Mathui 24 - Ṉa Alaofua Falu 1923 1949

¹ Ma tha Jesus e kotho i maa faisia biu baita tha God, kai lae nana; ma toa nia ne toleda kera fula isana uria fatai lana aini biu ana biu baita eri isana.

² Ma tha Jesus ka soree isada, Do oro nai ki muki rikia? mamana ku soree isamulua, Toto kesi ekwa ata fau si to fafona ta fau kunei; keki aga teefau ania.

³ Ma si maṉa nia kai ono sulia gwa tolo i Olifesi, toa ne toleda kera fula isana tee kera, keka una eri, Oki faaroṉo kamilia, do eki kai mamana iaṉita? ma nifenia bala ana fula lamu, ma susui lana kada nei?

⁴ Ma tha Jesus e luuda, ka soree isada, Muka fia ada ta wane ka talai garo ani kamulua.

⁵ Uria na toa oro toto keki lae mai ana thataku, keki una eri, Nau Christ ba; ma keki talai garo ana toa oro.

⁶ Ma toto muki roṉoa omea ki ma faaroṉoa ana omea ki: muka rikia ada muka mamau: uria na kera to’oa u boo sa do eki kai lae mai e ai si ei; ma susui lana si do e ai u.

⁷ Uria na toa ata fanua toto keki tatae keki firu bia toa ata fanua, ma toa ta wane inoto keki firu bia toa ta wane inoto: ma unii thaofa ma mataia taa sisigi ki ma anunu kai liu ata fanua mata fanua na mai.

⁸ Si do eki sui bana thafali lana fi wela la.

⁹ Sui keki fale kamulua ifana malakita la, ma keki thauṉi kamulua: ma toa na fanue ni sui rakeda kai aṉofi kamulua inunufana thataku.

¹⁰ Ma asi maṉa eri toa oro keki taofai kera, ma keki fale kwailiu ani kera, ma keki rakeaṉoṉo kwailiu uri kera.

¹¹ Ma porofeta oro na kesi mamana toto keki tatae, ma keki talai garo ana toa oro.

¹² Ma uria na si do na kera lufia naa kai tola alaa lau, liothau lana toa oro kai gwari.

¹³ Ma wane na kai susuu ka fula ana susui lana, wane eri keki faamaruki nia.

¹⁴ Ma faaroṉoa lea nei ana tooa keki ṉata sulia i la fanua ni sui bomana ana faamamane la ifana toa ana fanua ni sui: ma susui lana kada nei ka bii fula.

¹⁵ Mania lalae mulu rikia si do kera mamagu ania, si do ana faafunu la, na tha Daniela ṉa porofeta e ṉata sulia na ba, lalae mulu rikia kai takwe asi kula ne abu (wane na kai teemai kai thaitoomana fasi),

¹⁶ Asi maṉa eri toa na kera ni Judia keki thaka ada uria gwa tolo lo ki:

¹⁷ Wane ni fafo biu kai to ana si sifo mai uria ṉali lana si do nai biu nia ki:

¹⁸ Ma wane ni la ra kai to ana si oli lau mai uria ṉali lana tooni nia.

¹⁹ Ma taa la kai thauṉia ai na kera iana ma ai na keki faasusu afa boṉi eki!

²⁰ Sui muki foa fasi e ai musi thaka ana unii gwagwaria, mado afa boṉi mamaloa:

²¹ Uria na si maṉa eri unii fualaṉa baita kai fula mai, si do una eri e ai si fula u too ana thafali lana fanua nei iano, sa ka fula lau mai e ai.

²² Ma mada sa kesi lofoṉurusia fa boṉi eki, ta wane so ka maruki e ai: sui keki lofoṉurusia boo fa boṉi eki ifana toa kera talisida.

²³ Sui mada sa ta wane kai soree isamulua, Rikia fasi, Christ ba ni kunei, mado keka soree, Kula nei; musi faamamanea.

²⁴ Uria na Christ na kesi mamana ki, ma porofeta na kesi mamana toto keki tatae, keki fatai nia bala si do baita ki ma do ni kwele la ania; fasi, mada sa kera talaana, do keki talai garo ana toa na kera talisida ni mena.

²⁵ Rikia fasi, nau ku faaroṉo kamulua inao neri.

²⁶ Mania mada sa keki soree isamulua, Rikia fasi, ni la fanua kwasi; musi lae kau: mado keka sorea, Rikia fasi, ni ana kadee biu banitei ki; musi faamamanea.

²⁷ Sulaania ’uria na manu kai mamaarula ibali tae lana thato, ma keki rikia ibali su lana thato; kai una eri lau boo ana fula lana Kaluwane imole.

²⁸ Kula eri bana na do mae ni iei, kula eri afa keki ofu mai iei.

²⁹ Sui si maṉa eri u boo, buriana unii fualaṉa ana kada lo ki mai, keki faarorodoa thato lo, ma madami ka ai si laa, ma bubulu ki kai aru mai faisia thalo, ma do sukwai ki ana thalo lo ki keki igiigia:

³⁰ Ma sui bala Kaluwane imole kai fula fatai mai i thalo: ma si maṉa eri kulee toa ni sui bana ana fanua nei iano keki aṉi, ma kekei rikia Kaluwane imole kai lae mai ana datha lo ki i thalo, ana sukwaia ma inotoa baita.

³¹ Ma nia kai arasia mai angel nia ki fafia aṉi lana buṉu ne aṉi baita, ma keki ofua mai toa nia ne talisida faisia fai sui fanua, faisia susui lana tee bali ana thalo lo, lae ka fula ata bali.

³² Muki thaitoomana fasi maalutana tarifula thakwari: si maṉa na tharana e bibina naa, ma kai ṉoṉothaa, muka thaitoomana unii thato ni karaṉi naa;

³³ Una eri lau boo ni kamulua, lalae mulu rikia si do oro eki, muki thaitoomana nia to karaṉi naa, isana maana olofolo ki.

³⁴ Mamana ku soree isamulua, Kulee toa nei toto kesi sui u, ma si do eki sui boo kai mamana.

³⁵ Thalo lo ma fanua nei iano toto kai sui, ma bae laku toto si sui.

³⁶ Ma fa boṉi eri ma kadee maṉa eri e ai ta wane si thaitoomana, angel ki i thalo mena ka ai, bia Kaluwane eri mena ka ai lau boo, talitoona boo ṉa Maka e thaitoomana.

³⁷ Ma ’uria si maṉa na tha Noa e toto na ba, kai una eri lau boo ana fula lana Kaluwane imole.

³⁸ Sulaania ka ’uria si maṉa ba na kafo e ai si olo u na ba, kera faṉa ma kera kuu, kera tolekini ma kera toowane, ka fula ana fa boṉi na tha Noa e tae i la aka,

³⁹ Ma kesi thaitoomana ma toto kafo ka olo boo, ka lauda ka sui; fula lana Kaluwane imole kai una eri.

⁴⁰ Asi maṉa eri ro wane keki ni la ra; ta wane keki ṉalia, ma ta wane keki akwasia:

⁴¹ Ro kini keki maga uiti ana fau ni maga lana uiti; ta ai keki ṉalia, ma ta ai keki akwasia.

⁴² Mania muki tharai: uria na musi thaitoomana fa boṉi na Lord kamulua kai fula.

⁴³ Muki thaitoomana si kula eri, mada sa wane ana biu e thaitoomana si kada na wane na kai bili kai fula, do kai tharai uria, ma ka ai si alamatania keki ogea biu nia.

⁴⁴ Mania ni kamulua muki kwaimaakwali lau boo: uria na asi kadee maṉa na musi manatatoona, Kaluwane imole kai fula.

⁴⁵ Mania nifenia wane ni ra eri ne mamana ma liona ka too, na wane inoto nia e alu nia ka inoto ana toa na biu nia, fasi kai falea moriṉa kera asi maṉa ni fale lana?

⁴⁶ Lea iana, wane ni ra eri na wane inoto nia, lalae e fula, kai rikia kai ade una eri.

⁴⁷ Mamana ku soree isamulua, Nia kai alu nia kai inoto asi do nia ki sui bana.

⁴⁸ Sui mada sa wane ni ra taa eri ka soree i ruruuna, Wane inoto nau kai to, e ai si lae u mai

⁴⁹ Ma kai kwaea toa na keki ra ofu bi nia, ma kai faṉa ma kai kuu bia toa na kera kuu ka bula kera;

⁵⁰ Wane ne inoto ana wane ni ra eri kai fula afa boṉi na nia ai si fia bana, ma ana kadee maṉa ne ai si thaitoomana,

⁵¹ Ma kai kwai nia ana ro kadee do, ma kai falea si kula thatana kai to bia toa na kera olodola: si kula ana aṉi la ma didilifo la.