Mako 3 - Ṉa Alaofua Falu 1923 1949

¹ Ma nia e kotho lau i la biu ni ofu la; ma tee wane ka ni kula eri na abane mae.

² Ma kera lio uri nia, mada sa nia ka faamarukia afa boṉi mamaloa; fasi keki alaṉi nia ania.

³ Ma nia ka soree isana wane eri na abane mae, Lae mai, oki takwe i maalutamilia.

⁴ Ma nia ka soree isada, Kera alamatania ili lana do lea afa boṉi mamaloa ki, mado ili lana do taa? keki faamarukia maṉona imole, mado keki thauwane? Ma keka bona bada.

⁵ Ma buriana ne lilio kakali kera ana rakeiria, lione dila uria sadi lana ruruuda, nia ka soree isana wane eri, Tekwasia abamu. Ma nia ka tekwasia: ma abana ka lea lau bana ’uria ruana aba nia.

⁶ Ma Farisi eki kera lae kau, ma si maṉa eri u boo kera ofu bia toa tha Heroda keka furia ṉata fafi nia, uria si ade la na keki ilia fasi keka thauṉi nia.

⁷ Ma tha Jesus ka lae nana bia toa nia ne toleda uri fafoasi: ma malului wane baita ana toa i Galili kera lae iburiana: bia toa i Judia,

⁸ Bia toa i Jerusalema, toa i Idiumea, bia toa na kera to ibali laba i Jodana, toa fanua kakalia i Taera bia i Saedona, malului wane baita, si maṉa na kera roṉoa si do baita nia e ilidaki, keka lae mai isana.

⁹ Ma nia soree isana toa nia ne toleda, sa tee foorua faekwa ka maakwali nia uria malului wane eri, ada keka beresi nia:

¹⁰ Uria nia e faamarukia toa oro; adedea toa na kera matai ana mataia oro ni bana kera beresi nia fasi keki sua nia.

¹¹ Ma spirit taa ki, si maṉa na kera riki nia, keka asi kera iano isana, ma keki ’ai, keka una eri, Oe Kaluwane tha God.

¹² Ma nia ka faaroṉo fifi ani kera e ai kesi faaroṉo ani nia.

¹³ Ma nia ka tae i la gwa tolo eri, ma ka ailia toa nia thathamia isana: ma keka lae mai isana.

¹⁴ Ma nia e talisia akwala ma ro nonii wane, fasi keki to bi nia, bia fasi kai arasida uria ṉata la,

¹⁵ Bia fasi keki sukwai uria faamaruki lana mataia ki, ma arasi lana spirit taa ki:

¹⁶ Ma tha Saimona nia ka alaṉia atha Pita;

¹⁷ Ma tha Jemesi kaluwane tha Sebede, bia tha Jone doorana tha Jemesi; ma nia ka alaṉida ana Boanajisi, ma toolaṉai lana si ṉata eri, Na ro kaluwane kukururua:

¹⁸ Ma tha Adaru, ma tha Filifi, ma tha Batholomiu, ma tha Mathiu, ma tha Tomasi, ma tha Jemesi kaluwane tha Alafeasi, ma tha Thadeasi, ma tha Saimona ṉa Kenanaete,

¹⁹ Ma tha Judasi Isikarioto, wane ne faaalamai nia. Ma keka kotho i la ta biu.

²⁰ Ma malului wane eri keka figu lau, adedea keka dora naa asi kada sa keki faṉa.

²¹ Ma si maṉa na ina lana kera kera roṉoi, kera lae mai sa keki raua: uria kera sorea, Nia oewanea.

²² Ma toa ni kekeda ki na kera toto i Jerusalema kera lae mai, keki sorea ada, Tha Bielasibaba ni isana, ma, Nia ka arasia spirit taa ki ana spirit ne inoto ana spirit taa ki.

²³ Ma nia ka ailida isana, ma ka soree isada ana tarifula ki, Nifana ade lana tha Satan kai arasia lau tha Satan?

²⁴ Ma mada sa ta tooa kera tala firu bi kera i talaada, tooa eri so ka ṉado e ai.

²⁵ Ma mada sa ta biui wane kera tala firu bi kera i talaada, biui wane eri so ka ṉado e ai.

²⁶ Ma mada sa tha Satan kai tatae, kai firu bi nia i talaana, ma kai to ro bali, nia sa ka ṉado e ai, kai sui lau bana.

²⁷ Ta wane sa ka kotho i la biu wane sukwai, ma ka lagua do nia ki e ai; nia kia kania wane sukwai eri totonao; sui kai bii lagua biu nia.

²⁸ Mamana ku soree isamulua, Abula taa la sui boo keki manata lubea wela imole ki, bia atona bana si baea na keki bae ania ana faretoliṉi lana tha God:

²⁹ Ma ni tei na kai bae ni faretoliṉi lana tha Spirit Abu e ai bonaa ta manata lube la, abula taa la eri kai to bonaa fafi nia:

³⁰ Uria na kera sorea, Spirit taa ni ani nia.

³¹ Sui doorana kera bia thainana keka fula; keka takwe bada i maa, keka kwaiarasi isana, keka aili nia.

³² Ma malului wane keki ono kali nia; ma keka soree isana, Rikia fasi, thainamu bia dooramu kera kera ni maa, keki rofe uri oe.

³³ Ma nia luuda, ka sorea, Ni tei na thainaku ma dooraku kera?

³⁴ Ma nia e lio kakali kera, toa na kera ono kali nia, ma ka sorea, Rikia fasi, thainaku bia dooraku kera!

³⁵ Sulia ni tei bana na kai ilia si do na tha God e thathamia, nia na dooraku, ma waiwaena nau, ma thainaku.