Mako 10 - Ṉa Alaofua Falu 1923 1949

¹ Ma nia tatae, ka lae faisia fanua eri, ka fula i oli lana Judia ma ibali laba i Jodana: ma toa eki keki figu lau isana; ma ’uria ade la nia kai ililia, nia ka kwaifamanatai lau isada.

² Ma Farisi ki kera fula isana, keki soetoona, Keki alamatania wane kai arasia kwaina? kera ilitoona.

³ Ma nia e luuda, ka soree isada, Si ta na tha Mosesi e faaroṉo kamulua?

⁴ Ma keka sorea, Tha Mosesi e alamatania keki keda ree do ni arasi lana, ma keka arasia kini eri.

⁵ Ma tha Jesus e luuda, ka soree isada, Sulaania sadi lana ruruumulua nia ka keda si ṉata fifi eri iamulua.

⁶ Ma sui too u bomai ana thauwaia ba inao mai, Tha God e thauwaidaroa wane ma kini.

⁷ Uria si kula eri wane kai akwasia maka nia ma thainana, kai ofu bia kwaina;

⁸ Ma keroa tee see imole naa: fasi keroa e ai lau ta ro ai neri, keroa tee see imole boo.

⁹ Mania si do na tha God e ladoa, ada imole ka lubea lau.

¹⁰ Ma si maṉa na kera ni la biu, toa nia ne toleda keka soetoona lau uria si do eri.

¹¹ Ma nia ka soree isada, Ni tei bana na kai arasia kwaina, ma ka tolea lau ta ai, kai oe fafia kwaina:

¹² Ma kini eri lau boo, mada sa nia kai arasia kwaina, ma ka toowane ata wane eeta lau, nia kai oe.

¹³ Ma keka talaia mai kala wela isana, fasi nia kai suada: ma toa ne toleda keka sorea toa na kera talaida mai.

¹⁴ Ma si maṉa na tha Jesus e rikia, ka taa faamau iana, ma nia ka soree isada, Alamatania kala wela keka lae mai isaku; ma musi lufida: uria na toa na kera ’urida kera ni ana tooa tha God.

¹⁵ Mamana ku soree isamulua. Ni tei bana ne ai si ṉalia tooa tha God mala ta wela faekwa, e ai dodoloa nia ka fulatoona.

¹⁶ Ma nia ka olida, sui ka alua abana fafida, ma ka falea lea la ifada.

¹⁷ Ma si maṉa nia kai lae sula tale, tee wane e fita mai, ka boururu isana, ma ka soetoona, Wane ni kwaifamanatai ae, oe na abula lamu e lea, si ta na kwai ilia fasi kwai fulatoona marukia tatha?

¹⁸ Ma tha Jesus ka soree isana, Uria ta noko alaṉi nau so ku abula lea? e ai ta wane si abula lea, tee tha God boo.

¹⁹ O thaitoomana si ṉata fifi ba ki, Osi oee, Osi thathauwane, Osi bibili, Osi lolole fafia imole, Osi abula dodora, Fare baita ana maka oe ma thainamu.

²⁰ Ma nia luua, ka soree isana, Wane ni kwaifamanatai ae, si do eki sui bana ku adede sulia ita na ku faekwa.

²¹ Sui tha Jesus e bubuṉia, ka liothau ania, ma ka soree isana, Tee do e ai u faisi oe: lae, oki usi ana ta si ta noko rikia, ma oki fale ana toa na kesi rikii do, ma toto oki rikia ogogonia i thalo: ma lae mai, ṉalia ’ai rarafolo eri, oki lae iburiaku.

²² Ma maana ka asia sulaania si ṉata eri, ma nia ka lae ana liodila: uria nia rikia do oro.

²³ Ma tha Jesus e lio kakali nia, ka soree isana toa nia ne toleda, E afetai faamau sa toa na kera rikii do keki kotho ana tooa tha God!

²⁴ Ma toa ne toleda kera maata ana bae lana. Ma tha Jesus e luuda lau, ka soree isada, Baree wela ena, toa na kera fitoona si do na kera rikidaki, e afetai faamau sa keka kotho ana tooa tha God!

²⁵ E sukani afetai ana kamela kai tatha i maana ogila, me afetai faamau ana wane ne rikii do kai kotho ana tooa tha God.

²⁶ Ma kera kwele faamau, keka una eri kwailiu isada, Ni tei fetei keki faamarukia?

²⁷ Ma tha Jesus e lio uri kera, ka sorea, Si kula eri imole si talaana, tha God e talaana: uria na tha God e talaana si do ki sui bana.

²⁸ Sui tha Pita ka soree isana, Lio fasi, kamilia mili akwasia si do ki sui bana, ma mika lae iburiamu.

²⁹ Ma tha Jesus e luua, ka sorea, Mamana ku soree isamulua, Wane na kai akwasia maafera nia, mado doorana kera, mado waiwaena nia ki, mado maka nia, mado thainana, mado kwaina, mado wela ki, mado oole ki, inunufaku, ma inunufana si faaroṉoa lea eri,

³⁰ Nia kai ṉalia tee talaṉee do asi maṉa eri fuliṉana do ne akwasidaki, ana maafera ki, ma doorana kera, ma waiwaena ki, ma thainana kera, ma wela ki, ma oole ki, bia tona ilamatai la ki; ma asi kada na ni u kai ṉalia marukia tatha.

³¹ Ma sui toa oro na kera tatha inao toto keki aru buri; ma toa na kera aru buri toto keki tatha inao.

³² Ma kera ni sula tale, si maṉa na kera tae uri Jerusalema; ma tha Jesus ka tatha inaoda: ma kera maata; ma si maṉa na kera lae iburiana, keka mau. Ma nia ka talaia lau akwala ma ro nonii wane eki, ka bii faaroṉo kera asi do na nia toto kai fulatoona,

³³ Ka una eri, Rikia fasi, kuki tae uri Jerusalema; ma Kaluwane imole keki falea ifana wane inoto ni foa ki ma wane ni kekeda ki; ma keki sorea nia kai mae, ma keka fale nia ifana Jenetaele ki:

³⁴ Ma toto keki aefara iana, ma keki kwae tataria ana suila, ma keki ṉisufi nia, ma keki thauṉi nia; ma ulu fa boṉi e sui, nia kai tatae lau.

³⁵ Ma tha Jemesi ma tha Jone, ro kaluwane tha Sebedi ki, kero lae mai isana, keka una eri, Wane ni kwaifamanatai ae, kamarea mere thathamia sa ta si ta na meki gani oe uria oki ilia ifamarea.

³⁶ Ma nia ka soree isada, Si ta na moro thathamia kwai ilia ifamaroa?

³⁷ Keko soree isana, Oki falea si kula eri ifamarea, fasi toto meki ono bamarea, ta wane ibali aba aola oe, ma ta wane ibali aba mauli oe, ana inotoa oe.

³⁸ Ma tha Jesus ka soree isada, E ai mosi thaitoomana si do na moki gania. Kamaroa moro talaana kuu la ana titiu na nau kwai kuu ania? mado moro talaana sa keki babataesi kamaroa ana babataesi la na keki babataesi nau ania?

³⁹ Ma keka soree isana, Mere talaana boo. Ma tha Jesus ka soree isada, Toto moki kuu boo ana titiu na nau kwai kuu ania; ma babataesi la na keki babataesi nau ania toto keki babataesi kamaroa ania:

⁴⁰ Ma ono la ibali aba aola nau bia ibali aba mauli nau do nau e ai fasi kwai falea: do ifana toa na kera thauwai nia si kula eri maakwalida.

⁴¹ Ma si maṉa na akwala eri kera roṉoa, keka bii rakeaṉoṉo uria tha Jemesi ma tha Jone.

⁴² Ma tha Jesus e ailida isana, ka soree isada, Mulu thaitoomana wane na kera sorea keka inoto ana Jenetaele ki keki thasi naunau uria toa eki; ma wane baita kera ki keki oroa toa eki.

⁴³ Sui ka ai si una eri ani kamulua: ma ni tei bana ne thathamia kai baita ani kamulua, nia wane na kai ra ifamulua:

⁴⁴ Ma ni tei bana ne thathamia kai tatha inaomulua, nia wane na kai ra ifamulua sui.

⁴⁵ Sulia Kaluwane imole mena e ai si fula fasi keki ra iana e ai, e fula uria ra la ifana imole, ma fale lana maṉona ana tae la faisia toa oro.

⁴⁶ Ma kera fula i Jeriko: sui si maṉa nia kai lae kau faisia Jeriko, bia toa nia ne toleda bia malului wane baita, tha Batimiasi, wane maane rodo, kaluwane tha Timiasi, kai ono i ninimana tale, kai gani.

⁴⁷ Ma si maṉa ne roṉoa tha Jesus ana, wane i Nasaretha, na kai tatha, nia kei ’ei, ka sorea, Jesus, kaluwane tha Defeta, oki tatakomi nau.

⁴⁸ Ma toa oro keka sore nia, fasi nia kai bona: ma nia ka bii ’ai faamau, Kaluwane tha Defeta, oki tatakomi nau.

⁴⁹ Ma tha Jesus e takwe ṉado, ka sorea keka ailia mai. Ma keka ailia wane eri maane rodo, keki una eri isana, Kai lea i manatamu: tatae, nia kai aili oe.

⁵⁰ Ma nia naṉa ana tooni nia, ka thaka alaa, ka lae mai isatha Jesus.

⁵¹ Ma tha Jesus e luua, ka soree isana, Si ta no thathamia kwai ilia ani oe? Ma wane eri maane rodo ka soree isana, Lord, ku thathamia kwai lio.

⁵² Ma tha Jesus ka soree isana, Oki lae amua; fitooa oe e adea maamu ka laa naa. Ma si maṉa eri u boo nia ka lio, ka lae buriatha Jesus sula tale.