Mathui 25 - Ṉa Alaofua Falu 1923 1949

¹ Asi maṉa eri tooa i thalo kai ’uria akwalee thari, na kera ṉalia laeta kera ki, ma kera lae kau fasi keki toda ana wane seelea.

² Ma ta lima ai iada kera oeaia, ma ta lima ai liode too.

³ Uria na ai na kera oeaia, si maṉa na kera ṉalia laeta kera ki, e ai kesi ṉalia ta gwai laeta bida:

⁴ Ma ai liode too ki kera ṉalia u boo gwai laeta i la do taala gwai eri bia laeta kera ki.

⁵ Si maṉa na wane seelea eri e to u mai, kera sui kera maaelelo ma keka biṉa.

⁶ Sui la initoona rodo ’ai la ka too, Rikia fasi, wane seelea! Muki lae mai, muki toda ania.

⁷ Sui thari ba ki sui keka tatao, keka beta laeta kera ki.

⁸ Ma ai na kera oeaia keka soree isana ai na liode too ki, Faloa mai ta si ana gwai laeta kamulua ifamilia; uria na laeta kamilia ki kei mae.

⁹ Ma ai na liode too ki kera luuda, keka una eri, Ada ka ai si talaakulua si sui: muki lae boo isana toa na keki usi, ma muka usi ifamulua.

¹⁰ Ma si maṉa na kera lae kau fasi keka usi, wane seelea eri ka fula; ma toa na kera kwaimaakwali kera kotho bi nia isana fafaṉa ana lumaa: sui keka fono.

¹¹ Buriana ta, thari ba ki lau keka fula lau boo, keka una eri, Lord, Lord, ifi uri kamilia.

¹² Ma nia luuda, ka sorea, Mamana ku soree isamulua, E ai kwasi thaitoomamulua.

¹³ Mania muki tharai, uria na musi thaitoomana fa boṉi eri mado kadee maṉa eri na Kaluwane imole toto kai fula.

¹⁴ Sulaania e ’uria ta wane na kai lae uria ta fanua eeta, e ailia toa ni ra nia, ma ka falea do nia ki ifada.

¹⁵ Ma nia ka falea ta lima taleda ifata wane, ta wane ta ro do, ma ta wane tee do; e fale sulaania si do na kera talaana ili lana; sui ka lae ana lae la nia.

¹⁶ Si maṉa eri u boo wane ne ṉalia lima taleda e lae ka ilia si do ania, ma ka toda lau ta lima taleda.

¹⁷ Una eri lau boo wane ne ṉalia ro do ka toda lau ta ro do.

¹⁸ Ma wane eri ne ṉalia tee fa do ba e lae ka ilikilu i la theegano, ka thaufunia malefo wane inoto nia.

¹⁹ Sui toto e tau naa, wane eri ne inoto ana toa ni ra eki ka fula, ma ka ṉata bida sulia malefo eki.

²⁰ Mania tha wela fu ne ṉalia lima taleda ba ki e fula fafia ta lima taleda lau, ka ana eri, Wane inoto ae, o falea lima taleda ifaku na ba: rikia fasi, ku toda lau mai ta lima taleda.

²¹ Wane inoto nia ka soree isana, O abula lea, wane ni ra no lea mo mamana: o mamana fafia aṉee si do ki, kwai alu oe oki inoto ana do oro: kotho mai, oki seethathala bia wane inoto oe.

²² Ma wane eri lau boo ne ṉalia ro taleda ba ki e fula, ka sorea, Wane inoto ae, o falea ro taleda ifaku na ba: rikia fasi, ku toda lau mai ta ro taleda.

²³ Wane inoto nia ka soree isana, O abula lea, wane ni ra no lea mo mamana: o mamana fafia aṉee si do ki, kwai alu oe oki inoto ana do oro: kotho mai, oki seethathathala bia wane inoto oe.

²⁴ Ma wane ba lau boo ne ṉalia tee taleda ba e fula ka sorea, Wane inoto, ku thaitoomana o wane o naunau, oki kwaia unii do ne rafo asi kula nosi afusia, ma oko ofudo asi kula nosi takaloṉania:

²⁵ Ma nau ku mau, kwa lae kwa thaufunia taleda oe i la theegano: rikia fasi, si do oe nania, ṉalia amua si do oe.

²⁶ Wane inoto nia e luua, ka soree isana, Wane ni ra no taa mo seedadaloa, o thaitoomana kwai kwaia unii do ne rafo asi kula na kwasi afusido iei, ma kwa ofudo asi kula na kwasi takaloṉania;

²⁷ Mania si do na sa oko ilia na ba sa oko falea malefo nau ifana toa na keki ilia si do ana malefo, fasi lalae ku fula, kwa ṉalia lau malefo nau bia tei malefo lau ka safua.

²⁸ Mania muki ṉalia taleda nei faisi nia, muki falea ifana wane ne ana ta tafulu taleda.

²⁹ Uria wane ne rikia si do, keki falea si do ki ifana, ma nia kai rikii do faamau: ma wane ne ai ana ta si do, si do nia rikia mena keki ṉalia faisia.

³⁰ Ma muki suia wane ni ra nei ne ai si lea uria ta si do uri la maerodo nei maa: si kula ana aṉi la ma didilifo la.

³¹ Lalae Kaluwane imole kai lae mai ana inotoa nia, ma angel ki sui bana bi nia, asi maṉa eri nia kai ono ana do ni ono ana inotoa nia:

³² Ma toto keki ofua toa ana fanua ni sui bana inaofana: ma nia kai talisida, ta toa faisia ta toa, mala wane ni fono toi kalia sifi kai talisia ṉa sifi faisia gota ki:

³³ Ma nia kai alua sifi ibali aba aola nia, ma gota eki ibali aba mauli nia.

³⁴ Sui Kiṉa eri kai soree isana toa ibali aba aola nia, Lae mai, toa na Maka nau e falea lea la ifamulua, muki to ana tooa na kera thauwai nia maakwali kamulua too mai ana boa lana fanua nei iano:

³⁵ Uria ku thaofa, ma muki fafale iaku: lioku e lalaṉa, ma muka falea kwa kuu: ku bii fula muka dora ani nau, ma muka talai nau uri biu;

³⁶ Ku talu, ma muka faatooni nau: ku matai, ma muka makele nau: ku toto i la lokafu, ma muka fula isaku.

³⁷ Sui toa na kera kokoto keki luua, keki una eri, Wane inoto ae, si maṉa ta mili riki oe o thaofa, ma mika thare oe? mado liomu e lalaṉa, ma mika fale oko kuu?

³⁸ Si maṉa ta mili riki oe o bii fula mika dora ani oe, ma mika talai oe uri biu? mado o talu, ma mika faatooni oe?

³⁹ Ma si maṉa ta na mili riki oe o matai, mado o to i la lokafu, ma mika fula isamu?

⁴⁰ Ma Kiṉa eri kai luuda, kai soree isada, Mamana ku soree isamulua, Uria na mulu ilia ata wane ne faekwa asia ana dooraku nei ki, do mulu ilia ani nau.

⁴¹ Sui nia kai sorea lau boo isana toa ibali mauli nia, Lae kamulua faisi nau, toa na taa la ka to fafi kamulua, muka lae i la era na kai to tatha, na kera thauwai nia maakwalia tha devil ma angel nia ki:

⁴² Uria ku thaofa, ma musi fale iaku: lioku e lalaṉa, ma musi fale kwa kuu:

⁴³ Ku bii fula muka dora ani nau, ma musi talai nau uri biu; ku talu, ma musi faatooni nau; ku matai, ma ku toto i la lokafu, ma musi makele nau.

⁴⁴ Sui kera lau boo keki luua, keka una eri, Wane inoto ae, si maṉa ta mili riki oe o thaofa, mado liomu e lalaṉa, mado o bii fula mika dora ani oe, mado o talu, mado o matai, mado o toto i la lokafu, ma misi rei oe?

⁴⁵ Sui nia kai luuda, ka una eri, Mamana ku soree isamulua, Uria na musi ilia ata wane ne faekwa asia ana wane nei ki, e ai musi ilia ani nau.

⁴⁶ Ma toa eki keki lae kau ana kwae la na kai to tatha: ma toa na kera kokoto keki to ana marukia tatha.