Mathui 13 - Ṉa Alaofua Falu 1923 1949

¹ Afa boṉi eri tha Jesus o lae kau faisia biu, ka ono ana sula amali.

² Ma malului wane baita ka figu naa isana, adedea nia ka tae i la foorua, ka ono; ma malului wane eri sui bana keki takwe i thara.

³ Ma nia sorea do oro ki isada ana tarifula ki, ka una ori, Rikia fasi, wane ni afusi lana foee do ki e lae kai afusia foee do ki;

⁴ Ma si maṉa nia kai afusia, tei fo e asia i ninimana tale, ma thaaro ki kera lofo mai, keka ania:

⁵ Ma tei fo lau ka asia fafona si kula ne faula, kula e ai bana ta si gano si oro iei: me ai si tau bana ka tae, uria na gano eri e ai si buloa:

⁶ Sui thato e tae mai, ka thatofia; ma uria laila e ai si sifo, ka dele bonaa.

⁷ Ma tei fo lau ka asia fafona kwarafifi ki; ma kwarafifi eki ka tae, ma ka tae suusia:

⁸ Ma tei fo lau ka asia fafona gano lea, ma ka fuṉu, tei ei ka fuṉu ana taleṉee do, tei ei ka fuṉu ana ono finitee do, ma tei ei ka fuṉu ana ulu finitee do, fuliṉana do na kera fasidaki.

⁹ Wane ana ta ro aliṉa uria roṉo la, nia kai roṉoi fasi.

¹⁰ Ma toa ne toleda kera fula, keka soree isana, Uria ta noko ṉata isada ana tarifula ki?

¹¹ Nia luuda, ka soree isada, Kamulua kera alamatai kamulua muki thaitoomana si do eki ne to thaufuni ana tooa i thalo, ma ni kera e ai kesi alamatania ifada.

¹² Uria ni tei bana na kai rikii do, nia na keki fale iana, ma do nia ki kai oro ka tatha: ma ni tei bana ne ai si rikii do, si do nia rikia mena keka ṉalia faisi nia.

¹³ Mania ku ṉata isada ana tarifula ki; sulia na keki lio, ma sui kesi rikia ta si do, ma keki roṉoi, sui kesi roṉoa ta si do, ma kesi thaitoomana i manatada.

¹⁴ Ma kera faamamanea ṉata lana tha Aisaia ṉa porofeta ani kera, be una eri, Ana roṉo la muki roṉoi, me ai dodoloa muki thaitoomana; Ma lio la muki lio, me ai dodoloa muki rikia ta si do:

¹⁵ Uria na ruruuna toa nai ka raraṉaa naa, Ma kera roṉo fafusi bada ana aliṉada, Bia keka maaafu; Ada mado e ai keka lio ana maada, Ma keka roṉoi ana aliṉada, Ma keka thaitoomana ana ruruuda, Ma keka, akele iburi, Fasi kwa faamarukida.

¹⁶ Maamulua molo e lea iada, uria na muki lio ania; ma aliṉamulua e lea iada, uria na muki roṉoi ania.

¹⁷ Uria ne mamana ku soree isamulua, Na porofeta oro ki bia wane kokoto ki kera thathamii rikia si do na muki rikidaki, ma kesi rikia; ma kera thathamii roṉoa si do na muki roṉodaki, ma kesi roṉoa.

¹⁸ Mania muki roṉoa tarifula sulia wane eri ne afusia foee do ki.

¹⁹ Si maṉa na wane kai roṉoa si baea ana ṉa tooa, ma ka ai si thaitoomana maalutana, tha Taa kai lae mai, ma ka laua kau si do na kera afusia i la ruruuna. Nia neri na kera afusia i ninimana tale.

²⁰ Ma wane na kera afusia fafona si kula ne faula, nia nania na kai roṉoasi baea eri, ma ka ṉalia si maṉa eri u boo ana seethathala la;

²¹ Ma sui e ai ana ta lalii do ani nia, kai to si tau bana; ma lalae ṉa fualaṉa mado tona ilamatai la e fula mai inunufana si baea eri, si maṉa eri u boo nia kai taofai nia.

²² Ma wane na kera afusia maalutana kwarafifi ki, nia nania na kai roṉoa si baea eri; ma manata baita la ana si do kada nei ki, bia kaura lana inotoa ki, kai suusia si baea eri, ma nia ka ai si fuṉu.

²³ Ma wane na kera afusia fafona gano ne lea, nia nania na kai roṉoa si baea eri, ma ka thaitoomana, na kai fuṉu mamana boo, ka fuṉu, tei ei ana taleṉee do, ma tei ei ono finitee do, ma tei ei ulu finitee do, fuliṉana do na kera fasia.

²⁴ Ta tarifula lau nia ka faaroṉo kera ania, ka una eri, Tooa i thalo e ’uria wane ne afusia foee do lea ki la ra nia:

²⁵ Ma si maṉa na imole ki keki biṉa ada, maalimae nia e fula, ka afusia si lolo bubula i maalutana uiti, ma ka lae nana.

²⁶ Ma si maṉa na rena e tae mai, ma ka fuṉu, si lolo bubula eri ka maṉo lau boo.

²⁷ Ma toa ni ra wane eri ne gwauwai ana biu kera fula, keka soree isana, Arai ena ae, ta na sa ni oe o afusia foee do lea ki la ra oe na ba, mado? sui nifana ade lana si lolo bubula ka ni iei?

²⁸ Nia ka soree isada, Ta maalimae e ilia si do eri. Toa ni ra eki keka soree isana, Mania o thathamia lae miki kwaleṉania do eki?

²⁹ Ma nia ka sorea, E ai; ada mado e ai maṉa muki kwaleṉania si lolo bubula, muki lafua ṉa uiti bia.

³⁰ Ro do eki ka tae ofu maasia si maṉa na unii do kai rafo naa: ma asi maṉa unii do e rafo kwai soree isana toa na keki ra ana unii do eri ne rafo, Muka kwaleṉania si lolo bubula inao, muki kania ana ifii do ki fasi muka naarea: ma muka kwaleṉania uiti eri uri la biu ni aludo nau.

³¹ Ta tarifula lau nia ka faaroṉo kera ania, ka una eri, Tooa i thalo e ’uria tee foee masitata, na tee wane e ṉalia, ma ka afusia i la ra nia:

³² Si do eri e faekwa asia boo ana foee do ki sui bana; ma sui lalae e tae naa, e baita ka tatha ana kala lolo ni ania ki, ma ka tae alaa ana ’ai baita, ma thaaro i mamatalea ki keka lofo mai, keki liki ana tharana.

³³ Ta tarifula lau nia soree isada; Tooa i thalo e ’uria lefena, na tee kini e ṉalia, ka thaufunia i la ulu mae do ana mila maasia si maṉa ka dola ka sui.

³⁴ Si do eki sui bana tha Jesus e sorea ana tarifula ki isana malului wane eki; me ai si tona ṉata isada, kai tarifula boo asi tarifula:

³⁵ Fasi keki faamamanea si do na porofeta e sorea, be una eri, Kwai ifinia fokoku ana tarifula ki; Kwai sorea si do ne to thaufuni ki ita mai ana boa lana fanua nei iano.

³⁶ Sui tha Jesus e arasia malului wane eki, ma ka lae uri biu: ma toa nia ne toleda kera fula isana, keka una eri, Inifita fasi maalutana tarifula sulia si lolo bubula ba i la ra.

³⁷ Nia luuda, ka soree isada, Wane ne afusia foee do lea ki ṉa Kaluwane imole;

³⁸ Ma ra ba ṉa fanua nei iano; ma foee do lea ba ki, kera ṉa kaluwane tooa ki; ma si lolo bubula ba ṉa kaluwane tha Taa ki;

³⁹ Maalimae ba ne afusida na tha devil: si maṉa ana unii do ba ne rafo ṉa susui lana kada nei; ma toa na kera ra ana unii do ne rafo na ba ṉa angel ki.

⁴⁰ Mania ’uria lau boo si lolo bubula ba kera kwaleṉania ma keka naarea ana era; kai una eri lau boo ana susui lana kada nei.

⁴¹ Kaluwane imole kai arasia kau angel nia ki, ma keki ofua si do ki sui bana faisia tooa nia na kai faataofai, bia toa na keki ilia si do kera lufia.

⁴² Ma keka u anida i la era ne baita ka tatha: si kula ana aṉi la ma didilifo la.

⁴³ Asi maṉa eri toa na kera kokoto keki sinasina mai mala thato ana tooa Maka kera. Wane ana ta ro aliṉa uria roṉo la, kai ronoi fasi.

⁴⁴ Tooa i thalo e ’uria ogogonia ne to thaufuni la ra; na tee wane e rikia, ma ka thaufunia; ma nia seethathala sulia, e lae ka usi teefau ana do ne aludaki, ma ka usia ra eri.

⁴⁵ Sui lau, tooa i thalo e ’uria ta wane ne usia do ana todado la ki, kai rofea pala ki usi lane baita.

⁴⁶ Ma lalae e rikia naa tee pala inoto ka tatha, nia lae, ka usi teefau ana do ne aludaki, ma ka usia.

⁴⁷ Sui lau, tooa i thalo e ’uria furei, na kera ala ania i la amali, ma ka ofua ia dodola:

⁴⁸ Nia, lalae e fuṉu, kera lafua mai uri thara; ma kera ono, keka ofua do lea ki la kwadee do ki, ma do taa ki boo keka u ania.

⁴⁹ Toto kai una eri ana susui lana kada nei: angel ki keki lae mai, keki talisia toa taa faisia toa kokoto,

⁵⁰ Ma keka u anida i la era ne baita ka tatha: si kula ana aṉi la ma didilifo la.

⁵¹ Tha Jesus e soree isada, Kamulua mulu thaitoomana, naa maalutana si do eki sui boo? Keka soree isana, Iu, Lord.

⁵² Ma nia ka soree isada, Mania wane eri ana wane ni kekeda ki na kera tolea ana tooa i thalo e ’uria ta wane gwauwai ana biu, ne ṉalia mai si do falu ki bia do u ki naa ana ogogonia nia.

⁵³ Ma lalae mai buriana na tha Jesus e suia tarifula eki, nia ka lae faisia kula eri.

⁵⁴ Ma lalae mai e fula i fanua nia, nia ka kwaifamanatai la biu ni ofu la kera, adedea keka tona, ma keka sorea, Ifei mai wane nei e ṉalia liotooa nei iei, bia ra baita nei ki?

⁵⁵ Ta na sa kaluwane wane ni thauwaia ba nania, mado? ta na sa thainana thatana na ni Meri, mado? ma doorana kera, na tha Jemesi, ma tha Josefa, ma tha Saimona, ma tha Judasi?

⁵⁶ Ma waiwaena nia ki, ta na sa kera ni sui bada isaka, mado? Ifei mai na wane nei e ṉalia do oro eki iei?

⁵⁷ Ma kera taofai kera ani nia. Ma tha Jesus ka soree isada, Ṉa porofeta faabaita lana e ai si ei faisi nia; fanua nia, ma biu nia ni bana e ai si ni iei.

⁵⁸ Ma nia e ai si ilia tei ra baita oro i kula eri sulaania fitala la kera.