Mako 16 - Ṉa Alaofua Falu 1923 1949

¹ Ma lalae fa boṉi mamaloa e sui naa, ni Meri Makadaline, bia ni Meri thainana tha Jemesi, bia ni Salome, kera usia gwai ne makwa lea ki, fasi keka lae keka gwai nia.

² Ma i la uusuwadia ni u boo afa boṉi totonao ana uiki, kera lae mai, keka fula isana kwaiṉeia eri maṉa na thato e tae naa.

³ Ma kera ṉata uri kera, keka una eri, Ni tei neri na kai abulisia gwa fau ba faisia maana kwaiṉeia eri faisi kulu?

⁴ Ma si maṉa na kera tafoa maada, keka rikia fau eri kera abulisia naa: uria na gwa fau eri e baita ka tatha.

⁵ Ma kera kotho i la kwaiṉeia eri, keka rikia tee wane bii baita kai ono ibali aola, e tooni ana tooni kwakwaoa ne tekwa; ma keka aanu.

⁶ Ma nia ka soree isada, Musi aanu: muki rofea tha Jesus, wane i Nasaretha, na kera fota fafia na ba: nia tatae naa; e ai si ni kunei: rikia fasi, si kula na kera alulua iei!

⁷ Muka lae, muka faaroṉoa toa nia ne toleda bia tha Pita, Nia kai lae inaomulua uri Galili: kula eri muki riki nia iei, ’uria ne soree isamulua na ba.

⁸ Ma kera kotho i maa, keka thaka faisia kwaiṉeia eri; uria na leleba la e toeda ma kwele la: me ai kesi sorea boo ta si sata wane; uria na kera mau.

⁹ Ma si maṉa na nia e tatae naa i la si uusuwadia u boo afa boṉi totonao ana uiki, nia ka fula fatai sani Meri Makadaline totonao, ai ne arasia fiu spirit taa ki faisia.

¹⁰ Ma kini eri e lae ka faaroṉoa toa na kilu toto bia tha Jesus, si maṉa keka tatao ma keka aṉi.

¹¹ Ma toa eri, si maṉa na keka roṉoa na nia maruki lau, ma kini eri e riki nia, keka fitala bada.

¹² Buriana si do eki nia e fula fatai isana ta ro wane iada ata fatai la eeta, si maṉa na kero ni sula tale, kero lae adaroa uri tee fanua kakali mai.

¹³ Ma ro wane eki kero lae keko faaroṉoa ana toa na kilu toto: ma toa eri e ai kesi fitoona lau boo ṉata ladaroa.

¹⁴ Buriana si do eki nia ka fula fatai isana akwala wane ba ki ma tee wane si maṉa na keki teoreri isana faṉa la; ma ka soreda fafia fitala lada ma sadi lana ruruuda, uria na kesi fitoona ṉata lana toa na kera riki nia buriana ne tatae.

¹⁵ Ma nia ka soree isada, Muki lae i la fanua nei iano ka sui bana, muka ṉata sulia faaroṉoa lea eri isana imole ni sui.

¹⁶ Wane na kai fitoo ma keka babataesi nia keki faamaruki nia; ma wane ne fitala bana keka sorea kwae lana.

¹⁷ Ma do nei ki ṉa bala si do na kai lae bia toa na kera fitoo: keki arasia spirit taa ki ana thataku; keki ṉata ana ṉata la eeta ki;

¹⁸ keki ra uria baekwa i tolo ki, ma mada sa keki kuufia do bubula, sa ka bula kera e ai; keki alua abada fafia toa kera matai, ma keka akwa.

¹⁹ Mania ṉa Lord, buriana ne ṉata isada e sui, kera tae fafi nia uri thalo lo, ma nia ka ono ibali aba aola tha God.

²⁰ Ma kera lae nada, keka ṉata i la fanua eki sui boo, ma tha Lord ka ra bida, ka faaṉadoa si baea eri ana bala si do ki ne lae iburi. Emeni.