Mako 14 - Ṉa Alaofua Falu 1923 1949

¹ Ro fa boṉi e to ana fafaṉa tathafafi la ba bia fafaṉa berede e ai ta lefena iei: ma wane inoto ni foa ki bia wane ni kekeda ki kera rofe fufuli uria si ade la na keki ilia keki uida asi afe, fasi keki thauṉi nia:

² Sui kera sorea, Asi maṉa na fafaṉa e ai, ada toa eri keki ṉalu.

³ Ma si maṉa ne to i Bethani la biu tha Saimona, wane uru e thauṉia, si maṉa na nia kai teoreri isana faṉa la, tee kini e fula fafia ṉa gwai inoto usi lane baita faamau, i la fau ne dadaa; ma ka dekwea bii do eri, ka kikia fafia gwauna.

⁴ Ma tei wane kera rakeiri ofu, keka ṉata kwailiu uri kera, keka sorea, Bii gwai nei kera faakoka uria ta nania?

⁵ So e ai, gwai nei do keka usi ania uria ulu taleṉee peni ma ka sareṉa, ma keka falea ifana toa na kesi rikii do. Ma kera sorea kini eri.

⁶ Ma tha Jesus ka sorea, To ana; uria ta na muki sore nia? nia ilia si ra lea ani nau.

⁷ Uria toa na kesi rikii do keki to ṉado bada isamulua, ma lalae sa manatamulua toea, do muki ade lea iada: ma nau kwasi to ṉado isamulua.

⁸ Nia e ilia naa tee si do eri ne thaitoomana: e gwaia seeku totonao uria kwaiṉei lana.

⁹ Mamana ku soree isamulua, Nifei bana toto keki ṉata sulia faaroṉoa lea iei la fanua nei iano ni sui bana, si do eri lau boo ne ilia toto keki ṉata sulia ana manatai lana.

¹⁰ Ma tha Judasi Isikarioto, wane ana akwala ma ro nonii wane eki, e lae isana wane inoto ni foa ki, fasi kai fale nia ifada.

¹¹ Ma si maṉa na toa eki kera roṉoa, ka lea iada, ma keka alaṉai nia malefo isana. Ma nia ka rofe uria si maṉa ne kwaiakaori fasi ka fale nia.

¹² Ma afa boṉi totonao ana fafaṉa berede e ai ta lefena iei, si maṉa ana kwai lana tathafafi la, toa nia ne toleda keka soree isana, Si kula ifei no thathamia mika lae, mika naare iei maakwali oe oki ania tathafafi la ba?

¹³ Ma nia e arasia ro nonii wane ana toa nia ne toleda, ka soree isada, Moki lae i la toaa susu, ma toto tee nonii wane kai toda ani kamaroa, kai ṉalia do kafo ni iei: moki lae iburiana;

¹⁴ Ma ifei na nia kai kotho iei, moki soree isana wane ana biu eri, Wane ni kwaifamanatai e sorea, Nifenia kadee biu nau, na nau kwai makafa to fasi iei, kula kwai ania tathafafi la iei bia toa nau ku toleda?

¹⁵ Ma wane eri talani nia kai fatai nia tee kadee biu laṉi ne baita isamaroa, na do oro ni naa iei ka kwaimaakwali: moki naare iakulua i kula eri.

¹⁶ Ma ro wane eki kero lalae mai, keko fula i la toaa susu eri, keko rikia boo si do na nia e soree isadaroa: ma keka naarea tathafafi la eri ka teo naa.

¹⁷ Ma si maṉa ne thaulafia naa, nia lae mai bia akwala ma ro nonii wane eki.

¹⁸ Ma si maṉa keki teoreri, keki faṉa ada, tha Jesus ka sorea, Mamana ku soree isamulua, Tee nonii wane iamulua kai faaalamai nau, wane eri na kai faṉa bi nau.

¹⁹ Ma keka bii liodila, ma kera sui boo keka soetoona, ta wane ka soree isana, Mado ni nau neri? ma ta wane lau, Mado ni nau neri?

²⁰ Ma nia luuda, ka soree isada, Tee wane boo iamulua ana akwala ma ro wane nei ki, wane eri na kai tonia abana bi nau i la tobosulu.

²¹ Kaluwane imole kai lae boo ana lae la na kera keda suli nia: ma sui taa la kai thauṉia wane eri na kai faaalamai nia Kaluwane imole! e lea ana wane eri mada se ai si futa u boo.

²² Ma si maṉa keki faṉa, tha Jesus ka ṉalia berede, ka sore lea, ma ka nia, ka fale ifada, ma ka sorea, Ṉalia, muka ania: seeku nai nia.

²³ Ma nia ka ṉalia titiu, ma buriana ne sore lea, nia ka falea ifada: ma kera sui boo keka kuu ania.

²⁴ Ma nia ka soree isada, Abuku nai nia ana alaofua falu, ne igwa ifana toa oro.

²⁵ Mamana ku soree isamulua, Kwasi kuu lau ana foana faene, kai to uria fa boṉi kwai kuu falu ania ana tooa tha God.

²⁶ Ma buriana na kera ṉulia tee fa ṉu e sui, keki kotho i maa, keki lae uria gwa tolo i Olifesi.

²⁷ Ma tha Jesus ka soree isada, Kamulua sui muki taofai kamulua suli nau afa rodo nei: uria na kera keda, Kwai thauṉia wane ni toi la kalia sifi, ma sifi eki keki foatata anida.

²⁸ Sui, iburiana keki tatae nau, kwai lae inaomulua uri Galili.

²⁹ Ma tha Pita ka soree isana, Kera sui keki taofai kera mena, ma ni nau molo e ai.

³⁰ Ma tha Jesus ka soree isana, Mamana ku soree isamu, Oe itaraena, afa rodo nei boo, maṉa kukua e ai u ta ro fa ’ai la, ulu fa sore lana oki sorea o dora bamu iaku.

³¹ Ma nia ka ṉata inifeleṉai, ka una eri, So mae la ni mena kera to’oa kwai mae bi oe, nau sa kwa sorea kwa dora iamu e ai. Ma toa eri sui boo kera ṉata una eri lau boo.

³² Ma keka fula ana tee si kula kera alaṉia ana Gethesemane: ma nia ka soree isana toa nia ne toleda, Muki ono kunei, si maṉa nau kwai foa.

³³ Ma nia ka talaia tha Pita ma tha Jemesi ma tha Jone bi nia, ka bii maata, ma kai taa faamau iana.

³⁴ Ma nia ka soree isada, Maṉoku e liodila ka tatha, karaṉia kwai mae naa: muki to kunei, muka tharai.

³⁵ Ma nia ka lae kau uria tee si kula karaṉia bana, ka asi nia iano, ma ka foa, sa kera talaana, kadee maṉa eri kei ei lau bana faisi nia.

³⁶ Ma ka sorea, Aba, Maka ae, o talaana ili lana si do ki sui bana; oki ṉalia titiu nei faisi nau: sui uria bana nau ku thathamia e ai, mamana lana ni oe.

³⁷ Ma nia fula, ka rikida keki biṉa ada, ma ka soree isatha Pita, Saimona, oki biṉa bamua? o dora ana tharai la sulia ta tee kadee maṉa?

³⁸ Muka tharai ma muka foa, fasi e ai musi liu i la bae aliṉa la: spirit imole e fifarao boo, ma sui seena e feda.

³⁹ Ma ruana e lae kau, ka foa, ka sorea lau si baea ba ki.

⁴⁰ Ma si maṉa ne fula lau, nia ka fulatooda keki biṉa lau ada, uria na maade fafokulu asia; ma keka dora asi do na keki luua ania.

⁴¹ Ma ula lau nia ka fula, ka soree isada, Biṉa namulua, muki mamalo: do faamau naa; kadee maṉa ba e fula naa; rikia fasi, Kaluwane imole keki faaalamai nia i abana toa kera abula taa.

⁴² Tatae, kuki lae nakulua: lio fasi, wane na kai faaalamai nau ni karaṉi naa.

⁴³ Ma si maṉa eri u boo, si maṉa nia kai ṉata u bana, tha Judasi, wane ana akwala ma ro wane ba ki, ka fula, ma malului wane bi nia fafia nini ni firu ki ma dia ki, wane inoto ni foa ki bia wane ni kekeda ki bia ulunao ki kera arasida mai.

⁴⁴ Ma wane eri ne faaalamai nia e alulu isada, ka una eri, Ni tei bana na nau kwai nonoia, nia bonaa neri; muki rau nia, muka tole lea ania.

⁴⁵ Ma si maṉa ne fula, si maṉa eri u boo nia ka lae isana, ka sorea, Wane ni kwaifamanatai ae; sui ka nonoia.

⁴⁶ Ma kera rau nia, keka tolea.

⁴⁷ Ma tee nonii wane ana toa na kera takwe kula eri ka lafua nini ni firu nia, ka kwaea wane ni ra aofia ni foa, ma ka kwaemusia aliṉana.

⁴⁸ Ma tha Jesus e luuda, ka soree isada, Mulu lae mai mala toa na kera lae uri rau lana wane ne bili, fafia nini ni firu ki ma dia ki, fasi muka rau iaku nania?

⁴⁹ Nau ku toto sulia boṉi bi kamulua i la biu baita tha God, ku kwaifamanatai, me ai musi rau iaku: sui kekeda la abu ba ki kai mamana e ai si ei boo.

⁵⁰ Ma kera sui keka akwasi nia, keka thaka.

⁵¹ Ma tee wane ne bii baita ka lae iburiana, e tona alua bomana tee thala kwakwaoa fafi nia: ma wane bii baita ki kera rau ania;

⁵² Ma nia ka akwasia thala kwakwaoa eri, ka thaka, ka talu bana.

⁵³ Ma kera tolea tha Jesus kau isana aofia ni foa: ma wane inoto ni foa ki sui boo ma ulunao ki ma wane ni kekeda ki kera ofu bi nia.

⁵⁴ Ma tha Pita e lae da mai iburiana, ka fula i la lalabata aofia ni foa; ma nia ka ono bia toa ni ra ki, ka thara ana seena era.

⁵⁵ Ma wane inoto ni foa ki ma ofu la eri sui bana kera rofe uria tei wane keki lole fafia tha Jesus fasi keka thauṉi nia; ma kesi fulatoona.

⁵⁶ Uria na toa oro kera lole fafi nia, ma ṉata lada e ai si totoo.

⁵⁷ Ma tei wane kera tatae, kera lole fafi nia, keka una eri,

⁵⁸ Kamilia mili roṉoa e sorea, Nau kwai ogea biu baita tha God nania na kera thauwai nia ana abee imole, ma ta do lau na kesi thauwai nia ana abee imole kwai kasia sulia ulu fa boṉi.

⁵⁹ Ma kera ṉata mena una eri, sui ṉata lada e ai si totoo.

⁶⁰ Ma aofia ni foa ka takwe i maalutada, ka soetoona tha Jesus, ka una eri, Osi luuda boo ana ta si do? si ta na toa nei keki alaṉi oe ania?

⁶¹ Ma nia ka bona bana, e ai si luua ana ta si do. Ma aofia ni foa ruana ka soetoona lau, ka soree isana, Oe ṉa Christ, Kaluwane ni Nia na kera taṉoa?

⁶² Ma tha Jesus ka sorea, Nau ni nia: ma toto muki rikia Kaluwane imole kai ono ibali aba aola ana sukwaia, ma kai lae mai ana datha lo ki i thalo.

⁶³ Ma aofia ni foa eri e sera tooni nia ki, ma ka sorea, Si ta lau kuki rofea toa ni faamamane la uria?

⁶⁴ Mulu roṉoa naa si baea eri ni faretoliṉi lana tha God: manatamulua e ufita neri? Ma kera sui kera sorea nia kai maelia.

⁶⁵ Ma tei wane kera bii ṉisufi nia, kera thu fafia maana, kera kumua, ma keka soree isana, Oko bae mala porofeta: ma wane ni ra ki kera fidalia.

⁶⁶ Ma si maṉa na tha Pita ni iano i la lalabata eri, tee thari ana toa na kera ra ana aofia ni foa ka fula;

⁶⁷ Ma si maṉa ne rikia tha Pita kai thara ana, ka bubuṉia, ma ka sorea, Ma ni oe lau boo, o toto bia tha Jesus, wane i Nasaretha.

⁶⁸ Ma nia ka tofe, ka una eri, E ai kwasi thaitoomana, e ai kwasi thaitoomana maalutana si do noki sorea: ma nia lae kau i la taofa; ma kukua ka ’ai.

⁶⁹ Ma tee thari ka riki nia lau, ka bii soree isana toa na kera takwe kula eri, Wane iada nai nia.

⁷⁰ Ma nia ka tofe lau. Me ai si tau lau bana toa na kera takwe kula eri keka soree isatha Pita, Oe ta wane iada mamana boo; uria o wane i Galili, ma ṉata lamu e ’uria ṉata lada.

⁷¹ Ma nia ka bii kwala, ma ka othi, Nau kwasi thaitoomana wane eri na muki ṉata sulia.

⁷² Ma ruana lau kukua ka ’ai. Ma tha Pita ka onotoona si baea eri na tha Jesus e soree isana, Maṉa kukua e ai u ta ro fa ’ai la, ni oe ulu fa sore lana oki sorea o dora bamu iaku. Ma si maṉa nia onotoona, ka aṉi.