Mathui 18 - Ṉa Alaofua Falu 1923 1949

¹ Ana kadee maṉa eri toa ne toleda kera fula isatha Jesus, keka una eri, Ma ni tei ne baita ka tatha i tooa i thalo?

² Ma tha Jesus e ailia mai tee kali wela, ka alua i maalutadalua,

³ Ma ka sorea, Mamana ku soree isamulua, Mada sa e ai musi akele, fasi muki ’uria naa kala wela, e ai dodoloa muki kotho ana tooa i thalo.

⁴ Mania ni tei bana na kai abula seseka ’uria kali wela nei, wane eri boo e baita ka tatha i tooa i thalo.

⁵ Ma ni tei bana na kai thathagonia ta kali wela ana wela unei ana thataku kai thathagoni nau:

⁶ Ma ni tei bana na kai faataofai nia tee wela ana kala wela nei ki na keki fitooku, e lea ana wane eri keka tarufai nia ta gwa fau baita ni maga lana uiti i luana, ma keka thuthumatania i la initoona amali.

⁷ Taa la kai thauṉia fanua nei iano sulaania si do ni faataofai la ki! uria na kera to’oa u boo sa si do ni faataofai la ki kai fula; sui taa la kai thauṉia wane eri na si do eki kai fula sulaania!

⁸ Mania mada sa abamu mado aaemu kai faataofai oe, oki kwaia, ma oki u ania faisi oe: do e lea iamu oki kotho ana marukia fafia aba mu mado ae kodo, e ai si lea na amua ta ro aba mado ta ro ae ma keki u ani oe i la era na kai to tatha.

⁹ Bia mada sa tee bali maa oe kai faataofai oe, oki lafua, ma oki u ania faisi oe: do e lea iamu oki kotho ana marukia fafia ta tee maa, e ai si lea na amua ta ro maa ma keki u ani oe i la hell ana era.

¹⁰ Muki lio ada muka fare faekwa ana ta wela ana kali wela nei ki; uria ku soree isamulua, I thalo lo angel kera ki keki rikia ṉado maana Maka nau ne ni mei thalo.

¹¹ Uria na Kaluwane imole e fula uria faamaruki lana do ne garo.

¹² Nifenia manatamulua? so ta wane ana ta taleṉee sifi, ma tee do iada ka garo, nia si ekwa ana sikwa tafulu sifi ma sikwa sifi eki, me ai si lae i la tolo, fasi kai rofea do ne garo?

¹³ Ma nia so e fulatoona, mamana ku soree isamulua, nia ka seethathala fafia ka tatha ana ṉa sikwa tafulu do ma sikwa do ba ki na kesi garo.

¹⁴ Una eri lau boo, Maka kamulua nene ni mei thalo e ai si thathamia so ta wela ana kala wela nei ki kai mae.

¹⁵ Ma mada sa dooramu e abula taa iamu, lae, oki faaroṉo ana garo la nia asi maṉa na tee kamaroa boo: mada sa nia roṉoa ṉata lamu, dooramu do e ade naa sulia manatamu neri.

¹⁶ Ma sui mada se ai si roṉoa ṉata lamu, oki talaia lau ta wane mado ta ro wane, fasi toto si baea eki sui bana kai ṉado ana fokona ro wane mado ta ulu wane na keki faamamanea.

¹⁷ Sui mada sa nia lalakwee roṉoa ṉata lada, oki faaroṉoa ana figua: sui mada sa nia lalakwee roṉoa lau boo ṉata lana figua eri, oki riki nia ka ’uria bana Jenetaele ma wane na ka ṉalia takisi ki.

¹⁸ Mamana ku soree isamulua, Atona bana si do ki na muki kania i fanua nei iano keki kania i thalo: ma atona bana si do ki na muki lukea i fanua nei iano keki lukea i thalo.

¹⁹ Sui lau boo ku soree isamulua, Mada sa ta ro wane iamulua i fanua nei iano keko ala fafia ta si do sa keko gania, Maka nau ne ni mei thalo kai ilia boo ifadaroa.

²⁰ Uria na si kula na ta ro imole mado ta ulu ei keki figu ana thataku, kula eri ku ni maalutada.

²¹ Sui tha Pita e fula isana ka sorea, Lord, fita si maṉa dooraku kei abula taa ani nau ma kwai manata lube nia? kai fula ana fiu si maṉa?

²² Tha Jesus ka soree isana, Nau kwasi soree isamu, Kai fula ana fiu fa manata lube la ki, e ai; Kai fula ana fiu tafulu fiu fa manata lube la.

²³ Mania kera toolaṉania tooa i thalo ka ’uria tee kiṉa, ne thathamia kai ṉata isana toa ni ra nia ki sulia si do na kera ṉali laṉa ani nia.

²⁴ Ma si maṉa na nia thafalia kai teemai, keka talaia mai tee wane isana ne ṉali laṉa ana molee taleda.

²⁵ Sui uria ne ai ana ta do fasi kai duua, wane inoto nia e sorea keki usi ani nia, bia kwaina, ma wela nia ki, ma si do ki sui bana ne aludaki, ma keki falea duu lana do nia ki.

²⁶ Mania wane ni ra eri e aru iano, ka faabaita nia, ma ka una eri, Lord, osi rakeiri fofoa uri nau, ma nau kwai duu teefau ania ifamu.

²⁷ Sui wane eri ne inoto ana wane ni ra eri, uria ne tatakomia, ka lukea ka lae, ma ka manata lubea naa ṉalilaṉa eri.

²⁸ Sui wane ni ra eri e lae i maa, ka fulatoona tee wane ana wane na keka ra ofu, ne ṉali laṉa ana tee taleṉee peni ani nia: ma nia aba nia, ka raua aena luana, ma ka una eri, Duua si do no ṉali, laṉa ania.

²⁹ Mania wane eri na kero ra ofu e aru iano isana aaena ma ka ṉata kwaitakoi isana, ka una eri, Osi rakeiri fofoa uri nau, ma nau kwai duu teefau ania ifamu.

³⁰ Ma nia lalakwa: me lae kai suia uri la lokafu, fasi kai duua ṉalilaṉa eri, sui ka bii kotho i maa.

³¹ Mania si maṉa na toa na keki ra ofu kera rikia si do kera ilia, liode dila kai tatha, ma kera fula, keka faaroṉoa wane inoto kera asi do eki sui bana na kera ilia.

³² Sui wane inoto nia ka aili nia isana, ka soree isana, Wane ni ra no taa, nau ku manata lube oe ana ṉalilaṉa ba sui boo, uria no ṉata kwaitakoi isaku na ba:

³³ Ni oe soko tatakomia lau boo wane ba moro ra ofu, ’uria lau boo ku tatakomi oe na ba?

³⁴ Ma wane inoto nia ka rakeiri, ma ka fale nia ifana toa keki kwae fifi, fasi nia kai duu teefau ana ṉalilaṉa eri ma ka bii sui.

³⁵ Una eri lau boo Maka nau ne ni mei thalo kai ilia iamulua, mada sa ni kamulua sui musi manata lubea dooramiu ki i ruruumulua ki mai.