Mako 15 - Ṉa Alaofua Falu 1923 1949

¹ Ma i la uusuwadia u boo wane inoto ni foa ki keki furia ṉata bia ulunao ki ma wane ni kekeda ki ma ofu la eri sui bana, sui keka kania tha Jesus, keka tolea, keka fale nia ifatha Paelate.

² Ma tha Paelate ka soetoona, Oe ṉa Kiṉa Ju ki? Ma nia luua, ka soree isana, Oi sorea.

³ Ma wane inoto ni foa ki keki alaṉi nia ana do oro ki; ma nia e ai si luuda ana ta si do.

⁴ Ma tha Paelate ruana ka soetoona lau, ka una eri, Osi luuda boo ana ta si do? rikia fasi do oro nei ki toa nei keki alaṉi oe ania.

⁵ Ma tha Jesus e ai si luua lau ana ta si do; adedea tha Paelate ka kwele.

⁶ Ma ana fafaṉa eri ade la kai ililia kai lulubea tee wane na kera kania kai lae ifada, wane eri na kera gani nia uria.

⁷ Ma tee wane, thatana tha Barabasi, kera kania bia toa na kera firu bia toa i Roma, toa eri kera thauwane ana firua eri.

⁸ Ma malului wane eki kera ’ai faamau, keka thathamia sa nia kai ilia si do ne ililia ifada.

⁹ Ma tha Paelate e luuda, ka una eri, Mulu thathamia kwai lubea Kiṉa Ju ki kai lae ifamulua?

¹⁰ Uria ne thaitoomana wane inoto ni foa ki kera fale nia uria bana manatade uga isana.

¹¹ Ma wane inoto ni foa ki kera faaṉalua toa eki, fasi nia kai lubea tha Barabasi kai lae ifada.

¹² Ma tha Paelate e luuda, ka sorea lau isada, Ma si ta na muka thathamia kwai ilia ana wane na mulu alaṉia ana Kiṉa Ju ki?

¹³ Ma keka ’ai lau, Fota fafi nia ana ’ai rarafolo.

¹⁴ Sui tha Paelate ka soree isada, Uria ta, si ta ne taa nia ilia? Ma keka bii ’ai baita ka tatha, Fota fafi nia ana ’ai rarafolo.

¹⁵ Ma tha Paelate, uria ne thathamia kai faalea manatana toa eri, ka lubea tha Barabasi ka lae ifada, ma iburiana ne kwae tataria ana suila tha Jesus, nia ka fale nia fasi keka fota fafi nia ana ’ai rarafolo.

¹⁶ Ma toa ana firua kera talai nia i la lalabata, i la biu baita kera; ma keka ailia mai aini toa ana firua sui bana.

¹⁷ Ma kera faatooni nia ana tooni momothelaa, kera eeroa kwalo totora, keka alua i gwauna;

¹⁸ Ma keki bii faainoto nia, keki una eri, Kiṉa Ju ki ae!

¹⁹ Ma kera kwaea gwauna ana fa ue, ma keka ṉisufi nia, ma kera boururu, keka faabaita nia.

²⁰ Ma buriana na kera aefara ania e sui, keka tanusia tooni momothelaa faisia, ma kera faatooni nia ana tooni nia ki. Ma kera tole nia kau uria fota fafi lana ana ’ai rarafolo.

²¹ Ma tee wane, thatana tha Saimona, wane i Saerini, maka tha Alikasada ma tha Rufasi, e too ana tee fanua kakali mai, ka lae mai, ma kera tolobare nia kai ṉalia ’ai rarafolo nia.

²² Ma kera talai nia uria kula na kera alaṉia ana Gologotha, ma toolaṉai lana si ṉata eri, Si kula gwa lelete.

²³ Ma kera falea waene na kera dola ana mara ifana: ma nia e ai si kuufia.

²⁴ Ma buriana na kera fota fafi nia, keka ukalia tooni nia ki faisi kera, ma kera ilala, fasi keka thaitoomana ni tei kai ṉalia.

²⁵ Ma ula si kadee maṉa naa neri, ma kera fota fafi nia ana ’ai rarafolo.

²⁶ Ma si do na kera alaṉi nia ania kera keda i gwauna ’ai eri una eri, KIṈA JU KI.

²⁷ Ma kera fota fafia ro wane kera laulau ki bi nia; ta wane ibali aba aola nia, ma ta wane ibali aba mauli nia.

²⁸ Ma kekeda la abu eri e mamana, ne sorea, Ma kera teemai nia bia toa kera abula asi abula la na kera lufia.

²⁹ Ma toa na kera tatha keka bae fafi nia, keki isua gwauda, ma keka una eri, Ua! wane oki ogea biu baita tha God, ma oki kasia ana ulu fa boṉi,

³⁰ Faamaruki oe fasi i talaamu, ma oki sifo mai faisia ’ai rarafolo ena.

³¹ Una eri lau boo wane inoto ni foa ki keka aefara iana, keka sorea uri kera bia wane ni kekeda ki, Nia fafaamarukia toa eeta; sui ka dora ana faamaruki lana i talaana.

³² Ṉa Christ, Kiṉa Isirela, kai sifo mai si maṉa eri faisia ’ai rarafolo, fasi mili rikia, mika fitoona. Ma ro wane na kera fota fafidaroa bi nia keko sore nia.

³³ Ma lalae ona si kadee maṉa e fula naa, maerodo ka to fafia fanua eri sui boo lalae ka fula ana sikwana si kadee maṉa.

³⁴ Ma ana sikwana si kadee maṉa tha Jesus ka ’ai ana ’ai la baita, ka una eri, Eloi, Eloi, lama sabakathani? ma toolaṉai lana si ṉata eri e una eri, God nau, God nau, uria ta no akwasi nau?

³⁵ Ma tei wane ana toa kera takwe kula eri, si maṉa na kera roṉoa, keka sorea, Rikia fasi, nia kei eilia tha Elaeja.

³⁶ Ma tee wane e fita, ka lula ṉa fulo ka fuṉu ana waene ne afae, ma ka alua i gwauna fa ue, ka falea ifana sa kai kuufia, ka una eri, To ana; kulu rikia fasi mada sa tha Elaeja kai lae mai uria sifolaṉai lana.

³⁷ Ma tha Jesus ka ’ai faamau, ma ka luka ana maṉona.

³⁸ Ma maku ne taru faisia maana kadee biu lalo ana biu baita tha God e seṉa, too mai i gwauna ka seṉa uri aaena.

³⁹ Ma si maṉa na senitiurione, ne takwe otofana, e rikia na nia ’ai una eri ma ka luka ana maṉona, nia ka sorea, Kaluwane tha God mamana boo nai nia.

⁴⁰ Ma tei kini kera to lau boo, keki lio da mai: ni Meri Makadaline ka ni isada, bia ni Meri thainana tha Jemesi faekwa ma tha Josesi, bia ni Salome;

⁴¹ Ai eki, si maṉa na nia i u i Galili, kera lae buriana, ma keka ra ifana; bia tei ei oro lau na kera lae mai bi nia uri Jerusalema.

⁴² Ma si maṉa ne thaulafia naa, sulaania ṉa Tagudoa neri, si maṉa na kai karaṉia naa fa boṉi mamaloa,

⁴³ Tha Josefa, wane i Arimathia, wane ana ofu la eri, wane inoto, na kai maasia lau boo tooa tha God, e lae; ka kotho seeraa isatha Paelate, ka gania seena tha Jesus.

⁴⁴ Ma tha Paelate e roṉoa na nia mae bonaa, ka kwele: ma nia ka ailia senitiurione eri, ka soetoona mada sa nia ta mae ka sukani tau naa.

⁴⁵ Ma buriana ne roṉoa ana seniturione eri, nia ka alamatania seena ifatha Josefa.

⁴⁶ Ma nia usia si maku kwakwaoa, me sifolaṉai nia, ka afua ana maku eri, ma ka alua i la kwaiṉeia na kera garua i la kale; ma nia abulisia tee gwa fau faisia maana kwaiṉeia eri.

⁴⁷ Ma ni Meri Makadaline bia ni Meri thainana tha Josesi kero rikia si kula na kera alu nia iei.