Mathui 23 - Ṉa Alaofua Falu 1923 1949

¹ Sui tha Jesus e ṉata isana malului wane eki bia toa nia ne toleda,

² Ka una eri, Wane ni kekeda ki bia Farisi ki keki ono i fuila tha Mosesi:

³ Mania si do ki sui ana atona bana si do na keki soree isamulua, muka ilia ma muka manatatoona: ma sui musi ilili sulia ra kera ki; uria na keki ṉata, ma kesi ilia.

⁴ Iu, keki kania si do ṉali lana ki e kulua ma ka taa, ma keka alua i gwauna abana imole; ma ni kera ana keki lalakwa sa keki idua ana kukuda.

⁵ Ra kera sui bana keki ilia uria bana fasi imole ka rikia: kera thauwai nia filateri kera ki ka rerebaa, ma keka faarerebaa tagwarana tooni kera ki,

⁶ Ma keka thathamia si kula inoto sana fafaṉa ki, ma si kula inoto ni ono la ki la biu ni ofu la ki,

⁷ Bia kwaiaratai lea la ki la usia ki, ma keka thathamia imole kai alaṉida ana Rabae, Rabae.

⁸ Ma ni kamulua muki lufia kesi alaṉi kamulua ana Rabae: uria na amulua tee wane ni kwaifamanatai, ṉa Christ, ma ni kamulua sui na baree wai doorana.

⁹ Ma musi maka ata wane i fanua nei iano: uria na amulua tee Maka, ne ni mei thalo.

¹⁰ Ma muki lufia kesi alaṉi kamulua ana wane inoto ki: uria na amulua tee wane inoto, na ṉa Christ.

¹¹ Ma wane ne baita ka tatha ani kamulua kai ra iamulua.

¹² Ma ni tei bana na kai tala faainoto nia i talaana keki faafaekwa nia; ma ni tei bana na kai tala faafaekwa nia i talaana keki faainoto nia.

¹³ Taa la kai thauṉi kamulua, wane ni kekeda ki ma Farisi ki, toa na muki olodola! uria na mulu fonoa tooa i thalo faisia imole: kamulua e ai musi kotho iei, ma toa na sa keki kotho mena e ai musi alamatanida kesi kotho iei.

¹⁴ Taa la kai thauṉi kamulua, wane ni kekeda ki ma Farisi ki, toa na muki olodola! uria na muki lagua si do nai maafera gwa oru ki, ma muki lole ana foa la tau: mania toto muki fulatoona kwae la ne baita ka tatha.

¹⁵ Taa la kai thauṉi kamulua, wane ni kekeda ki ma Farisi ki, toa na muki olodola! uria na muki kalia amali ma fanua uria ta tee Jenetaele mena muki ṉata isana fasi kai ade mala Ju; ma si maṉa ne ade una eri naa, muki adea nia ṉa wela i Hell ka tatha ani kamulua.

¹⁶ Taa la kai thauṉi kamulua, toa na muki tatha inao ma maamulua e rodo, toa na muki sorea, Ni tei bana na kai othi ana biu baita tha God, tonee si do ni bana; ma ni tei bana na kai othi ana goloda ana biu eri, nia kai ilia si do nia sorea e ai si ei boo.

¹⁷ Toa na mulu oewanea ma maamulua e rodo: nifenia si do ne baita, goloda eri, mado biu baita tha God ne faaabua goloda eri?

¹⁸ Bia muki sorea, Ni tei bana na kai othi ana fulii era ni foa, tonee si do ni bana; ma ni tei bana na kai othi ana si do kera falea na ni fafona, nia kai ilia si do nia sorea e ai si ei boo.

¹⁹ Toa na mulu oewanea ma maamulua e rodo: uria nifenia si do ne baita, si do eri na kera falea, mado ṉa fulii era ni foa na kai faaabua si do eri na kera falea?

²⁰ Mania ni tei bana na kai othi ana fulii era ni foa, kai othi ania, bia si do ki sui bana na ni fafona.

²¹ Ma ni tei bana na kai othi ana biu baita tha God, kai othi ania, ma ani nia na kai to iei.

²² Ma wane na kai othi ana thalo, kai othi ana do ni ono tha God ana inotoa, bia kai othi ani nia na kai ono fafona.

²³ Taa la kai thauṉi kamulua, wane ni kekeda ki ma Farisi ki, toa muki olodola! uria na muki falea taṉafula ana roketa ma baero ma ri, ma si do fifi ki ana ṉa lo mulu ekwa ania ka teo, musi ilia, kotu kokoto, ma tatakomia, bia fitooa: si do eki sa muki ilia naa na ba, bia si do ba ki ka safua.

²⁴ Toa na muki tatha inao maamulua e rodo, na muki suusia kukulaṉo faisia kafo, ma muka okomia bamulua ṉa kamela.

²⁵ Taa la kai thauṉi kamulua, wane ni kekeda ki ma Farisi ki, toa na muki olodola! uria na muki faafalua seena titiu ma labeṉa, ma i lala do eki kai fuṉu bana ana laulau la ma ili thasiasia la asi do ki.

²⁶ Oe Farisi maamu e rodo, oki faafalua i lala titiu ma labeṉa totonao, fasi seena kai falu lau boo.

²⁷ Taa la kai thauṉi kamulua, wane ni kekeda ki ma Farisi ki, toa na muki olodola! sulia na mulu ’uria kwaiṉeia na kera rabua ka kwakwaoa, na seena i thara riki lane lea, ma sui i lala e fuṉu ana ogina toa mae, bia si do taa ki sui bana.

²⁸ ’Uria lau boo ni kamulua riki lamulua e kokoto ana maana imole, ma i la ruruumulua e fuṉu ana olodola la ma si do na kera lufia.

²⁹ Taa la kai thauṉi kamulua, wane ni kekeda ki ma Farisi ki, toa na muki olodola! uria na muki tabalia si do ana thaitoomana lana porofeta i gwauna kwaiṉeia kera ki, ma muki lauṉia kwaiṉeia toa kokoto ki,

³⁰ Ma muka sorea, Mada sa mili to asi maṉa na maka kamilia kera toto, kamilia sa mika safuda ana abuna porofeta ki e ai.

³¹ Mania mulu tala faaroṉo ania, na ni kamulua kaluwane toa na kera thauṉia porofeta ki.

³² Eeri, faafuṉua amulua kwadee do ni olotooa maka kamulua ki.

³³ Kamulua wa aala ki, kamulua kwalafana baekwa i tolo ki, toto muki thaka ufita faisia kotu baita ana hell?

³⁴ Mania, rikia fasi, kwai arasia mai porofeta ki isamulua, bia toa liode too, ma wane ni kekeda ki: tei wane iada muki thauṉia ma muka fota fafida ana ’ai rarafolo; ma tei wane iada muka kwae tataria ana sulida i la biu ni ofu la kamulua ki, ma toto muka tona ilamatanida too ana tee toaa susu, lae ka fula ata toaa susu:

³⁵ Fasi si do taa kai fulatoomulua aena abuna toa kokoto ka sui ne igwa ana fanua nei iano, too mai ana abuna tha Ebela, wane ne kokoto, lalae mai ka fula ana abuna tha Sakaraia kaluwane tha Barakaia, na mulu thauṉia i maalutana si kula ne abu ma fulii era ni foa.

³⁶ Mamana ku soree isamulua, Si do eki sui bana kai fulatoona unii wane nei.

³⁷ Jerusalema, Jerusalema, no thauṉia porofeta ki, ma oko ufauna toa na kera arasia mai isamu! si maṉa oro sa kwai ofua wela oe ki, mala kukua na kai ofua kaela i fara kukubana, ma muka lalakwa!

³⁸ Rikia fasi, biu kamulua keka akwasia ifamulua ka gwau.

³⁹ Uria nau ku soree isamulua, Too asi maṉa eri musi riki nau lau, lalae ka fula asi maṉa na muki sorea, Lea iana, wane na kai lae mai ana thatana tha Lord.