Mathui 19 - Ṉa Alaofua Falu 1923 1949

¹ Ma lalae mai si maṉa na tha Jesus e suia si baea eki, nia ka lae nana faisia i Galili, ka fula ana oli lana Judia bali laba i Jodana;

² Ma malului wane baita kera lae iburiana; ma nia ka faamarukida kula eri.

³ Ma Farisi ki kera fula isana, keka ilitoona, keka una eri, Kera alamatania wane kai arasia kwaina fafia si do ki sui bana?

⁴ Ma nia luuda, ka soree isada, E ai musi teemai nia, na nia ne thauwai nia imole inao mai e thauwanida wane ma kini,

⁵ Ma ka sorea, Uria si kula eri wane kai akwasia maka nia ma thainana, kai ofu bia kwaina; ma keroa tee see imole naa?

⁶ Fasi keroa e ai lau ta ro ai neri, keroa tee see imole boo. Mania si do na tha God e ladoa, ada imole ka lubea lau.

⁷ Keka soree isana, Sui uria ta na tha Mosesi ka sorea keki falea ṉa ree do ni arasi lana, ma keka arasia kini eri?

⁸ Nia ka soree isada, Tha Mosesi sulaania sadi lana ruruumulua ka alamatai kamulua muka arasia kwaimulua: sui ta, too mai inao e ai si una eri.

⁹ Ma nau ku soree isamulua, Ni tei bana na kai arasia kwaina, fafia do eeta ni bana ṉa oe la e ai, sui ka tolea lau ta ai, nia kai oe: ma wane na kai tolea ai eri na kera arasia kai oe.

¹⁰ Toa ne toleda keka soree isana, Mada sa kai una eri ana wane sulia kwaina, e ai si lea na keki tolekini.

¹¹ Ma nia ka soree isada, Toa ni sui sa keki ṉalia si ṉata eri e ai, talitoona boo toa na kera falea ifada.

¹² Uria na aufasu ki keki to bada, na kera aufasu u bomai asi maṉa na kera futa mai rakena thainada: ma tei wane keki to bada, na imole e faaaufasu kera: ma tei wane keki to bada, na kera to faisia kini inunufana tooa i thalo. Wane ne thaitoomana ṉali lana kei ṉalia ana.

¹³ Sui kera talaia mai kala wela isana, fasi nia ka alua abana fafida, ma ka foa: ma toa ne toleda keka soreda.

¹⁴ Ma tha Jesus ka sorea, Alamatania kala wela keka lae mai isaku, ma musi lufida: uria na toa na kera ’urida kera ni ana tooa i thalo.

¹⁵ Ma nia alua abana fafida, sui ka lae faisia kula eri.

¹⁶ Ma rikia fasi, tee wane e lae mai ma ka soree isana, Wane ni kwaifamanatai ae, oe na abula lamu e lea, ta si ta ne lea kwai ilia, fasi kwai rikia marukia tatha?

¹⁷ Ma nia ka soree isana, Uria ta noko alaṉi nau so ku abula lea? Tee Do boo ne lea, tha God neri: sui mada so thathamii fulatoona marukia, oki ade sulia si ṉata fifi ba ki:

¹⁸ Nia ka soree isana, Si ṉata fifi ta ki? Ma tha Jesus ka sorea, Osi thathau wane, Osi oee, Osi bibili Osi lolole fafia ta imole,

¹⁹ Fare baita ana maka oe ma thainamu: ma, Oki liothau ana wane oe ’uria oki liothau ani oe i talaamu.

²⁰ Wane bii baita eri ka soree isana, Si do eki sui bana ku adede sulia ita na ku faekwa: si ta ne ai u faisi nau?

²¹ Tha Jesus ka soree isana, Mada so thathamia oki lea bonaa, lae, oki usi asi do no rikidaki, ma oki fale ana toa na kesi rikii do, ma toto oki rikia ogogonia i thalo: ma lae mai, oki lae iburiaku.

²² Ma si maṉa na wane bii baita eri e roṉoa si ṉata eri, nia ka lae ana liodila: uria nia rikia do oro.

²³ Sui tha Jesus ka soree isana toa nia ne toleda, Mamana ku soree isamulua, E afetai sa ta wane ne rikii do kai kotho ana tooa i thalo.

²⁴ Ma sui lau ku soree isamulua, E sukani afetai ana kamela kai tatha i maana ogila, me afetai faamau ana wane ne rikii do kai kotho ana tooa tha God.

²⁵ Si maṉa na toa ne toleda kera roṉoa, keka kwele faamau, keka una eri, Ni tei fetei keki faamarukia?

²⁶ Ma tha Jesus e lio uri kera, ka soree isada, Si kula eri imole si talaana; ma tha God e talaana si do ki sui bana.

²⁷ Sui tha Pita e luua, ka soree isana, Rikia fasi, kamilia mili akwasia si do ki sui bana, ma mika lae iburiamu; mania si ta na toto mika rikia?

²⁸ Ma tha Jesus ka soree isada, Mamana ku soree isamulua, na toa na mulu lae iburiaku, ana futa falu la asi maṉa na Kaluwane imole kai ono ana do ni ono la nia ana inotoa, kamulua lau boo muka ono ana tafulu fa do ni ono la ma ro fa do, muki wane ni kotu ki ana tafulu kulee toa ma ro kulee toa Isirela.

²⁹ Ma ni tei ne akwasia maafera ki, mado doorana kera, mado waiwaena nia ki, mado maka nia, mado thainana, mado wela ki, mado oole ki, inunufana thataku, toto kai ṉalia tee taleṉee do fuliṉana do ne akwasidaki, ma kai fulatoona marukia tatha.

³⁰ Ma sui toa oro na kera tatha inao toto keki aru buri; ma toa na kera aru buri toto keki tatha inao.