Mako 12 - Ṉa Alaofua Falu 1923 1949

¹ Ma nia ka bii ṉata isada ana tarifula ki. Tee wane e fasia tee oolee faene, ma ka lakali faisia, ka ilia si kula taala waene, ma ka kasia tee faelaṉi ni toi la, sui ka sorea toa ni ra ana oolee faene keki to i la oole eri, ma nia ka lae uria ta fanua eeta.

² Ma si maṉa na unii faene nia arasia tee wane ni ra isana toa ni ra ana oole eri, fasi keka falea tei fo ana foana oolee faene eri ifana.

³ Ma kera raua, keka kwae nia, ma keka arasia kai tona oli bana.

⁴ Ma nia e arasia lau ta wane ni ra lau isada; ma wane eri kera uia ana fau, keka u mala ana gwauna, ma kera fare taa iana, keka arasia.

⁵ Ma nia arasia lau tee wane; ma wane eri kera thauṉia: sui ka arasia lau wane oro ki; ma tei wane iada keka kwaeda, ma tei wane iada keka thauṉida.

⁶ Mania uria ne ana tee kaluwane ni u, liliothaua nia, nia ka arasia buri naa isada, ka una eri, Do keki fare baita ana kaluwane nau.

⁷ Ma toa eki na kera ra ana oolee faene eri keka sorea uri kera i talaadalua, Wane na kai tae fulii ana maka nia nania; kulu thauṉia akulua, ma si do na maka nia sa kai akwasia isana kai to ifakulua.

⁸ Ma kera raua, keka thauṉia, ma keka u kania faisia i la oolee faene eri.

⁹ Mania si ta na wane inoto ana oolee faene eri kai adea? nia kai lae mai, kai thau labatania toa ni ra ana oolee faene eri, ma kai falea oolee faene eri ifana toa eeta.

¹⁰ Ma musi teemai nia kekeda la abu nei; Gwa fau na toa na kera kasibiu kera lalakwa ania, Fau eri kera alua i gwauna lokosuua:

¹¹ Si do eri too mai isatha Lord ka lae mai, Ma mili rikia ka faakwele?

¹² Ma keka rofe uria rau lana; sui keka mau ana malului wane eki; uria na kera thaitoomana na nia e ṉata asi tarifula eri suli kera: ma keka akwasi nia, keka lae nada.

¹³ Ma kera arasia tei wane ana Farisi ki bia tei wane ana toa tha Heroda isana, fasi keki faaṉata nia asi ṉata ne garo.

¹⁴ Ma si maṉa na toa eki kera fula, keka soree isana, Wane ni kwaifamanatai ae, mili thaitoomana o mamana, me ai si oga oe boo uria ta wane: uria nosi lio uria seena imole, oko to’oa mamana boo tala tha God: Kera alamatania fale lana malefo ifatha Sisa, mado e ai?

¹⁵ Kamilia miki falea, mado misi falea? Ma nia thaitoomana olodola la kera, ka soree isada, Uria ta na muki ilitooku? ṉalia mai tee peni isaku, fasi kwai rikia.

¹⁶ Ma keka ṉalia mai. Ma nia ka soree isada, Ni tei na nuna ma kekeda lana nania? Ma keka soree isana, Tha Sisa.

¹⁷ Ma tha Jesus e luuda, ka soree isada, Si do tha Sisa ki muki oli fafia isatha Sisa, ma si do tha God ki muki oli fafia isatha God. Ma kera kwele iana.

¹⁸ Ma sui Sadiusi ki keka fula isana, toa na keki sorea e ai ta tatae la faisia maea; ma keka soetoona, keka una eri,

¹⁹ Wane ni kwaifamanatai ae, tha Mosesi e kekeda isakulua, ka una eri, Mada sa ta wane doorana kai mae, ma ka akwasia kwaina, ma ka ai si akwasia ta wela, doorana kai tolea kwaina, kai aluwela ifana doorana.

²⁰ Ta fiu wai doorana kera toto: ma ulunao e tolekini, sui ka mae, e ai si akwasia bana ta wela;

²¹ Ma ruana wane ka tolea kini eri, ma nia e mae, e ai si akwasia bana ta wela; ma ula wane ka ade una eri lau boo:

²² Ma fiu nonii wane eki kera tolea, ma kesi akwasia ta wela. Iburiada sui, kini eri ka mae lau boo.

²³ Mania toto ana tatae la faisia maea ni tei iada kai tolea? uria na fiu nonii wane eki kera totolea.

²⁴ Ma tha Jesus e luuda, ka soree isada, Kamulua mulu garo uria si kula eri, uria na musi thaitoomana kekeda la abu eki, bia sukwaia tha God.

²⁵ Uria si maṉa na keki tae faisia toa mae ki, e ai kesi tolekini, me ai kesi toowane; keka ’uria angel lo ki i thalo.

²⁶ Sui do ba sulia toa mae ki, na keki tatae; musi teemai la buka tha Mosesi, asi kula sulia ’Ai ba, na tha God e ṉata isana, ka una eri, Nau God tha Aberahamo, ma God tha Aisaka, ma God tha Jekofo?

²⁷ Nia God toa mae e ai, nia God toa maruki: mania kamulua mulu garo faamau.

²⁸ Ma tee wane ana toa ni kekeda e fula, ma ka roṉoa si maṉa na kera oli susuu ada, e thaitoomana na nia e luu lea ani kera, ka soetoona, Si ṉata fifi ta na kai to inao ana si ṉata fifi ba ki ka sui?

²⁹ Ma tha Jesus e luua, Si ṉata fifi totonao nai nia, Toa Isirela, muki roṉoa fasi; Tha Lord God kia, tee Lord boo:

³⁰ Ma oki liothau atha Lord God oe ana ruruumu teefau, bia maṉomu teefau, ma manatamu teefau, ma ana sukwaia oe teefau: si ṉata fifi na kai to inao neri.

³¹ Ma ruana si ṉata fifi e ’uria, Oki liothau ana wane oe ’uria oko liothau ani oe i talaamu. E ai lau tee si ṉata fifi si baita ka tatha ana do eki.

³² Ma wane ni kekeda eri ka soree isana, Mamana asia, Wane ni kwaifamanatai, o sorea do mamana; uria na tee God boo; me ai lau ta do bi nia:

³³ Ma wane kai liothau ani nia ana ruruuna teefau, ma manatana teefau, ma maṉona teefau, ma sukwaia nia teefau, ma kai liothau ana wane nia ’uria kai liothau ani nia i talaana, do e baita ka tatha ana do ni afufu eki sui boo bia do ni foa la ki.

³⁴ Ma si maṉa na tha Jesus e roṉoa na nia kai bae taiṉei, nia ka soree isana, E ai osi ni da faisia tooa tha God. Ma buriana e ai ta wane seena si raraa uria soetoona lana uria ta si do.

³⁵ Ma tha Jesus e luuda, ka sorea, si maṉa nia kai kwaifamanatai la biu baita tha God, Nifana adelana toa ni kekeda keki sorea kaluwane tha Defeta bana na ṉa Christ?

³⁶ Uria na tha Defeta talani nia e sorea atha Spirit Abu, Tha Lord e soree isana Lord nau, Oki ono ibali aba aola nau, Maasia si maṉa kwai adea maalimae oe ki kera do ni alu lana aaemu ifafona.

³⁷ Mania tha Defeta tala ni nia e alaṉia ana Lord; sui nia kaluwane nia ufita lau? Ma toa na kesi inoto kera roṉoa ṉata lana ka lea iada.

³⁸ Ma nia ka soree isada ana kwaifamanatai lana, Muki fia wane ni kekeda ki, na keka thathamii liliu ana tooni tekwa ki, ma kera thathamia kwaiaratai lea la ki la usia ki,

³⁹ Ma si kula inoto ni ono la ki la biu ni ofu la ki, ma si kula inoto ki sana fafaṉa ki:

⁴⁰ Toa na kera lagua si do nai maafera gwa oru ki, ma keki lole ana foa la tau ki; toa eki toto keki fulatoona kwae la ne baita ka tatha.

⁴¹ Ma tha Jesus ka ono otofana fuila malefo, ka bubuṉia ui la na toa eki kera u ana malefo i la do eri: ma toa oro na kera rikii do kera u ana malefo oro.

⁴² Ma tee gwa oru ne ai si rikii do bana e fula, ka u ana ro kali malefo faekwa ki, ro malefo eki e ’uria ro migee lifoia.

⁴³ Ma nia ailia toa nia ne toleda isana, ka soree isada, Mamana ku soree isamulua, Gwa oru loko ne ai si rikii do bana e u asi do ne oro ka tatha ana toa eki sui bana na keki u ana malefo i la fuila malefo:

⁴⁴ Uria na toa nei ki sui boo kera u bada ana tei fo ana malefo oro kera ki; ma ni nia kai to mena ana rofe la, ka u asi do ne rikidaki sui boo.