Mathui 20 - Ṉa Alaofua Falu 1923 1949

¹ Uria na tooa i thalo e ’uria tee wane gwauwai ana biu, ne lae i la si uusuwadia ni u boo fasi kai soetoona toa ni ra uria oolee faene nia.

² Ma buriana ne ala naa bia toa ni ra eri kai usida ana tee peni tee fa thato, nia ka arasida uri oolee faene nia.

³ Ma nia lae kau ana fuliṉana ula kadee thato, ka rikia tei wane lau keki tona takwe i la usia;

⁴ Ma nia ka soree isada, Kamulua lau boo muki lae i la oolee faene eri, ma atona bana si do ne too nau kwai falea ifamulua. Ma keka lae boo.

⁵ Sui lau nia ka lae kau ana fuliṉana ona kadee thato ma sikwana kadee thato, ma ka ade una eri lau boo.

⁶ Sui karaṉia thaulafia nia lae kau, ka fulatoona lau tei wane keki takwe; ma nia ka soree isada, Uria ta na muki tona takwe kunei sulia fa thato?

⁷ Keka soree isana, Uria ne ai ta wane si soetoomilia uria ra la. Nia ka soree isada, Kamulua lau boo muki lae i la oolee faene eri.

⁸ Ma toto e thaulafia naa, wane inoto ana oolee faene eri ka soree isana wane nia ne takofalea asi do, Ailia mai toa ni ra ba ki, ma oko falea usi lada ifada, thafalia ana wane ne fula iburi ka fula ana wane ne fula inao.

⁹ Ma si maṉa na toa na kera soetooda karaṉia thaulafia kera fula, kera sui keka ṉalia tee peni.

¹⁰ Ma si maṉa na toa na kera lae mai inao keka fula, manatada sa keki ṉalia do oro; sui kera lau boo kera sui keka ṉalia tee peni.

¹¹ Ma buriana na kera ṉalia, keka uubulu taa sulia wane eri ne gwauwai ana biu,

¹² Keka una eri, Toa nei na kera fula iburi nania, kera ra sulia tee kadee thato ni bana, mo aluda keka totoo bi kamilia, toa na do kulua ana thato e kulufi kamilia ka taa naa bia thato fifi la ni lau.

¹³ Ma nia luuda, ka soree isana tee wane iada, Wane lea nau ae, kwasi ade garo iamu e ai nania: ta na so ala isaku uria tee peni na ba, mado?

¹⁴ Ṉalia amu si do oe, oki lae namua; ku to’oa boo kwai fale ana wane nei ne fula iburi, ka ’uria lau boo fale la ku falea iamu.

¹⁵ Kesi alamatania kwasi ilia si do manataku to’oa ana si do nau ni u boo? mado o uga, sulia nau ku abula lea?

¹⁶ Mania toa na kera aru buri toto keki tatha inao, ma toa na kera tatha inao toto keki aru buri.

¹⁷ Ma si maṉa na tha Jesus kai tae uri Jerusalema, nia ka talaia tee akwala ma ro wane ne toleda tee kera sula tale, ma nia ka soree isada,

¹⁸ Rikia fasi, kuki tae uri Jerusalema; ma Kaluwane imole keki falea itana wane inoto ni foa ki ma wane ni kekeda ki; ma keki sorea nia kai mae,

¹⁹ Ma keka fale nia ifana Jenetaele ki fasi keka aefara ania, keka kwae tataria ana suila, ma keka fota fafi nia ana ’ai rarafolo: ma ana ula fa boṉi keki tataea.

²⁰ Sui thainana kaluwane tha Sebede ki ka fula isana bia kaluwane nia ki, ka faabaita nia, ma ka gani nia uria tee do.

²¹ Ma nia ka soree isana, Si ta no thathamia? Nia soree isana, Oki sorea sa ro kaluwane nau nei ki toto keko ono, ta wane ibali aba aola oe, ma ta wane ibali aba mauli oe, ana tooa oe.

²² Ma tha Jesus e luua, ka sorea, E ai musi thaitoomana si do na muki gania. Kamaroa moro talaana kuu la ana titiu na nau kwai kuu ania, mado moro talaana sa keki babataesi kamaroa ana babataesi la na keki babataesi nau ania? Keko soree isana, Mere talaana boo.

²³ Ma nia ka soree isadaroa, Toto moki kuu boo ana titiu nau, ma babataesi la na keki babataesi nau ania toto keki babataesi kamaroa ania: ma ono la ibali aba aola nau, bia ibali aba mauli nau, do nau e ai fasi kwai falea, do ifana toa na Maka nau e thauwai nia si kula eri maakwalida.

²⁴ Ma si maṉa na akwala eri kera roṉoa, keka rakeaṉoṉo uria ro wai doorana eki.

²⁵ Ma tha Jesus e ailida isana, ka sorea, Mulu thaitoomana wane inoto ana Jenetaele ki keki thasi naunau uria toa eki, ma wane baita kera ki keki oroa toa eki.

²⁶ Sui ka ai si una eri ani kamulua: ma ni tei bana ne thathamia kai baita ani kamulua, nia wane na kai ra ifamulua;

²⁷ Ma ni tei bana ne thathamia kai tatha inaomulua, nia na wane ni ra kamulua:

²⁸ Ka ’uria boo Kaluwane imole ne ai si fula fasi keki ra iana e ai, e fula uria ra la ifana imole, ma fale lana maṉona ana tae la faisia toa oro.

²⁹ Ma si maṉa na keki lae kau faisia Jeriko, malului wane baita e lae iburiana.

³⁰ Sui rikia fasi, ro nonii wane maade rodo keki ono i ninimana tale, ma si maṉa na kero roṉoa tha Jesus kai tatha, keka ’ai, keko una eri, Oki tatakomi kamarea, Lord, oe kaluwane tha Defeta.

³¹ Ma malului wane eri ka soredaroa, fasi keko bona: ma keko bii ’ai faamau, keko una eri, Oki tatakomi kamarea, Lord, oe kaluwane tha Defeta.

³² Ma tha Jesus e takwe ṉado, ka ailidaroa, ma ka sorea, Si ta na moro thathamia kwai ilia ani kamaroa?

³³ Keko soree isana, Lord, mere thathamia maamarea kai laa.

³⁴ Mania tha Jesus e tatakomidaroa, ka suana maadaroa: ma si maṉa eri u boo keko lio, ma keko lae iburiana.