Mathui 2 - Ṉa Alaofua Falu 1923 1949

¹ Ana si maṉa na tha Jesus e futa i Bethelihemo, fanua i Judia, maṉa tha Heroda e kiṉa, rikia fasi, wane na liode too ki kera too mai ibali tae lana thato keka lae mai uri Jerusalema,

² Keka una eri, Nifenia wane ne futa Kiṉa Ju ki? uria na mili rikia fa bubulu nia ibali tae lana thato, ma mika lae mai fasi miki faabaita nia.

³ Ma si maṉa na tha Heroda ṉa kiṉa eri e roṉoa, nia ka isi fufuli, ma toa nai Jerusalema sui boo bi nia.

⁴ Me ofua wane inoto ni foa ki sui bana bia wane ni kekeda la ki ana toa eri, nia ka soetooda uria si kula na Christ ba sa kai futa iei.

⁵ Ma keka soree isana, I Bethelihemo, fanua i Judia: sulia fasi na porofeta e keda, ka una eri,

⁶ Oe Bethelihemo, fanua tha Juda, E ai dodoloa oko faekwa faisia inamaruki tha Juda ki: Sulaania tee wane inoto toto kai lae mai ani oe, Nia wane na kai fono toi kalia toa nau Isirela.

⁷ Sui tha Heroda ka aili thaufuni ana toa eki liode too, ma ka soefifirisia anida uria si maṉa fa bubulu eri e sina fatai.

⁸ Ma nia asuwanida uri Bethelihemo, ma ka sorea, Lae, muka iro taiṉei uria kali wela ba; ma lalae mulu rikia, lae mai, muka faaroṉo nau, fasi kwa lae lau bokau, kwa faabaita nia.

⁹ Ma si maṉa na kera roṉoa naa kiṉa eri, kiku lae nadalua; ma rikia fasi, fa bubulu ba, na kera rikia mai ibali tae lana thato, e lae inaoda, lalae mai ka fula, ka bii noto fafia si kula na kali wela eri ni iei.

¹⁰ Ma si maṉa na kera rikia fa bubulu lo, keka seethathala ana seethathala la baita ka tatha.

¹¹ Ma si maṉa na kera kotho i maafera, keka rikia kali wela eri isana thainana na ni Meri; kera aru iano, keka faabaita nia; ma keka egwea ogogonia kera ki, keka tona falea bada si do ki ifana, ṉa goloda ma do inoto thasune makwa lea ma mura.

¹² Ma uria na tha God e faaroṉo kera ana moosubolea sorea kesi oli isatha Heroda, keka oli uri fanua kera ata tala eeta.

¹³ Ma buriana na kera lae naa, rikia fasi, angel tha Lord e fula fatai isatha Josefa i la moosubolea, ka una eri, Tatae, oko tolea kali wela nei bia thainana, oko thaka uri Ijifita, ma oki to kula eri maasia si maṉa kwai faaroṉo oe ania; uria na tha Heroda toto kai rofea kali wela nei uria thauṉi lana.

¹⁴ Ma nia tatae, ka talaia kali wela eri bia thainana i la rodo, ka lae uri Ijifita;

¹⁵ Ma nia toto i fanua eri toto tha Heroda e mae: fasi keki faamamanea si do na tha Lord e sorea mai ana porofeta, be una eri, Ku ailia mai kaluwane nau faisia i Ijifita.

¹⁶ Ma tha Heroda, si maṉa ne rikia toa ba liode too kera malaoe nia, ka rakeiri faamau, ma ka kwaiasuwai, keka thau teefau ana kala wela ana wela wane ki na kera to i Bethelihemo, bia wela i oli lana fanua eri sui boo, ana wela sulia ro fa ṉali ki bia wela ne ai u ada ta ro fa ṉali, to sulaania si maṉa e soefifirisia ana toa liode too.

¹⁷ Si maṉa eri kera faamamanea si do na tha Jeremaia ṉa porofeta e sorea, be una eri,

¹⁸ Kera roṉoa liṉana si do i Rama, Aṉi la ma tatao la baita, Ni Resela kei eṉisia wela nia ki; Me ai si thathamia sa keka faainamaruki nia, uria na kera ai naa.

¹⁹ Ma lalae tha Heroda ka mae naa, rikia fasi, angel tha Lord e fula fatai isatha Josefa i la moosubolea i Ijifita mai,

²⁰ Ka una eri, Tatae, oko tolea kali wela nei bia thainana, oko lae uri fanua i Isirela: uria na toa na kera rorofe uria maṉona kali wela nei kera mae naa.

²¹ Ma nia tatae, ka tolea kali wela eri bia thainana, ka lae uri fanua i Isirela.

²² Ma sui e roṉoa na tha Akileasi kai inoto i Judia fuliṉana maka nia tha Heroda, nia ka mau ana lae la uria fanua eri; ma uria na tha God e faaroṉoa i la moosubolea, nia ka lae uria si kula nai Galili ki,

²³ Me lalae mai ka ono ṉado i la tee toaa susu kera alaṉia ana Nasaretha: fasi keki faamamanea si do na porofeta ki kera sorea, na nia toto keka alaṉia ana wane i Nasaretha.