Mathui 12 - Ṉa Alaofua Falu 1923 1949

¹ Asi maṉa eri tha Jesus e lae afa boṉi mamaloa i la oolee aialo; ma toa nia ne toleda keka thaofa, ma keka inia fuṉii aialo, ma keka ania.

² Ma si maṉa na Farisi ki kera rikia, keka soree isana, Rikia fasi, toa oe noki toleda keki ilia si do na kesi alamatania afa boṉi mamaloa.

³ Ma nia ka soree isada, Musi teemainia si do na tha Defeta e ilia na ba, si maṉa nia thaofa, bia toa na kera lae bi nia;

⁴ Be kotho i la biu tha God, ma ka ania berede abu, do e ai kesi alamatania fasi nia bia toa na kera lae bi nia keki ania, do uria talitoona wane ni foa ki?

⁵ Mado musi teemai la lo, na afa boṉi mamaloa wane ni foa ki la biu baita tha God keki faasua fa boṉi eri, ma kesi ade garo?

⁶ Ma nau ku soree isamulua, Tee wane ne baita ka tatha ana biu eri ni kunei.

⁷ Sui mada sa mulu thaitoomana maalutana si kula eri, Ku thathamia tatakomi la, do ni foa la e ai, wane ne ai si ade garo bana sa muka sorea nia abula taa boo e ai.

⁸ Uria na Kaluwane imole e inoto ana fa boṉi mamaloa.

⁹ Ma nia lae kau, ka kotho i la biu ni ofu la kera:

¹⁰ Ma rikia fasi, tee nonii wane na abane mae. Ma kera soetoona, keka una eri, Si do kera alamatania neri faamaruki la afa boṉi mamaloa? fasi keka alaṉi nia ania.

¹¹ Ma nia ka soree isada, Ni tei iamulua, sa nia ana ta tee sifi, mada sa sifi eri aru i la kilu afa boṉi ma maloa, nia si raua mai, si tafoa ia?

¹² Ma imole e lea ka tatha ana sifi! Mania kera alamatania boo ili lana si do lea afa boṉi mamaloa.

¹³ Sui nia ka soree isana wane eri, Tekwasia abamu. Ma nia ka tekwasia; ma abana ka lea lau bana, ’uria ruana aba nia.

¹⁴ Ma Farisi eki kera kotho i maa, keka furiṉata fafi nia, uria si ade la na keki ilia fasi keka thauṉi nia.

¹⁵ Ma si maṉa na tha Jesus e thaitoomana, nia ka lae nana faisia kula eri: ma toa oro kera lae iburiana; ma nia faamarukida ka sui,

¹⁶ Ma ka ṉata fifi isada fasi e ai kesi susufu ani nia:

¹⁷ Fasi si do na tha Aisaia ṉa porofeta e sorea ka mamana, be una eri,

¹⁸ Rikia fasi, wane ni ra nau na nau ku filia; Wane liliothaua nau ne lea i ruruuku uri nia: Kwai alua Spirit nau fafi nia, Ma nia kai faaroṉoa Jenetaele ki ana kotu kokoto.

¹⁹ Nia toto si omereree, ma ka ai si ’ai baita; Ma toto ta wane ka ai si roṉoa liṉana ṉata lana sula tale ki.

²⁰ Ue mememea nia sa ka oea e ai, Ma kwethu ne thasu nia si kwaemaelia, Kai to maasia si maṉa nia kai falea kau kotu kokoto fasi si nia kai tatha.

²¹ Ma Jenetaele ki toto keki manatatoo ṉado uria si do ne lea ana thatana.

²² Sui kera talaia mai tee wane spirit taa ni ani nia isana, maane rodo ma fokona ka ato: ma nia ka faamarukia, adedea fokoato eri ka bae ma ka lio naa.

²³ Ma malului wane eki keka tona, ma keka sorea, Kaluwane tha Defeta nai nia?

²⁴ Ma si maṉa na Farisi ki kera roṉoa, keka sorea, Wane nei e ai si arasia spirit taa ki ata do eeta e ai; kai arasia atha Bielasibaba ne inoto ana spirit taa ki.

²⁵ Ma tha Jesus e thaitoomana manatada, ma ka soree isada, Tooa ni sui bana na keki tala firu bi kera i talaada, keki funu; ma toaa susu ni sui bana mado biui wane na keki tala firu bi kera i talaada, kesi ṉado:

²⁶ Ma mada sa tha Satan kai arasia lau bana tha Satan, nia kai tala firu bi nia; tooa nia kai ṉado ufita?

²⁷ Ma ni nau mada sa kwai arasia spirit taa ki atha Bielasibaba, kaluwane kamulua ki keki arasida ani tei? mania keki wane ni kotu kamulua ki.

²⁸ Ma ni nau mada sa kwai arasia spirit taa ki ana Spirit tha God, tooa tha God e fula naa isamulua.

²⁹ Mado ta wane kai kotho ufita i la biu wane ne sukwai, kai lagua do nia ki, mada se ai si kania wane sukwai eri totonao? fasi nia kei bii lagua biu nia.

³⁰ Wane ne ai si ado bi nau kai firu bi nau; ma wane ne ai si ofudo bi nau kai u tataka.

³¹ Mania ku soree isamulua, Abula taa la ma si baea sui bana ana faretoliṉi lana tha God, keki manata lubea bada imole; ma si baea ana faretoliṉi lana tha Spirit toto kesi manata lubea imole eri.

³² Ma ni tei bana na kai sorea ta si ṉata taa seena Kaluwane imole, keki manata lubea; ma ni tei bana na kai ṉata seena tha Spirit Abu, e ai kesi manata lubea, ana kada nei mena ka ai, ma kada na ni u ka ai lau boo.

³³ Mado e ai muki reroa ṉa ’ai kai lea, bia foana kai lea; mado muki reroa ’ai eri kai taa, bia foana kai taa: uria kera thaitoomana ’ai ana foana.

³⁴ Kamulua kwalafana baekwa i tolo ki, si do lea ki muki sore ufita ania, na mulu taa nania? sulia fokona imole kai ṉata asi do ne oro i ruruuna.

³⁵ Wane ne lea kai ṉalia mai si do lea ki ana ogogonia lea nia: ma wane taa kai ṉalia mai si do taa ki ana ogogonia taa nia.

³⁶ Ma nau ku soree isamulua, Tona si baea ki sui bana imole kai sorea, keki faaroṉo ania afa boṉi ana kotu baita.

³⁷ Uria ana bae lamu keki sorea o kokoto, ma ana bae lamu keki sorea o abula taa.

³⁸ Sui tei wane ana wane ni kekeda ki bia Farisi ki kera luua, keka una eri, Wane ni kwaifamanatai ae, mili thathamii rikia bala si do oki ilia.

³⁹ Ma nia luuda, ka soree isada, Unii wane ne taa ma kai oe kai rofe uria bala si do; sui sa keki fatai nia bala ta si do isana e ai, talitoona bala tha Jona ṉa porofeta.

⁴⁰ Sulia alafana na tha Jona e to sulia ulu fa thato ma ulu fa rodo i la rakena gwathasu; alafana lau boo Kaluwane imole kai to sulia ulu fa thato ma ulu fa rodo i la initoona theegano.

⁴¹ Wane ba i Ninifa ki toto keki takwe afa boṉi ana kotu baita isana unii wane nei maṉa eri, ma keki sorea kera abula taa boo: uria na kera akeletania boo manatada sulia ṉata lana tha Jona; ma rikia fasi, tee wane ne baita ka tatha atha Jona ni kunei.

⁴² Kiṉa kini ba i mutana kai tatae afa boṉi ana kotu baita isana unii wane nei maṉa eri, ma kai sorea kera abula taa boo: uria nia too mai i susui lana fanua nei iano ka lae mai uria roṉo lana liotooa tha Solomona; ma rikia fasi, tee wane ne baita ka tatha atha Solomona ni kunei.

⁴³ Si maṉa na spirit taa e lae naa faisia wane, kai tatha asi kula e ai ta kafo iei ki, kai rofea mamaloa, ma ka ai si rikia.

⁴⁴ Ma nia ka sorea, Nau kwai oli lau bakua uri biu nau na nau ku lae mai faisia; ma si maṉa nia fula, nia ka rikia e gwau, kera kaofia, ma kera lauṉia naa.

⁴⁵ Ma nia lae, ka talaia lau mai ta fiu spirit lau bi nia na kera taa ka tatha ani nia, ma kera kotho kau, keki to ṉado iei: ma to lana wane eri iburi ka bii taa ka tatha ana to la nai nao. Una eri lau boo toto keki ilia ana unii wane nei maṉa eri na kera taa.

⁴⁶ Si maṉa nia kai ṉata u isana malului wane eki, rikia fasi, thainana bia doorana kera kera takwe i maa, keki rofea fasi keki ṉata bi nia.

⁴⁷ Sui tee wane e soree isana, Rikia fasi, thainamu bia dooramu kera keki takwe bada i maa, keki rofe fasikeki ṉata bi oe.

⁴⁸ Ma nia luua, ka soree isana wane eri ne faaroṉo nia, Thainaku ni tei? ma dooraku kera ni tei kera?

⁴⁹ Ma nia tekwasia kau abana talea toa nia ne toleda, ma ka sorea, Rikia fasi, ṉa thainaku bia dooraku kera!

⁵⁰ Sulia ni tei bana na kai ilia si do na Maka nau ne ni mei thalo e thathamia, nia na dooraku, ma waiwaena nau, ma thainaku.