Mako 5 - Ṉa Alaofua Falu 1923 1949

¹ Ma kera lae uri bali asi laba, fanua Gadarini ki.

² Ma si maṉa ne sifo naa faisia foorua eri, si maṉa eri u boo tee nonii wane e toto i la kula ni aluwanea ka toda ani nia, wane eri spirit taa ni ani nia,

³ Ma fulii to la nia i la kula ni aluwanea ki: ma ka ai ta wane si talaana kani lana lau, ana nailii thalo ki mena ka ai;

⁴ Uria si maṉa oro ki bana kera kania aaena asi do ni kani lana aena imole, bia kera kania lau ana nailii thalo ki bia, ma nailii thalo eki nia abamusia ana ro kadee do ki, ma do na kera kania ana aaena nia ka musimaga: me ai ta wane si talaana faarao lana.

⁵ Ma sulia boṉi ni bana, afa rodo mafa thato, nia to i la tolo bia i la kula ni aluwanea, kai ’ai, ma kai furia seena ana fau ki.

⁶ Ma si maṉa nia rikia tha Jesus ni da u mai, nia ka fita isana ma ka faabaita nia;

⁷ Ma ka ’ai ana ’ai la baita, ka sorea, Si ta na kwai kwaimani bi oe fafia, Jesus, Kaluwane tha God ne Inoto ka tatha? Nau ku ṉata fifi isamu atha God, osi kwae fifi iaku.

⁸ Uria nia soree isana, Lae mai faisia tha wane ena, oe spirit taa.

⁹ Ma nia ka soetoona, Thatamu ni tei? Ma nia luua, ka una eri, Thataku tha Omeabaita; uria na mili oro.

¹⁰ Ma nia ṉata kwaitakoi isana asi maṉa oro sa nia ka ai si arasida faisia fanua eri.

¹¹ Ma tee aini botho oro kera to i aena gwa tolo i kula eri, keki faṉa ada.

¹² Ma spirit taa eki sui boo keki ṉata kwaitakoi isana, keka una eri, Arasi kamilia uri la botho loko ki, fasi mika kothofida.

¹³ Ma si maṉa eri u boo tha Jesus ka alamatanida. Ma spirit taa eki kera kotho i maa, keka kothofia botho eki: ma aini botho eki keka thaka ugwasu ana kula ne gigiloa uri la amali, fuliṉana too ro tooni botho; ma keka lolo i la amali eri.

¹⁴ Ma toa na kera thareda kera thaka, lae keka faaroṉo ania i la toaa susu, ma fanua kakali ki mai. Ma kilu lae mai fasi kiku rikia si do na kera ilia.

¹⁵ Ma keka fula isatha Jesus, ma keka rikia wane eri na spirit taa e toto ania bia omea baita eri, kai ono, e tooni ma ka manata naa: ma toa eki keka mau.

¹⁶ Ma toa na kera rikia mai keka uunu sulia ade la eri isada na kera ilia ana wane eri na spirit taa ki e toto ania, ma keki uunu lau boo sulia botho eki.

¹⁷ Ma toa eki kera ṉata kwaitakoi isana sa nia ka lae faisia oli lana fanua kera ki.

¹⁸ Ma si maṉa nia kai tae i la foorua, wane eri na spirit taa ki kera toto ani nia e ṉata kwaitakoi isana sa kai lae bi nia.

¹⁹ Sui tha Jesus e ai si alamatania, ma ka soree isana, Oki lae uri biu oe isana toa oe ki, oki faaroṉo kera asi do baita ki na tha Lord e ilia ifamu, ma ka tatakomi oe.

²⁰ Ma nia ka lae nana, kai faaroṉo faladoa ania i Dikapolisi asi do baita eki na tha Jesus e ilia ifana: ma toa eki sui boo keka kwele.

²¹ Ma si maṉa na tha Jesus e fai folo lau i la foorua uri bali laba, toa oro keka ofu mai isana: ma nia ka to karaṉia amali.

²² Ma rikia fasi, tee nonii wane ana toa gwauwai ki ana biu ni ofu la, thatana tha Jairasi, e lae mai; ma si maṉa ne riki nia, nia ka aru isana aaena,

²³ Ma ka ṉata kwaitakoi isana asi maṉa oro, ka una eri, Kali thari nau karaṉia kai mae naa: ku thathamia oki lae, oki alua abamu fafi nia, fasi nia kai akwa, ma kai maruki.

²⁴ Ma nia ka lae bia; ma toa oro kera lae buriana, keka beresi nia.

²⁵ Ma tee kini, ne nanai aṉaruu sulia tee tafulu fa ṉali ma ro fa ṉali,

²⁶ Ma ka to ana seefia ana doketa oro ki, ma nia e arua do nia ki ka daṉa faisi nia, ma ka ai si lea boo buira, do eri ka bii baita fafi nia,

²⁷ Si maṉa nia roṉoa tha Jesus, ka fula mai buriana i la laea baita eri, ka suana tooni nia.

²⁸ Uria nia sorea, Mada sa kwai suana tooni nia ki mena, nau kwai maruki,

²⁹ Ma si maṉa eri u boo abu eri ka ai faisi nia; ma nia ka thaitoomana ana seena na nia maruki faisia do ne thauṉi nia.

³⁰ Ma tha Jesus si maṉa eri u boo ka thaitoomana ani nia i talaana na sukwaia e lae faisi nia, ka akele iburi la laea baita eri, ma ka sorea, Ni tei ne suana tooni nau?

³¹ Ma toa nia ne toleda keka soree isana, Oko rikia malului wane nei keki beresi oe, oki soetoona lau, Ni tei ne sua nau kau?

³² Ma nia e lio kakali nia fasi kai rikia ai ne ilia si do eri.

³³ Ma kini eri ka mau ma ka leleba, e thaitoomana si do kera ilia iana, nia ka lae mai ka asi nia isana, ma ka faaroṉo mamana asi do eki sui boo.

³⁴ Ma nia ka soree isana, Thari nau ae, fitooa oe e faamaruki oe; oki lae ana eneno la, ma oki maruki naa faisia do ne thathauṉi oe.

³⁵ Si maṉa na nia kai ṉata u bana, tei toa na kera toto i maafera wane eri ne gwauwai ana biu ni ofu la kera lae mai, keka sorea, Thari oe e mae naa: uria ta noko sorea Wane ni kwaifamanatai nei kai aṉasi lau?

³⁶ Si maṉa eri u boo na tha Jesus e roṉoa si ṉata na kera sorea, nia ka soree isana wane eri ne gwauwai ana biu ni ofu la, Osi mamau, talitoona boo oko fitoo.

³⁷ Ma nia e ai si alamatania ta wane si lae iburiana, talitoona boo tha Pita, ma tha Jemesi, ma tha Jone doorana tha Jemesi.

³⁸ Ma nia fula i maafera wane eri ne gwauwai ana biu ni ofu la; ma ka rikia toa kera ṉalu, bia toa oro keki aṉi ma keki tatao faamau.

³⁹ Sui si maṉa ne kotho mai, nia ka soree isada, Uria ta na muki ṉalu, ma muki aṉi? wela nei e ai si mae, kai biṉa bana.

⁴⁰ Ma kera wawaela, keka aefara iana. Ma buriana ne arasi teefau ani kera i maa, nia ka talaia maka thari eri bia thainana bia wane na kera to u boo bi nia, ma ka kotho asi kula na thari eri kai teo iei.

⁴¹ Ma ka rau ana abana wela eri, ka soree isana, Talitha Kumi; ma toolaṉai lana si ṉata eri e una eri, Thari ena ae, ku soree isamu, Oki tatae.

⁴² Ma si maṉa eri u boo thari eri e tatae, ka lae; uri thari eri tee tafulu fa ṉali ma ro fa ṉali e sui naa maṉa na kera thare nia. Ma toa eki keki tona ana tona la baita.

⁴³ Ma nia ṉata fifi isada fasi ta wane si roṉoa: ma ka faaroṉo kera keka falea ta si do thari eri kai ania.