Mathui 21 - Ṉa Alaofua Falu 1923 1949

¹ Ma si maṉa na kera fula karaṉia Jerusalema, keka tatha fasi karaṉia i Bethefage, isana gwa tolo i Olifesi, si maṉa eri tha Jesus ka arasia ro wane ne toleda,

² Ka una eri isadaroa, Moki lae i la toaa faekwa na ni otafamaroa, ma si maṉa eri u boo do moki fulatoona tee ase na kera kania, ma tee kalee ase bia: lubea, moki talaia mai isaku.

³ Sui mada sa ta wane kai sorea ta si do isamaroa, moki sorea, Ṉa Lord e thathamia; ma si maṉa eri u boo nia kai alamatania mai.

⁴ Si do eki kera ilia, fasi keki faamamanea si do na porofeta e sorea, be una eri,

⁵ Muki faaroṉoa thari Saeono, Rikia fasi, Kiṉa oe kai lae mai isamu, E abula marabibi, kai ono fafona ase kai lae mai, Fafona kalee ase ṉa kaela ase.

⁶ Ma ro wane ne toleda kero lae, kero ade boo sulaania si do na tha Jesus e soree isadaroa,

⁷ Ma kera tolea mai ase eri, bia kaela, keka alua tooni kera ki fafia; ma nia ka ono i fafona.

⁸ Ma baita lana malului wane eri keka regweta tooni kera ki sula tale; ma tei toa lau keka kasia ulii ’ei, keka tharaṉania sula tale.

⁹ Ma malului wane na kera lae inaona, bia malului wane na kera lae mai iburiana, keka ’ai una eri, Tha God ka thufia kaluwane tha Defeta: Lea iana, wane na ka lae mai ana thatana tha Lord; Nia ne ni mei thalo ka thufi nia.

¹⁰ Ma si maṉa na nia fula i Jerusalema, toa eki sui bana i la toaa susu eri keka isi fufuli, keka una eri, Ni tei nai nia?

¹¹ Ma malului wane eki keka sorea, Porofeta ba na tha Jesus nai nia, ne toto i Nasaretha fanua i Galili.

¹² Ma tha Jesus e kotho i la biu baita tha God, ka taria toa eki sui bana na keki usi asi do ki bia toa na keki usi la biu eri, ma ka kefua tatafe toa na keki tatala ana malefo, bia do ni ono toa na keki usi ana bola eki;

¹³ Ma nia ka soree isada, Kera keda, Biu nau keki alaṉia ana biu ni foa la: ma ni kamulua mulu adea biu nau ṉa maufi toa na keki laulau.

¹⁴ Ma toa maade rodo bia toa aede katu kera fula isana i la biu eri: ma nia ka faamarukida.

¹⁵ Ma si maṉa na wane inoto ni foa ki bia wane ni kekeda ki kera rikia si do eki ni kwele la ania na nia ilia, bia wela na keki suni la biu baita tha God ma keka una eri, Tha God ka thufia kaluwane tha Defeta; keka rakeiri,

¹⁶ Ma keka soree isana, Oki roṉoa bamua si do na wela nei ki keki sorea nania? Ma tha Jesus ka soree isada, Iu: e ai musi teemai nia boo, O adea taṉo la ka lea bonaa faisia i lala fokona wela tara ki naa bia wela kokosa ki?

¹⁷ Ma nia akwasida, ma ka lae kau faisia toaa susu eri, ka lae uri Bethani, ma ka to i fanua eri.

¹⁸ Ma i la uusuwadia si maṉa nia kai oli uri toaa susu, nia ka thaofa.

¹⁹ Me rikia tee thakwari i ninimana tale, nia ka fula isana, ma ka ai si rikia ta do i gwauna, talitoona bana rena; ma nia ka soree isana, Ka ai lau ta foee do si fuṉu i gwaumu too asi maṉa eri ka lae alaa naa. Ma si mana eri u boo thakwari eri ka dele.

²⁰ Ma si mana na toa ne toleda kera rikia, keka kwele, ma keka una eri, Nifana ade lana ṉa thakwari eri ka makee dele si maṉa eri u boo?

²¹ Tha Jesus e luuda, ka soree isada, Mamana ku soree isamulua, Mada sa amulua ta fitooa, ma musi fitala, sa muka ilia talitoona si do na kera ilia ana thakwari nei e ai, do mada sa muki sorea mena isana gwa tolo nai, Keki ṉali oe ma keki u ani oe i la amali, do eri kai mamana.

²² Ma si do ki sui bana, ana atona bana si do na muki gania i la foa la, muki fitoo, do muki ṉalia boo.

²³ Ma si maṉa na nia fula i la biu baita tha God, wane inoto ni foa ki bia ulunao ki ana toa eri keka fula isana si maṉa nia kai kwaifamanatai, ma keka sorea, Sukwaia ta oki ilia ana do nei ki? ma ni tei ana ne falea sukwaia nei ifamu?

²⁴ Ma tha Jesus e luuda, ka soree isada, Nau lau boo kwai soetoomulua uria tee si do; mada sa muki faaroṉo nau ania, nau lau boo kwai faaroṉo kamulua ana sukwaia na nau kwai ilia ana do nei ki.

²⁵ Babataesi la tha Jone, do ita mai ifei? i thalo lo mai mado ita mai ana imole? Ma kera ṉata uri kera i talaadalua, keka una eri, Mada sa kuka sorea, I thalo lo mai; nia kai soree isakulua, Sui uria ta na musi fitoona?

²⁶ Sui mada sa kuka sorea, E ita mai ana imole; kulu mau ana malului wane; uria na kera sui kera sorea tha Jone ṉa porofeta.

²⁷ Ma kera luua tha Jesus, keka sorea, E ai misi thaitoomana. Nia lau boo ka soree isada, Nau kwasi faaroṉo kamulua lau boo ana sukwaia na nau kwai ilia ana do nei ki.

²⁸ Una ena nifenia manatamulua? Tee wane ana ta ro kaluwane; ma nia fula isana wane inao, ka sorea, Kaluwane nau, lae oki ra itaraena i la oolee faene.

²⁹ Nia luua, ka sorea, E ai kwasi lae: sui iburiana nia akeletania manatana, ma ka lae.

³⁰ Ma nia fula isana ruana wane, ka sore una ba lau boo. Ma nia luua, ka sorea, Kwai lae, arai ena: sui ka ai si lae bana.

³¹ Nifenia wane ana ro wane eki ne ilia si do maka nia e thathamia? Keka sorea, Wane inao. Tha Jesus ka soree isada, Mamana ku soree isamulua, wane eki na kera ṉalia takisi ki bia sesele eki keki lae ana tooa tha God inaomulua.

³² Uria tha Jone e fula isamulua ana tala ni kokoto la, me ai musi faamamanea: wane eki na kera ṉalia takisi ki bia sesele eki kera faamamanea: ma ni kamulua, si maṉa na mulu rikia, iburiana mena musi akeletania manatamulua, fasi mado e ai muki faamamanea.

³³ Roṉoa fasi tee tarifula lau: Tee wane gwauwai ana biu e fasia tee oolee faene, ma ka lakali faisia, ka ilia si kula taala waene, ma ka kasia tee faelaṉi ni toi la, sui ka sorea toa ni ra ana oolee faene keki to i la oole eri, ma nia ka lae uria ta fanua eeta.

³⁴ Ma si maṉa na unii faene karaṉia na mai, nia arasia toa ni ra nia isana toa ni ra ana oolee faene eri, fasi keka ṉalia fo nia ki.

³⁵ Ma toa ni ra ana oolee faene eri kera raua toa ni ra nia, keka kwaea ta wane, ta wane kera thauṉia, ma ta wane kera ufauna.

³⁶ Sui lau, nia ka arasia tei toa ni ra lau ka oro ana toa ne arasida inao: ma keka ade una eri lau boo iada.

³⁷ Sui iburiana nia ka arasia kaluwane nia isada, ma ka sorea, Do keki fare baita ana kaluwane nau.

³⁸ Ma si maṉa na toa eri na kera ra ana oolee faene eri kera rikia kaluwane nia, keka sorea uri kera i talaadalua, Wane na kai tae fulii ana maka nia nania; kulu thauṉia akulua, fasi si do na maka nia sa kai akwasia isana kuki ṉalia ifakulua.

³⁹ Ma kera raua, keka suia i thara faisia i la oolee faene eri, ma keka thauṉia.

⁴⁰ Mania lalae ṉa wane inoto ana oolee faene eri kai fula, si ta nia kai ilia ana toa eri na kera ra ana oolee faene eri?

⁴¹ Keka soree isana, Nia kai thaulabatania toa taa eri, ma kai faekwatania oolee faene eri ifana toa ni ra ana oolee faene eeta ki, toa na keki falea foee do ki ana unii faene eki.

⁴² Tha Jesus ka soree isada, E ai musi teemai boo i la kekeda la abu ba ki, Gwa fau na toa na kera kasibiu kera lalakwa ania, Fau eri kera alua i gwauna lokosuua: Si do eri too mai isatha Lord ka lae mai, Ma mili rikia ka faakwele?

⁴³ Mania ku soree isamulua, Tooa tha God keki ṉalia faisi kamulua, ma keki falea ifana ta toa na keki fuṉu ana foee do ne farana.

⁴⁴ Ma ni tei bana na kai aru fafona fau eri kai maga: ma ni tei bana na fau eri kai aru fafia, kai takaloṉania wane eri mala gegeona theegano.

⁴⁵ Ma si maṉa na wane inoto ni foa ki bia Farisi ki kera roṉoa tarifula nia ki, keki thaitoomana na nia ṉata suli kera.

⁴⁶ Ma si maṉa na kera rofe uria rau lana, keka mau ana malului wane ki, uria na kera sorea nia ṉa porofeta.