Mako 2 - Ṉa Alaofua Falu 1923 1949

¹ Sui aṉee fa boṉi buriana nia lae lau uri Kapaneama, ma keka roṉoa na nia e ni la biu eri.

² Ma si maṉa eri u boo toa oro kera figu mai, adedea ka ai lau ta si kula urida i la biu eri, ma maana olofolo eri mena ka ai lau boo ta tona si kula: ma nia ka ṉata sulia si baea eri isada.

³ Ma kera lae mai isana, kera ṉalia mai tee wane afemae e thauṉia, ma fai nonii wane keka fanasia.

⁴ Sui lalae kera dora ana fula la karaṉi nia sulia toa oro eki, keka ogea fafo biu asi kula na nia kai to iei: kera ogegea sui, keka sifolaṉai nia thamataia na wane eri afemae e thauṉia kai teo iei.

⁵ Si mana na tha Jesus e rikia fitooa kera, nia ka soree isana wane eri afemae e thauṉia, Kaluwane nau, abula taa la oe ki kera manata lubea

⁶ Ma tei wane ana wane ni kekeda ki kera ono kula eri, keki laloma i la ruruuda,

⁷ Uria ta na wane nei kei ṉata una eri ana fare toliṉi lana tha God? ni tei ne farana manata lube lana abula taa la ki? ta na sa tee tha God boo.

⁸ Ma si maṉa eri u boo na tha Jesus ka thaitoomana i liona na kera laloma una eri adalua, nia ka soree isada, Uria ta na muki laloma sulia si do eki i ruruumulua?

⁹ Nifenia si do ne kwaiakaori ka tatha, kwai soree isana wane afemae e thauṉia nania, Abula taa la oe ki kera manata lubea, mado kwai sorea, Tatae, ṉalia thamataia oe, oki lae?

¹⁰ Ma sui fasi muki thaitoomana Kaluwane imole sukwaia ni ani nia i fanua nei iano ura manata lube lana abula taa la ki (nia kai soree isana wane afemae e thauṉi nia),

¹¹ Ku soree isamu, Tatae, ṉalia thamataia oe, ma oki lae uri biu oe.

¹² Ma si maṉa eri u boo nia tatae, ka ṉalia thamataia eri, ma nia lae ka tatha inaofana toa eki sui; adedea toa eki sui keka tona, keka taṉoa tha God, keka una eri, Kulu kusi ririkia ta do unei.

¹³ Ma nia lae lau sula amali; ma malului wane eri sui boo kera figu isana, ma nia ka kwaifamanatai isada.

¹⁴ Ma si maṉa nia kai tatha, nia rikia tha Lifae kaluwane tha Alafeasi kai ono asi kula ni ṉali lana takisi ki, ma nia ka soree isana, Lae mai iburiaku. Ma nia tatae ka lae iburiana.

¹⁵ Ma lalae mai, si maṉa na tha Jesus kai teoreri kai faṉa ana i la biu tha Lifae, wane oro na kera ṉalia takisi ki bia toa oro na kera abula taa keki teoreri lauboo isatha Jesus bia toa nia ne toleda: uria toa eki kera oro, ma keka lae mai iburiana.

¹⁶ Ma wane ni kekeda ki ana Farisi ki, si maṉa na kera riki nia ka faṉa bia wane na kera ṉalia takisi ki bia toa na kera abula taa, keki soree isana toa nia ne toleda, Uria ta na nia kai faṉa ma kai kuu ana bia wane na kera ṉalia takisi ki bia toa na kera abula taa?

¹⁷ Si maṉa na tha Jesus e roṉoa, nia ka soree isada, Toa na kera lukatai kesi rofea doketa, talitoona boo toa na kera matai: e ai kwasi fula uria aili lana toa kera kokoto; ku fula uria aili lana toa na kera abula taa uria manata akele la.

¹⁸ Ma toa na tha Jone e toleda bia toa na Farisi ki kera toleda kera abu ana faṉa tei si maṉa: ma kera lae mai, keka soree isana, Uria ta na toa na tha Jone e toleda bia toa na Farisi ki kera toleda keki abu ana faṉa, ma toa oe ki noki toleda e ai kesi abu boo ana faṉa?

¹⁹ Ma tha Jesus ka soree isada, Kala wane na keki abetania wane seelea keki abu ana faṉa, si maṉa na wane seelea eri ni isada? si maṉa na wane seelea eri ka ni isada, kera sa keki abu ana faṉa e ai.

²⁰ Ma fa boṉi ki kai fula, na keki talaia wane seelea faisi kera; keki bii abu ana faṉa afa boṉi eki.

²¹ Bia e ai ta wane si tairaoa si maku falu bia lafui tooni: ada si na sa kai suusia kai mu faisia, si falu faisia si lafu, ma kai bii mu baita.

²² Bia e ai ta wane si lula waene na kera bii thauwai nia i la lafui uṉee do ki taala waene: ada waene eri kai boṉia uṉee do eki, ma waene eri ka kiki, bia uṉee do eki ka taa: waene na kera bii thauwai nia keki lula e ai si ei boo i la uṉee do seelea ki.

²³ Ma lalae mai afa boṉi mamaloa nia kai tatha i la oolee aialo; ma toa nia ne toleda, kada kera tatha, keki inia fuṉii aialo eki.

²⁴ Ma Farisi ki keka soree isana, Rikia fasi, uria ta na keki ilia si do na kesi alamatania afa boṉi mamaloa?

²⁵ Ma nia ka soree isada, E ai musi teteemai nia si do na tha Defeta e ilia na ba, asi maṉa nia rofe, ma ka thaofa, nia, bia toa na kera lae bi nia?

²⁶ Be kotho i la biu tha God si maṉa na tha Abiatha e aofia ni foa na ba, ma ka ania berede abu, do eri kesi alamatania ani lana, do uria talitoona wane ni foa ki, ma ka fale lau boo ana toa na kera lae bi nia?

²⁷ Ma nia ka soree isada, Fa boṉi mamaloa do kera thauwai nia ifana imole, imole e ai kesi thauwai nia ifana boṉi mamaloa:

²⁸ Mania Kaluwane imole e inoto lau boo ana boṉi mamaloa.