Mathui 17 - Ṉa Alaofua Falu 1923 1949

¹ Ma buriana ona fa boṉi tha Jesus e talaia tha Pita ma tha Jemesi, bia doorana na tha Jone bi nia, ka talaida tee kera uria tee gwa tolo ne fane da ia:

² Ma nia seena ka tatala isada: ma maana ka sinasina mala thato, ma tooni nia ki ka kwakwaoa mala lalaa la.

³ Ma rikia fasi, tha Mosesi ma tha Elaeja kero fula fatai isada, keko ṉata bi nia.

⁴ Sui tha Pita e luua, ka soree isatha Jesus, Lord, e lea iakulua kuki to kunei: mada so thathamia, miki kasia ulu ooba kunei; ta do ifamu, ta do ifatha Mosesi, ma ta do ifatha Elaeja.

⁵ Si maṉa na nia kai ṉata u bana, rikia fasi, si datha iriroa ka nunufida: ma rikia fasi, liṉana si ṉata la e too mai la datha eri, ka una eri, Kaluwane liliothaua nau fu nia, e lea iaku uri nia; muki roṉoa ṉata lana.

⁶ Ma si maṉa na toa ne toleda kera roṉoa, keka aru fafia maada, ma keka mau taa.

⁷ Ma tha Jesus e fula, ka suada ma ka sorea, Tatae, ma musi mamau.

⁸ Ma kera tafoa maada ia, ma kesi rikia lau ta wane, tee tha Jesus boo.

⁹ Ma si maṉa na kera sifo mai faisia gwa tolo eri, tha Jesus e faaroṉo kera, ka una eri, Musi faaroṉo asi do na mulu rikia isata wane, ka maasia si maṉa na Kaluwane imole e tatae naa faisia toa mae ki.

¹⁰ Ma toa nia ne toleda kera soetoona, keka una eri, Ma sui uria ta na wane ni kekeda ki keki sorea tha Elaeja kai fula totonao e ai si ei boo?

¹¹ Ma tha Jesus e luuda, ka sorea, Tha Elaeja kai fula mamana boo, ma kai alu lea lau asi do ki sui bana:

¹² Ma nau ku soree isamulua, Tha Elaeja e fula sui naa, sui e ai kesi thaitoomana, ma kera ilia atona bana si do na manatade toea ani nia. Una eri lau boo keki ilia do taa ana Kaluwane imole.

¹³ Sui toa ne toleda keka thaitoomana na nia e ṉata sulia wane ni babataesi eri na tha Jone isada.

¹⁴ Ma si maṉa na kera fula isana malului wane, tee wane e fula isana, ka boururu isana, ma ka una eri,

¹⁵ Lord, oki tatakomia kaluwane nau: na futamae ka thauṉi nia, ma nia to ana taa la baita: uria na si maṉa oro ni bana nia ka asi nia i la era, ma si maṉa oro ni bana i la kafo.

¹⁶ Ma nau ku talaia mai isana toa oe noki toleda, ma keka dora ana faamaruki lana.

¹⁷ Ma tha Jesus e luua, ka sorea, Kamulua unii wane na musi fitoo ma muki lae eeta, ta fita fa boṉi lau kwai to isamulua? ta fita fa boṉi lau kwai doanita iamulua? talaia mai kunei isaku.

¹⁸ Ma tha Jesus e sorea spirit taa eri; ma nia ka lae faisi nia: ma wela eri ka maruki too ana kadee maṉa eri.

¹⁹ Sui toa ne toleda kera fula isatha Jesus tee kera, kera sorea, Uria ta na misi talaana arasi lana?

²⁰ Ma tha Jesus ka soree isada, Sulaania fitala la kamulua: uria mamana ku soree isamulua, Mada sa amulua fitooa ’uria ta foee masitata, do muki soree isana gwa tolo nei, Lae faisia kula nei, oki lae uria kula loko; nia kai lae neri; ma toto ka ai boo ta si do na musi talaana ili lana.

²¹ Una ena mena, si do unei kai lae kau ana talitoona boo foa la bia abu la ana faṉa.

²² Ma si maṉa na kilu to i Galili, tha Jesus e soree isada, Kaluwane imole toto keki falea i abana imole;

²³ Ma toto keki thauṉia, ma keka tataea lau ana ula fa boṉi. Ma lioda ka dila ka tatha.

²⁴ Ma si maṉa na kera fula i Kapaneama, toa na keka ṉalia malefo ba keka fula isatha Pita, keka sorea, Wane ni kwaifamanatai oe kai falea malefo ba?

²⁵ Nia ka sorea, Iu. Ma si maṉa nia fula i la biu, tha Jesus ka ṉata inao isana, ka una eri, Nifenia manatamu, Saimona? kiṉa ana fanua nei iano ki, ni tei kera na keki ṉalia tei do ana do kera ki ma takisi ki anida? kaluwane kera ki, mado toa eeta ki?

²⁶ Tha Pita ka soree isana, Ana toa eeta ki. Tha Jesus ka soree isana, Mania kaluwane ki seeda ka laa neri.

²⁷ Ma sui, ada koki faataofai kera bakoroa, oki lae uri amali, oki arua finau, ma ia noko sulea totonao oki ṉalia; ma buriana no fofoea naa fokona, do oki rikia tee malefo: ṉalia, oko falea ifada, malefo thatakoroa neri.