Mathui 14 - Ṉa Alaofua Falu 1923 1949

¹ Asi maṉa eri tha Heroda ṉa kiṉa e roṉoa talo lana tha Jesus,

² Ma ka soree isana toa ni ra nia ki, Wane ni babataesi ba na tha Jone neri; o tatae naa faisia toa mae ki; mania do sukwai eki ka ra ani nia.

³ Uria na tha Heroda e raua tha Jone, ka kania, ma ka alua i la lokafu fafia ni Herodiasi, kwaina doorana na tha Filifi.

⁴ Uria na tha Jone e soree isana, E ai kesi alamatania kini nei kai to isamu.

⁵ Ma si maṉa nia sa kai thauṉia, nia ka mau ana malului wane eri, sulia na kera sorea nia ṉa porofeta.

⁶ Ma si maṉa na fa boṉi na kera tharea tha Heroda ania e fula, thari ni Herodiasi e wae maalutada, ma tha Heroda ka lea iana.

⁷ Fasi nia kai alaṉai ana othi la neri, sorea kai falea atona bana si do thari eri kai gania.

⁸ Ma thari eri, uria na thainana e kwaitareṉai isana, ka sorea, Falea mai gwauna wane ni babataesi ba na tha Jone isaku kunei i la ta labeṉa.

⁹ Ma kiṉa eri liona ka dila; sui sulaania othi la nia ki, ma sulaania toa na kera teoreri sana fafaṉa eri bi nia, nia ka soree keki falea;

¹⁰ Ma nia kwaiarasi, keka sigilia gwau tha Jone i la lokafu.

¹¹ Ma kera ṉalia mai gwauna i la labeṉa, keka falea ifana thari eri: ma nia ka ṉalia isana thainana.

¹² Ma toa nia ne toleda kera fula, keka ṉalia buta eri, keka kwaiṉei nia; sui kera lae, keka faaroṉoa tha Jesus.

¹³ Si maṉa na tha Jesus e roṉoa, nia ka lae nana i la foorua faisia toa oro i kula eri, uria tee fanua kwasi: ma lalae malului wane eki kera roṉoa, keka lae tala thara iburiana faisia toaa susu ki.

¹⁴ Ma tha Jesus e lae mai, ka rikia malului wane baita, ma nia tatakomida, ma ka faamarukia toa iada na kera matai.

¹⁵ Ma toto e thaulafia naa, toa ne toleda kera fula isana, keka una eri, Fanua kwasi nania, ma thato e lio folo naa; arasia kau malului wane nei ki, fasi keki lae uri toaa faekwa ki, keki usia ada tei faṉa.

¹⁶ Ma tha Jesus ka soree isada, E ai ta si do si oga kera fasi keka lae uria; kamulua muki fale iada.

¹⁷ Ma keki soree isana, Kamilia talitoona lima fa bisikete ma ro gwa ia mili alua kunei.

¹⁸ Ma nia ka sorea, Ṉalia mai kunei isaku.

¹⁹ Ma nia faaroṉoa malului wane eki keki teoreri la loua; ma nia ka ṉalia lima bisikete eki, bia ro gwa ia eki, ma ka lio alaa uri thalo, ka foa uria fufuṉu, sui ka oea ma ka falea ifana toa ne toleda, ma toa ne toleda keka falea ifana malului wane eki.

²⁰ Ma kera sui boo kera faṉa, keka abusu: ma kera gwea oretana faṉa eri ne teo, tee tafulu nanado ma ro nanado ka fuṉu.

²¹ Ma toa na kera faṉa fuliṉana lima tooni wane, kini ma wela ki ka safuda.

²² Ma si maṉa eri u boo tha Jesus ka suuwai nia toa ne toleda keki tae i la foorua, keka lae inao uri bali laba, si maṉa nia kai arasia malului wane eki.

²³ Ma buriana ne arasia malului wane eki, nia tae uri tolo tee nia fasi kai foa: me thaulafia naa, nia to kula eri talitoona.

²⁴ Ma foorua eri ka ni nei initoona matakwa; lua ka naṉasi olili ania, uria na thauthau e maṉo mai inaofada.

²⁵ Ma karaṉia thathala ana dani tha Jesus e lae mai isada, kai talau fafona amali.

²⁶ Ma si maṉa na toa ne toleda kera riki nia kai talau fafona amali, keka mau, ma keka una eri, Ṉa spirit nania; ma keka gagafu, uria na kera mau.

²⁷ Ma si maṉa eri u boo tha Jesus e ṉata isada, ka una eri, Kai lea i manatamulua; ni nau bana nania; musi mamau.

²⁸ Ma tha Pita e luua, ka sorea, Lord, mada sa ni oe nena, oki sorea kwai lae kau isamu fafona amali.

²⁹ Ma nia ka sorea, Lae mai. Ma tha Pita ka sifo faisia foorua, ma ka talau fafona amali, kai lae isatha Jesus.

³⁰ Ma si maṉa nia rikia thauthau eri e baita, kai mau neri; ma si maṉa kai bii thuthu, nia ka ’ai kau, ka una eri, Lord, oko faamaruki nau.

³¹ Ma si maṉa eri u boo tha Jesus e tekwasia kau abana, ka rau ani nia, ma ka soree isana, Wane fitooa oe e faekwa, o fitala uria ta?

³² Ma si maṉa na kero tae i la foorua, thauthau eri ka ai naa.

³³ Ma toa na kera ni la foorua eri keka faabaita nia, keka una eri, Oe Kaluwane tha God mamana boo.

³⁴ Ma lalae kau kera fula i bali laba, keka fula i thara i Genesarete.

³⁵ Ma si maṉa na wane na fanua eri kera riki nia keka thaitoomana, keka kwaiasuwai uria si kula eki sui bana ne to kakalia fanua eri, ma keka talaia mai toa na kera matai isana;

³⁶ Ma kera ṉata kwaitakoi isana fasi mado e ai keka suana talitoona tagwarana tooni nia ni bana: ma toa eki na kera sua nia kera maruki.