Mako 4 - Ṉa Alaofua Falu 1923 1949

¹ Ma nia ka bii kwaifamanatai lau i fafoasi. Ma malului wane baita ka tatha kera figu isana, adedea nia ka tae i la foorua, ma ka ono iei la amali; ma malului wane eri sui boo kera to sula amali i thara.

² Ma nia e to’oa do oro ki isada ana tarifula ki, ma ka soree isada ana kwaifamanatai la nia,

³ Muki fafuroṉo fasi: Rikia fasi, wane ni afusi lana foee do ki e lae kai afusia foee do ki:

⁴ Ma lalae mai, si maṉa nia kai afusia, tei fo e asia i ninimana tale, ma thaaro ki kera lofo mai, keka ania.

⁵ Ma tei fo lau ka asia fafona si kula ne faula, kula e ai bana ta si gano si oro iei; me ai si tau bana ka tae, uria na gano eri e ai si buloa:

⁶ Sui si mana na thato e tae mai, ka thatofia; ma uria laila e ai si sifo, ka dele bonaa.

⁷ Ma tei fo lau ka asia i maalutana kwarafifi ki, ma kwarafifi eki ka tae, ma ka tae suusia, ma ai eri e ai si fuṉu.

⁸ Ma tei fo lau ka asia i la gano lea, ka fuṉu, ka kobu ma ka baita; tei ei ka fuṉu ana ulu finitee do, tei ei ka fuṉu ana ono finitee do, ma tei ei ka fuṉu ana tee taleṉee do, fuliṉana do na kera fasidaki.

⁹ Ma nia ka soree isada, Wane ana ta ro aliṉa uria roṉo la, nia kai roṉoi fasi.

¹⁰ Sui si maṉa ne ai tei wane oro isana, toa na kera to isana bia akwala ma ro nonii wane eki kera soetoona uria tarifula eri.

¹¹ Ma nia ka soree isada, Kamulua kera alamatai kamulua muki thaitoomana si do ne to thaufuni ana tooa tha God: ma ni kera toa na kera to i maa, keki faaroṉo kera asi do ki sui bana ana tarifula ki:

¹² Fasi lio la keki lio, ma sui kesi rikia; ma roṉo la keki roṉoi, ma sui kesi thaitoomana; ada ta si maṉa keki akele iburi, ma keka manata lubea abula taa la kera ki.

¹³ Ma nia ka soree isada, Musi thaitoomana tarifula nei? sui muki thaitoomana ufita tarifula eki ka sui?

¹⁴ Wane ni afusi lana foee do kai afusia si baea eri.

¹⁵ Ma toa na kera ni nimana tale, kula na kera afusia si baea eri iei, kera nai nia; toa na kera roṉoi sui, sui Satan kai lae mai si maṉa eri u boo, kai ṉalia si baea eri na kera afusia i la ruruuda.

¹⁶ Ma kera lau boo nai nia na kera afusia kula ne faula, na kera roṉoa si baea eri, ma si maṉa eri u boo keki ṉalia ana seethathala la;

¹⁷ Ma sui e ai ada ta lalii do ani kera, ma keki to si tau bana; ma lalae ṉa fualaṉa mado tona ilamatai la e fula mai inunufana si baea eri, si maṉa eri u boo keki taofai kera.

¹⁸ Ma kera nai nia na kera afusida i maalutana kwarafifi ki; toa na kera roṉoa si baea eri,

¹⁹ Ma manata baita la asi do kada nei ki, bia kaura lana inotoa ki, ma thathami lana do eeta ki kai kotho mai, kai suusia si baea eri, ka ai si fuṉu.

²⁰ Ma kera nai nia na kera afusida fafona gano lea; toa na kera roṉoa si baea eri, ma keki ṉalia; ma keki fuṉu ana foee do, tei ei ana ulu finitee do, tei ei ana ono finitee do, ma tei ei ana tee taleṉee do, fuliṉana do na kera fasidaki.

²¹ Ma nia ka soree isada, Kera ṉalia mai laeta fasi keka alua ifara kwadee do, mado fasi keka alua ifara thamataia? e ai kesi alua i fuila?

²² Uria ne ai ta si do kera thaufunia, na toto kesi fatai nia; me ai ta si do kera agwafai nia, na toto kesi faataloa.

²³ Mada sa ta wane ana ta ro aliṉa uria roṉo la, nia kai roṉoi fasi.

²⁴ Ma nia ka soree isada, Muka fia si do na muki roṉoa: do ni olotooa na muki olotoona si do ania, si do eri keki olotoona ifamulua; ma toa na muki roṉoa, keki falea kai ta ifamulua.

²⁵ Uria wane ne rikia si do, keki falea si do ki ifana: ma wane e ai ana ta si do, si do nia rikia mena keki ṉalia faisia.

²⁶ Ma nia ka sorea, Tooa tha God e una eri, ’uria sa ta wane kai afusia foee do ki i la theegano;

²⁷ Sui kai biṉa ma ka tatae afa rodo mafa thato, ma foee do eki ka tagwasu ma ka tae, nia e ai si thaitoomana maalutana foee do eki nifenia na ka tae.

²⁸ Sulaania theegano kai tala faataea foee do ki; ka alua ree do inao, sui ka taka, sui ka fuṉu.

²⁹ Sui si maṉa na foee do eki ka rafo, si maṉa eri u boo nia ka kasia ana nini, uria unii do eri e rafo naa.

³⁰ Ma nia ka sorea, Tooa tha God kuki toolaṉania ana ta? mado si tarifula ta kuki tarifula ania?

³¹ E ’uria tee foee masitata, na lalae kera afusia i la theegano, ka faekwa asia boo faisia foee do ki na ni la theegano,

³² Sui lalae kera afusia, kai tae, ma toto ka baita ka tatha ana kala lolo ni ania ki sui bana, ma ka mataṉa ana tharee do baita ki; fasi thaaro i mamatalea ki keka liki nuna.

³³ Ma tarifula oro una eri ki nia ka tarifula ania isada sulia si baea eri, asi ṉata la na keka roṉoa maalutana:

³⁴ Ma nia e ai si tona ṉata isada, kai tarifula boo asi tarifula: ma si maṉa na kera to talitoodalua, nia ka inifita si do ki sui bana isana toa nia ne toleda.

³⁵ Ma i thaulafia afa boṉi eri, nia ka soree isada, Kuka lae uri bali laba.

³⁶ Ma buriana na kera arasia malului wane eri, kera lae bonaa fafi nia i la foorua eri. Ma tei foorua ka lae lau boo bi nia.

³⁷ Sui kuburu baita e tae mai, ma lua ka thaasi uri la foorua eri, kai fuṉu.

³⁸ Ma nia e teo buira foorua eri, ka bogwau, kai biṉa ana: ma kera tharasi nia, ma keka soree isana, Wane ni kwaifamanatai ae, e ai si oga oe boo na kuki mae naa?

³⁹ Ma nia tatae, ka sorea thauthau eri, ma ka soree isana amali, Bona, oki eno. Ma thauthau eri ka ai, ma amali ka daununu asia naa,

⁴⁰ Ma nia ka soree isada. Uria ta na muki mau faamau una eri? nifana ade lana e ai u amulua ta fitooa?

⁴¹ Ma kera keka mau faamau, keka sorea kwailiu uri kera, Wane ufita nai nia, na thauthau ma amali ni mena kai ade sulia bae lana?