Mako 1 - Ṉa Alaofua Falu 1923 1949

¹ Thafali lana ṉa faaroṉoa lea tha Jesus Christ, Kaluwane tha God.

² ’Uria si do na kera keda ana porofeta ki, Rikia fasi, kwai arasia wane nau ana ṉaliṉata kai tatha inaona maamu, Na kai beta tala oe maakwali oe;

³ Liṉana ṉata lana tee wane kei ’ei la fanua kwasi, Muki beta tala tha Lord ka kwaimaawali, Beta tala nia ki ka kokoto;

⁴ Tha Jone e babataesi la fanua kwasi, ma ka ṉata sulia babataesi la ana manata akele la uria doanita la ana abula taa la ki.

⁵ Ma toa na fanua i Judia sui boo kera lae isana, bia toa i Jerusalema; ma nia ka babataesida ka sui boo i la kafo i Jodana, keka faaroṉo ana abula taa la kera ki.

⁶ Ma tha Jone e tooni ana ifuna kamela, ma tee uṉee do i litana, ma nia ka ania siko ki ma dudualiṉa.

⁷ Ma nia ṉata, ka una eri, Tee wane ne sukwai ka tatha iaku toto kai lae mai iburiaku, si kwao ana butu nia ki mena e ai kwasi farana agwaoro la uria luke lana.

⁸ Nau ku babataesi kamulua boo ana kafo; ma nia kai babataesi kamulua atha Spirit Abu.

⁹ Ma lalae mai afa boṉi eki, tha Jesus e toto i Nasaretha, mai Galili, ka lae mai, ma tha Jone e babataesi nia i Jodana.

¹⁰ Ma si maṉa eri u boo na nia kai tae mai faisia kafo, nia ka rikia thalo lo ki keka seṉa ka ifi, ma tha Spirit ’uria ta bola ka sifo mai fafi nia:

¹¹ Ma liṉana si ṉata la too mai thalo lo ki ka una eri, Kaluwane liliothaua nau ni oe, ne lea iaku uri oe.

¹² Ma si maṉa eri u boo tha Spirit e tari nia uri la fanua kwasi.

¹³ Ma nia ka to i la fanua kwasi eri sulia fai fafulu fa boṉi, tha Satan ka bae aliṉana; ma nia ka to bia do maruki kwasi ana fai ae ki; ma angel ki keki ra ifana.

¹⁴ Sui buriana na kera alua tha Jone i la lokafu, tha Jesus ka fula i Galili, ka ṉata sulia faaroṉoa lea ana tooa tha God,

¹⁵ Ka una eri, Si maṉa ba ka mamana naa, ma tooa tha God e ni karaṉi naa: muki akeletania manatamulua, ma muki fitoona si faaroṉoa lea eri.

¹⁶ Ma si maṉa na nia kai i amali i Galili, nia ka rikia tha Saimona bia doorana na tha Adaru keko ala ana furei la amali: uria na kero ro wane ana de la.

¹⁷ Ma tha Jesus ka soree isada, Moki lae mai iburiaku, kwai tole kamaroa ana de lana imole.

¹⁸ Ma si maṉa eri u boo keko akwasia furei kera ki, ma keko lae iburiana.

¹⁹ Ma si maṉa nia lae e ai si tau, nia ka rikia tha Jemesi kaluwane tha Sebede, bia doorana na tha Jone, kero ni lau boo i la foorua, keko uthea ada furei kera ki.

²⁰ Ma si maṉa eri u boo nia ka ailida: ma kero akwasia maka keroa na tha Sebede i la foorua bia toa ni ra ki na kera usida, ma keko lae iburiana.

²¹ Ma kera lae uri Kapaneama; ma si maṉa eri u boo ana fa boṉi mamaloa nia kotho i la biu ni ofu la, kai kwaifamanatai.

²² Ma kera kwele ana kwaifamanatai la nia: sulia nia faamanatai kera mala wane inoto, me ai si ’uria wane ni kekeda ki.

²³ Ma tee wane spirit taa ni ani nia e ni la biu ni ofu la kera; ma ka ’ai.

²⁴ Ka una eri, To ana; ta si ta fetei miki kwaimani bi oe fafia, oe tha Jesus, wane i Nasaretha? o lae mai fasi oki labatai kamilia? Nau ku thaitoomamu, oe Wane Abu tha God.

²⁵ Ma tha Jesus ka sore nia, ka una eri, Bona amua, oki lae mai faisia.

²⁶ Ma spirit taa eri ka logetai nia wane eri, ma kai ’ai ana ’ai la baita, sui ka lae faisi nia.

²⁷ Ma kera sui keka maata, adedea keka soetooda kwailiu i talaadalua, keka una eri, Ma ṉa ta nania? kwaifamanatai la falu ta nania? uria nia kai ṉata mala wane inoto isana spirit taa ki mena, ma keki ade sulia ṉata lana.

²⁸ Ma si maṉa eri u boo taloa nia ka talofia kula eki sui boo i la fanua ni sui bana kakalia i Galili.

²⁹ Ma si maṉa eri u boo, na kera kotho mai faisia biu ni ofu la eri, keka kotho i maafera tha Saimona ma tha Adaru, bia tha Jemesi ma tha Jone.

³⁰ Ma kini na waifuṉa tha Saimona e teo ka matai asi fule; ma kera mala faaroṉo nia ania si maṉa eri u boo:

³¹ Ma nia e lae mai ma ka rau ana abana, ka tataea; ma si maṉa eri u boo fule eri ka ai faisi nia, ma kini eri ka bii ra ifada.

³² Ma i thaulafi, maṉa thato e su, kera talaia mai toa eki sui boo na kera matai isana, bia toa na spirit taa ki ni anida.

³³ Ma toa na toaa susu eri sui boo kera figu i maana olofolo.

³⁴ Ma nia ka faamarukia toa oro na kera matai ana mataia oro ki sui bana, bia ka arasia spirit taa ki faisia wane oro ki; ma nia e ai si alamatania spirit taa eki kesi bae, uria kera thaitoomana ni nia.

³⁵ Ma i thathala ana dani, nia tatae si maṉa na kai tau u fasi kai bii dani, ma nia ka lae uri la fanua kwasi, kai foa i kula eri.

³⁶ Ma tha Saimona bia toa na kilu to bi nia kera lae buriana;

³⁷ Ma lalae kera fulatoona, keka soree isana, Toa eki sui bana keki rofe oe.

³⁸ Ma nia ka soree isada, Kulu lae si lau uria toaa na ni ki u, fasi kwai ṉata lau boo i kula eki; uria na si do eri ku lae mai uria.

³⁹ Ma nia ka ṉata i la biu ni ofu la kera ki ta si kula si ei boo i Galili, ma ka arasia spirit taa ki.

⁴⁰ Ma tee wane uru e thauṉia e lae mai isana, ka ṉata kwaitakoi isana, ma ka boururu isana, ka una eri isana, Mado so thathamia, o thaitoomana faafalu laku.

⁴¹ Ma tha Jesus e tatakomi nia, ka falea kau abana, ka sua nia, ma ka soree isana, Ku thathamia boo; oe oki falu.

⁴² Ma si maṉa na nia ṉata u boo, si maṉa eri boo uru eri ka ai faisi nia, ma nia ka falu.

⁴³ Ma nia ka ṉata fifi isana, sui si maṉa eri u boo ka arasi nia,

⁴⁴ Ma nia soree isana, Ada oko sorea ta si isata wane: lae kamua, oko fatai oe isana wane ni foa, ma oki falea si do ba ki na tha Mosesi e sorea maana faafalu lamu, ana faamamane la isada.

⁴⁵ Ma nia lae kau, ka bii faaroṉo faladoa ania, ma ka ’ai taloṉania do eri la fanue, adedea tha Jesus ka dora ania lae fatai la i la toaa susu, ka to bana i thara mai la fanua kwasi ki: ma keka lae mai isana faisia fanua eki sui bana.