Mathui 22 - Ṉa Alaofua Falu 1923 1949

¹ Ma tha Jesus e luuda ma ka ṉata lau ana tarifula ki isada, ka una eri,

² Tooa i thalo keka toolaṉania ka ’uria tee kiṉa, ne thasi faṉa ana lumaa ifana kaluwane nia,

³ Ma ka arasia kau toa ni ra nia keka ailia toa na kera laefida mai isana fafaṉa ana lumaa eri: ma keka lalakwee lae mai.

⁴ Sui lau nia ka arasia tei toa ni ra lau, ka una eri, Muki faaroṉoa toa na kera laefida mai, Rikia fasi, ku thauwai nia faṉa nau uri la thato ka kwaimaakwali: ku kwaia naa buloka nau ki bia do ku tharea ka gwagwarurutaa, ma si do ki sui bana kera alua naa maasi kamulua: muki lae mai isana fafaṉa ana lumaa nei.

⁵ Ma kera roṉo faekwa ania, keka lae nada, ta wane uri oole nia, ma ta wane uri usi la nia:

⁶ Ma oretana toa eri kera raua toa ni ra nia, keka ṉaṉasuala urida, ma keka thauṉida.

⁷ Ma si maṉa na kiṉa eri e roṉoa, nia ka rakeiri; ma ka arasia toa ana firua nia ki, lae keka thauṉia toa eki na kera thauwane, ma keka naarea toaa susu kera.

⁸ Sui nia ka soree isana toa ni ra nia, Fafaṉa ana lumaa nai kera alua naa maasida, ma sui toa na kera laefida mai e ai kesi farana.

⁹ Mania muka lae i la tala tabali ki, ma toa eki sui bana na muka fulatooda, muka laefida mai isana fafaṉa ana lumaa nai.

¹⁰ Mania toa ni ra eki kera lae kau uri la tala ki, keka ofua toa eki sui bana na kera fulatooda mai, toa taa bia toa lea: ma fafaṉa ana lumaa eri ka fuṉu ana imole na kera lae mai uri fafaṉa.

¹¹ Ma si maṉa na kiṉa eri e fula uria riki lana toa na kera lae mai uri fafaṉa, nia rikia tee wane ne ai si tooni ana tooni ana lumaa:

¹² Ma nia ka soree isana, Wane lea nau ae, o lae ufita mai kunei, do nosi tooni ana tooni ana lumaa? Ma nia ka dora ana si do kai sorea.

¹³ Sui kiṉa eri ka soree isana toa ni ra nia, Muka kania abana ma aaena, ma muka sui nia kau uri la maerodo nai maa; si kula ana aṉi la ma didilifo la.

¹⁴ Uria na toa oro kera ailida, ma ta aṉee imole ni bana kera filida.

¹⁵ Sui Farisi ki kera lae, keka furia ṉata sulia si ade la keki ilia fasi keka faaṉata nia asi ṉata ne garo.

¹⁶ Ma keka arasia toa kera na kera toleda isana, bia toa tha Heroda, keka una eri, Wane ni kwaifamanatai ae, mili thaitoomana o mamana, ma oko to’oa mamana boo tala tha God, me ai si oga oe boo uria ta wane: uria nosi lio uria seena imole.

¹⁷ Mania oki faaroṉo kamilia fasi, Nifenia manatamu? Kera alamatania fale lana malefo ifatha Sisa, mado e ai?

¹⁸ Ma tha Jesus ka thaitoomana si lio taa kera eri, ma ka sorea, Uria ta na muki ilitooku, toa muki olodola?

¹⁹ Muki fatai nia malefo ba isaku. Ma keka ṉalia mai tee peni isana.

²⁰ Ma nia ka soree isada, Ni tei na nuna ma kekeda lana nania?

²¹ Keka soree isana, Tha Sisa. Sui nia ka soree isada, Mania si do tha Sisa ki muki oli fafia isatha Sisa; ma si do tha God ki muki oli fafia isatha God.

²² Ma si maṉa na kera roṉoa, keka kwele, ma keka akwasi nia, keka lae nada.

²³ Afa boṉi eri Sadiusi ki kera fula isana, toa na keki sorea e ai ta tatae la faisia maea: ma keka soetoona,

²⁴ Keka una eri, Wane ni kwaifamanatai ae, tha Mosesi e sorea, Mada sa ta wane e mae, me ai ana ta wela, doorana kai tolea kwaina, ma kai aluwela ifana doorana.

²⁵ Ta fiu wai doorana kera toto isamilia: ma ulunao e tolekini, sui ka mae, ma uria ne ai ana ta wela, ka akwasia kwaina ifana doorana;

²⁶ Ma ruana wane eri ka ade una eri lau boo, bia ula, ka fula ana fiuna.

²⁷ Ma iburiada sui kini eri ka mae.

²⁸ Mania toto ana tatae la faisia maea ni tei ane fiu nonii wane eki kai tolea? uria na kera sui boo kera totolea.

²⁹ Tha Jesus e luuda, ka soree isada, Kamulua mulu garo, uria na musi thaitoomana kekeda la abu ba ki, ma sukwaia tha God.

³⁰ Sulia ana tatae la faisia maea e ai kesi tolekini, me ai kesi toowane, keka ’uria angel lo ki i thalo.

³¹ Sui do ba sulia tatae la faisia maea, musi teemainia si do ba na tha God e soree isamulua, be una eri,

³² Nau God tha Aberahamo ma God tha Aesaka ma God tha Jekofo? Tha God ṉa God toa mae e ai, nia God toa maruki.

³³ Ma si maṉa na malului wane eki kera roṉoa, keka kwele ana kwaifamanatai lana.

³⁴ Ma si maṉa na Farisi ki kera roṉoa na nia e faabona Sadiusi ki, keka ofu kera neri.

³⁵ Sui tee wane iada, ṉa wane ni kwaifamanatai ana ṉa lo, ka soetoona uria tee si do, kai ilitoona, ka una eri,

³⁶ Wane ni kwaifamanatai ae, nifenia si ṉata fifi ana ṉa lo ne baita?

³⁷ Tha Jesus ka soree isana, Oki liothau atha Lord na God oe ana ruruumu teefau, bia maṉomu teefau, ma manatamu teefau.

³⁸ Si ṉata fifi eri e baita ma ka to inao.

³⁹ Ma ruana si do e ’uria, nai nia, Oki liothau ana wane oe ’uria oki liothau ani oe i talaamu.

⁴⁰ Ṉa lo bia porofeta ki keki ṉado ana ro si ṉata fifi eki.

⁴¹ Asi maṉa na Farisi ki kera ofu, tha Jesus ka soetooda uria tee si do,

⁴² Ka una eri, Nifenia manatamulua sulia ṉa Christ? nia kaluwane ni tei? Keka soree isana, Kaluwane tha Defeta.

⁴³ Nia ka soree isada, Sui nifana ade lana na tha Defeta atha Spirit ka alaṉi nia ana Lord, ka una eri,

⁴⁴ Tha Lord e soree isana Lord nau, Oki ono ibali aba aola nau, Maasia si maṉa kwai alua maalimae oe ki fara aaemu?

⁴⁵ Mania mada sa tha Defeta e alaṉia ana Lord, nia kaluwane nia ufita lau?

⁴⁶ Ma ka ai ta wane si thaitoomana luu lana ana ta si do, ma too ana fa boṉi eri ta wane si seeraraa lau uria soetoona lana uria tei si do lau.