae, kuki lae nakulua: rikia fasi, wane na kai faaalamai nau ni karaṉi naa.

⁴⁷ Ma si maṉa nia kai ṉata u bana, rikia fasi, tha Judasi, wane ana akwala ma ro wane ba ki, ka fula, malului wane bi nia fafia nini ni firu ma dia ki; wane inoto ni foa ki bia ulunao ana toa eki kera arasida mai.

⁴⁸ Ma wane eri ne faaalamai nia e alulu isada, ka una eri, Wane eri bana na nau kwai nonoia, nia bonaa neri: muki tolea.

⁴⁹ Ma si maṉa eri u boo nia fula isatha Jesus, ka sorea, Rabae ae! sui ka nonoia.

⁵⁰ Ma tha Jesus ka soree isana, Wane lea nau, uria ta no lae mai? Sui kera fula, keka raua tha Jesus, keka tolea.

⁵¹ Ma rikia fasi, tee wane ana toa na kera to bia tha Jesus e tekwasia abana, ka lafua nini ni firu nia, ka kwaea wane ni ra aofia ni foa, ma ka kwaemusia aliṉana.

⁵² Sui tha Jesus ka soree isana, Alua lau nini ni firu oe i fuila: uria toa eki sui boo na kera ṉalia nini ni firu keki mae ana nini ni firu.

⁵³ Mado manatamu so nau ku dora ana soctoona lana Maka nau, fasi nia kai falea u boo maṉa eri fai molee angel ma ka ta?

⁵⁴ Ma sui keki faamamane ufita ana kekeda la abu ba ki, fasi kai una eri boo?

⁵⁵ Ana kadee maṉa eri tha Jesus ka soree isana malului wane eki, Mulu lae mai mala toa na kera lae uria rau lana wane ne bili, fafia nini ni firu ki ma dia ki fasi muki rau iaku nania? Nau ku oono sulia boṉi la biu baita tha God, ku kwaifamanatai, me ai musi rau iaku.

⁵⁶ Ma sui si do eki sui bana ka mamana, fasi keki faamamanea kekeda lana porofeta ba ki. Ma si maṉa eri toa ne toleda kera akwasi nia, keka thaka.

⁵⁷ Ma toa na kera raua tha Jesus keka tole nia kau isatha Kaiafasi ṉa aofia ni foa, si kula na wane ni kekeda ki ma ulunao ki kera ofu mai iei.

⁵⁸ Ma tha Pita e lae da mai iburiana, uri lalabata aofia ni foa, ka kotho mai, ka ono bia toa ni ra, fasi kai rikia susui lana.

⁵⁹ Ma wane inoto ni foa ki, ma ulunao ki, ma ofu la eri sui bana kera rofe uria tei wane keki lole fafia tha Jesus, fasi keka thauṉi nia;

⁶⁰ Ma sui kesi fulatoona, wane oro na kera lole fafi nia keka fula mena ada. Ma iburi naa ta ro wane keko fula,

⁶¹ Keko sorea, Wane nei e sorea, Nau ku talaana oge lana biu baita tha God, ma kwai kasia lau sulia ulu fa boṉi.

⁶² Ma aofia ni foa ka tatae ia, ka soree isana, Osi luuda boo ana ta si do? si ta na toa nei keki alaṉi oe ania?

⁶³ Ma tha Jesus ka bona bana. Ma aofia ni foa ka soree isana, Nau ku faaothi oe ana ṉa God maruki, Oko faaroṉo kamilia mada sa ni oe ṉa Christ, Kaluwane tha God.

⁶⁴ Tha Jesus ka soree isana, Oi sorea: una ena mena, ku soree isamulua, Too asi maṉa eri do toto muki rikia Kaluwane imole kai ono ibali aba aola ana sukwaia, ma kai lae mai fafona datha lo ki i thalo.

⁶⁵ Sui aofia ni foa e sera tooni nia ki, ka una eri, Nia bae ni faretoliṉi lana tha God: si ta lau keki rofea toa ni faamamane lana si do kera thaitoomana uria? rikia fasi, mulu roṉoa naa ṉata la eri:

⁶⁶ Manatamulua e ufita neri? Kera luua, keka sorea, Nia kai maelia.

⁶⁷ Sui kera ṉisufia maana ma keka kumua: ma tei wane kera fidalia,

⁶⁸ Keka una eri, Bae mala porofeta isamilia, oe ṉa Christ: ni tei ne kwae oe?

⁶⁹ Ma tha Pita e to kai ono i maa i la lalabata: ma tee thari e fula isana, ka sorea, Oe lau boo o toto bia tha Jesus, wane i Galili.

⁷⁰ Ma nia ka tofe isana toa eri sui, ka sorea, Kwasi thaitoomana si do noki sorea.

⁷¹ Ma si maṉa ne lae kau i la taofa, tee thari lau e riki nia, ma ka soree isana toa na kera ni kula eri, Wane nei lau boo e toto bia tha Jesus, wane i Nasaretha.

⁷² Ma nia ka tofe lau ana othi la, Nau kwasi thaitoomana wane eri.

⁷³ Me ai si tau lau bana, toa na kera takwe kula eri keka fula ma keka soree isatha Pita, Oe ta wane iada lau boo mamana boo; uria na bae lamu e fatai oe.

⁷⁴ Ma nia ka bii kwala ma ka othi, Nau kwasi thaitoomana wane eri. Ma si maṉa eri u boo kukua ka ’ai.

⁷⁵ Ma tha Pita ka onotoona bae lana tha Jesus ne soree isana na ba, Maṉa kukua e ai si ’ei u, ni oe ulu fa sore lana oki sorea o dora bamu iaku. Ma nia kotho i maa, ka aṉiṉi ka tatai.