Mathui 15 - Ṉa Alaofua Falu 1923 1949

¹ Sui wane ni kekeda ki bia Farisi ki kera toto mai Jerusalema keka lae mai isatha Jesus, keka una eri,

² Uria ta na toa oe noki toleda keki ade eeta faisia ṉata lana ulunao ki? uria na kesi taua abada maṉa keki ania berede.

³ Ma nia luuda, ka soree isada, Uria ta ni kamulua muki ade eeta lau boo faisia si ṉata fifi tha God ana ṉata lana toa kamulua inao?

⁴ Uria na tha God e sorea, Fare baita ana maka oe ma thainamu: bia, Wane na kai ṉata taa seena maka nia mado thainana, nia kai mae ana maea ba.

⁵ Ma ni kamulua muki sorea, Ni tei bana na kai soree isana maka nia mado thainana, Si do ba soki ṉalia ani nau uria adomi lamu kera falea naa ifatha God;

⁶ Nia kei ei si fare baita ana maka nia mado thainana. Ma mulu ufolo ana bae lana tha God ana ṉata lana toa kamulua inao.

⁷ Kamulua ṉa toa muki olodola, si do na tha Aisaia ṉa porofeta e sorea suli kamulua na ba e too, be una eri,

⁸ Toa nai keki fare baita iaku ana ṉiduda bana; Ma ruruude ni da faisi nau.

⁹ Keki tona faabaita nau, Keki to’oa si ṉata fifi imole ana kwaifamanatai la kera ki.

¹⁰ Ma nia ailia mai malului wane eri isana, ma ka soree isada, Muki roṉoa, ma muki thaitoomana:

¹¹ Si do na kai liu i la fokona e ai na kai faasua wane; si do na kai tatha mai faisia fokona, si do eri kai faasua wane.

¹² Sui toa ne toleda kera fula, keka soree isana, O thaitoomana Farisi ki kera taofai kera, si maṉa na kera roṉoa si ṉata eri?

¹³ Ma nia luuda, ka sorea, ’Ai eri sui bana na Maka nau ne ni mei thalo e ai si fasia, keki lafu laulau ania.

¹⁴ Keki to ada: kera ṉa toa maade rodo na keki tatha inaona toa maade rodo. Mada sa wane maane rodo kai tatha inaona wane maane rodo, keroa sui boo keko aru i la kilu.

¹⁵ Sui tha Pita e luua, ka soree isana, Inifita tarifula eri isamilia.

¹⁶ Ma tha Jesus ka sorea, Kamulua lau boo si maṉa eri mena manatamulua si too u?

¹⁷ Musi thaitoomana na ṉa atona bana si do na kai liu i la fokoe wane kai tatha uri la rakena, ma keka naṉa ania i masuu?

¹⁸ Ma si do eki na kai lae mai faisia fokoe wane kai lae mai faisia ruruuna; ma kai faasua wane.

¹⁹ Sulaania si lio taa ki kai lae mai faisia ruruuna wane, thauwanea, oe la, oe la toa keki oe fafia kwaida, bili la ki, lole la fafia imole, ṉata taa la seena imole:

²⁰ Si do eki neri na kai faasua wane: ma faṉa la ana aba kesi taua e ai si faasua wane.

²¹ Ma tha Jesus e lae faisia kula eri, ma ka lae nana uri fanua ne to kakali ki mai i Taera ma i Saedona.

²² Ma rikia fasi, tee kini Kenana toto mai oli lana fanua eri ka lae mai, ka ’ai, ka una eri, Oki tatakomi nau, Lord ae, oe kaluwane tha Defeta; thari nau spirit taa e thaumalawela.

²³ Ma nia e ai si luu nia ana ta si baea. Ma toa nia ne toleda kera fula, keka ṉata kwaitakoi isana, keka una eri, Arasi nia kau; uria nia kei ’ei buriakulua.

²⁴ Ma nia luuda, ka sorea, Kesi arasi nau mai isana toa eeta e ai, sifi ne garo ana toa tha Isirela kera arasi nau mai isada.

²⁵ Sui kini eri e lae mai ka faabaita nia, ka una eri, Lord, oki adomi nau.

²⁶ Ma nia luua, ka sorea, E ai si lea keki ṉalia berede wela ki, keki u ania ifana kui ki.

²⁷ Ma nia ka sorea, Iu, Lord: uria na kui ki mena keki ania nanafui do na kai thada faisia tatafe wane na kai thareda.

²⁸ Ma tha Jesus e luua, ka soree isana, Kini ena ae, fitooa oe e baita: keki ilia ifamu sulaania thathami la o thathamia. Ma thari nia ka maruki too ana kadee maṉa eri.

²⁹ Ma tha Jesus e lae faisia kula eri, ma ka lae mai karaṉia amali i Galili; ma nia tae uri tolo, ka ono i kula eri.

³⁰ Ma malului wane baita ki kera fula isana, keka tolea mai toa aede katu, toa maade rodo, fokoato ki, toa abade oela, bia toa oro ki lau, ma kera aluda isana aaena; ma nia ka faamarukida:

³¹ Adedea malului wane eri ka kwele, si maṉa kera rikia fokoato ki keki bae, toa abade oela abada ka lea lau bana, toa aede katu keki lae, toa maade rodo keki lio naa: ma keka taṉoa God Isirela.

³² Sui tha Jesus e ailia toa nia ne toleda isana, ka sorea, Nau ku tatakomia malului wane nei, uria na kera to bi nau sulia ulu fa boṉi ki naa ma ka ai ada ta do ni ania: ma nau ku lalakwee arasida maṉa kesi faṉa, ada mado e ai keka feda sula tale.

³³ Ma toa ne toleda kera soree isana, Kula ifei na kuka rikia bisikete ki la fanua kwasi; na kai talaana malului wane baita unei keka ania, keka abusu?

³⁴ Ma tha Jesus ka soree isada, Ta fita bisikete mulu alua? Ma kera sorea, Fiu fa do, bia ṉada gwa ia faekwa ki.

³⁵ Ma nia ka faaroṉoa malului wane eri keki ono iano;

³⁶ Ma nia ṉalia fiu bisikete eki bia ia eki; e sore lea ma ka oea, sui ka falea ifana toa ne toleda, ma toa ne toleda keka falea ifana malului wane eki.

³⁷ Ma kera sui boo kera faṉa, keka abusu: ma kera gwea oretana faṉa ne teo, fiu ita ka fuṉu.

³⁸ Ma toa na kera faṉa adalua fai tooni wane, kini ma wela ki ka safuda.

³⁹ Ma nia arasia malului wane eki, ma ka tae i la foorua, ka lae mai uri oli lana i Magadala.