Luke 9 - Ṉa Alaofua Falu 1923 1949

¹ Sui nia ailia mai akwala ma ro wane nia ne toleda keki ofu, ma ka falea sukwaia ma inotoa ifada fafia spirit taa ki sui bana, bia uria faamaruki lana mataia ki.

² Ma nia ka arasida kau uria ṉata la sulia tooa tha God, ma faamaruki lana toa matai ki.

³ Ma nia ka soree isada, Musi ṉalia ta si do uria laea kamulua, ta kubau mado ta wai ka ai, mado berede, mado malefo; ma musi tooni ana ro tooni ki.

⁴ Ma atona bana ta biu na muki kotho iei, muki to i kula eri, ma muki too i kula eri muki lae.

⁵ Ma ni tei bana na kai lalakwee thathagoni kamulua, si maṉa na muki lae faisia toaa susu eri, muki tagaraṉai nia gegeona theegano faisia lofo aemulua ana faamamane la suli kera.

⁶ Ma keka lae nada, ma keka tatha i la toaa faekwa ki, keka ṉata sulia si faaroṉoa lea, ma keka kwaifaamaruki asi kula eki sui boo.

⁷ Ma tha Heroda ṉa kiṉa e roṉoa si do eki sui bana na nia e ilia: ma manatana ka nai rua, uria tei toa kera sorea na tha Jone e tatae faisia toa mae ki;

⁸ Ma tei toa kera sorea na tha Elaeja e fula fatai mai; ma tei toa lau kera sorea tee wane ana porofeta inao ki mai e tatae lau.

⁹ Ma tha Heroda ka sorea, Tha Jone nau ku sigilia naa gwauna: ma ni tei nai nia, na nau ku roṉoa si do una eki suli nia? Ma nia ka rofe uria riki lana.

¹⁰ Ma aposela eki, si maṉa na kera oli mai, keka faaroṉo nia asi do eki sui na kera ilia. Ma nia ka talai kera, keka lae talitoodalua uria fanua kwasi ana tee toaa susu na kera alaṉia ana Betheseida:

¹¹ Ma toa eki si maṉa na kera thaitoomana keka lae iburiana: ma nia ka thathagonida, ma ka ṉata isada sulia tooa tha God, ma ka faamarukia toa na kera rofea faamaruki lada.

¹² Ma si maṉa na thato kai abalili naa, akwala ma ro wane eki keka fula, keka soree isana, Arasia kau malului wane nai, fasi keki lae uria toaa faekwa ki ma fanua kakali ki mai, keki teo si mada iei, ma keka ṉalia ada tei faṉa: uria na kulu ni kunei la fanua kwasi.

¹³ Ma nia ka soree isada, Kamulua muki fale iada. Ma keka sorea, Kamilia e ai lau ta do, talitoona lima fa bisikete ma ro gwa ia mili alua; mado e ai miki lae, mika usia faṉa ifana toa nei ki sui boo.

¹⁴ Uria adalua fuliṉana lima tooni wane. Ma nia ka soree isana toa nia ne toleda, Muki adea keki teoreri ana ofu la ki, fuliṉana too lima akwala ki.

¹⁵ Ma keka ilia boo, keka adea kera sui boo keka teoreri.

¹⁶ Sui nia ka ṉalia lima bisikete eki bia ro gwa ia eki, ma ka lio alaa uri thalo, ka foa uria fufuṉu, sui ka oea; ma ka falea ifana toa ne toleda keka alua inaofana malului wane eki.

¹⁷ Ma kera faṉa, ma kera sui boo keka abusu: ma kera gwea oretana faṉa ne teo iada, tee tafulu nanado ma ro nanado.

¹⁸ Ma lalae mai, si maṉa nia kai foa banitei, toa nia ne toleda kera to bi nia: ma nia ka soetooda, ka una eri, Toa eki keki sorea nau ni tei?

¹⁹ Kera luua, keka sorea, Wane ni babataesi na tha Jone; ma tei toa lau keka sorea, tha Elaeja; ma tei toa lau kera sorea, tee wane ana porofeta inao ki mai e tatae lau.

²⁰ Nia ka soree isada, Ma ni kamulua muki sorea nau ni tei? Tha Pita e luua, ka sorea, Ṉa Christ tha God.

²¹ Ma nia ṉata fifi isada, ka faaroṉoda kesi faaroṉo asi do eri isata wane;

²² Ka una eri, Kaluwane imole kai to ana taa la oro ki e ai si ei boo, ma ulunao ki bia wane inoto ni foa ki bia wane ni kekeda ki keki lalakwatania, ma keka thau ṉi nia, ma nia kai tatae ana ula fa boṉi.

²³ Ma nia ka soree isadalua sui, Mada sa ta wane kai thathamii lae iburiaku, nia kai sorea nia dora ani nia i talaana, kai ṉalia ’ai rarafolo nia ta fa boṉi si ei, ma kai lae iburiaku.

²⁴ Uria ni tei bana ne thathamia kai faamarukia maṉona, maṉona kai aana; ma ni tei bana na kai faaaana maṉona inunufaku, nia boo kai faamarukia.

²⁵ Uria na si ta na ta wane kai ṉalia ana adomi lana, mada sa nia kai toda fanua nei iano ni sui bana, ma kei faaaana mado kai dolaṉai nia i talaana?

²⁶ Uria ni tei bana na kai seenoni suli nau ma sulia bae laku, Kaluwane imole kai seenoni lau boo suli nia, si maṉa na nia kai lae mai ana inotoa nia i talaana, ma inotoa ṉa Maka, ma angel abu ki.

²⁷ Ma nau ku faaroṉo kamulua e mamana, Tei wane keki to bada ana toa na keki takwe kunei, ne ai dodoloa keki thaitoomana maea, keki rikia tooa tha God, sui keka bii mae.

²⁸ Ma lalae mai fuliṉana kwalu fa boṉi iburiana si ṉata eki, nia ka talaia tha Pita ma tha Jone ma tha Jemesi bi nia, ma ka tae uri tolo kai foa.

²⁹ Ma si maṉa nia kai foa, seena maana ka eeta naa, ma tooni nia ka kwakwaoa, ka faarora maada.

³⁰ Ma rikia fasi, ro nonii wane keko ṉata bi nia, na tha Mosesi ma tha Elaeja;

³¹ Ro wane na kero fula fatai mai ana inotoa, ma keko ṉata sulia mae lana na nia kai ilia ka sui i Jerusalema.

³² Ma tha Pita ma ro wane na kero ni bi nia keka kulua ana biṉa la: ma lalae kera tharai lea naa, keka rikia inotoa nia, ma ro wane na keko takwe bi nia.

³³ Ma lalae mai, si maṉa keko lae nadaroa faisi nia, tha Pita ka soree isatha Jesus, Wane Inoto ae, e lea iakulua kuki to kunei: ma miki kasia ulu ooba ki; ta do ifamu, ta do ifatha Mosesi, ma ta do ifatha Elaeja: e ai si thaitoomana bana si do nia sorea.

³⁴ Si maṉa nia kai sorea si do eki, si datha e lae mai, ka nunufida: ma keka mau si maṉa na kera kotho i la datha.

³⁵ Ma liṉana si ṉata la e too mai la datha eri ka lae mai, ka una eri, Kaluwane liliothaua nau fu nia: muki roṉoa ṉata lana.

³⁶ Ma iburiana liṉana ṉata la, kera rikia tha Jesus talitoona. Ma keka bona bada, ma kesi faaroṉoa ta wane afa boṉi eki ata si ana do eki na kera rikia.

³⁷ Ma lalae mai, afa boṉi iburiana, si maṉa na kera sifo naa faisia gwa tolo eri, toa oro keka toda ani nia.

³⁸ Ma rikia fasi, ta wane ana toa eki e ’ai, ka una eri, Wane ni kwaifamanatai ae, ku ṉata kwaitakoi isamu oki lio uria kaluwane nau; uria ni nia tee fa wela nau eri bonaa:

³⁹ Ma lio fasi, spirit kai thauṉi nia, ma nia ka ’ai fatonada; ma do eri ka logetai nia nia ka botofufuru, ka thaumala iana, ka fi nia si maṉa na kai lae faisi nia.

⁴⁰ Ma nau ku ṉaṉata kwaitakoi isana toa oe noki toleda sa keka arasia; ma keka dora ana ili lana.

⁴¹ Ma tha Jesus e luua, ka sorea, Kamulua unii wane na musi fitoo ma muka lae eeta, ta fita fa boṉi lau kwai to isamulua, ma kwa doanita iamulua? talaia mai kaluwane oe kunei.

⁴² Ma si maṉa nia kai lae u mai, spirit taa eri ka u ania, ma ka logetai nia. Ma tha Jesus ka sorea spirit taa eri, ma ka faamarukia wela eri, ma ka oli fafi nia isana maka nia.

⁴³ Ma kera sui kera tona ana inotoa baita tha God. Ma si maṉa na toa eki sui bana keka kwele bada asi do eki sui boo na tha Jesus e ilia, nia ka soree isana toa nia ne toleda,

⁴⁴ Muki alua si ṉata eki i aliṉamulua: uria na Kaluwane imole toto keki falea i abana imole ki.

⁴⁵ Ma kera kesi thaitoomana maalutana si ṉata eri, ma kera thaufunia faisida, fasi kesi thaitoomana: ma keka mau ana soetoona lana uria si ṉata eri.

⁴⁶ Sui oli susuu la ka fula i maalutada, sulia ni tei iada kai baita ka tatha.

⁴⁷ Ma tha Jesus, uria ne thaitoomana si lio ni manatada, ka tolea tee kali wela, ka alua i ninimana,

⁴⁸ Ma ka soree isada, Ni tei bana na kai thathagonia kali wela nei ana thataku kai thathagoni nau: ma ni tei bana na kai thathagoni nau kai thathagoni nia ne arasi nau mai: uria na wane ne faekwa asia i maalutamulua, nia ana kai baita.

⁴⁹ Ma tha Jone e luua, ka sorea, Wane Inoto ae, kamilia mili rikia tee wane kai arasia spirit taa ki ana thatamu; ma mika lufia, uria ne ai si lae iburiamilia.

⁵⁰ Ma tha Jesus ka soree isana, Musi lufia: uria na wane ne ai si firu bi kulu kai adomi kulu.

⁵¹ Ma lalae mai, si maṉa na fa boṉi eki karaṉia kai fula naa fasi keki tae fafi nia, nia ka alu ṉado ana maana kai lae uri Jerusalema,

⁵² Ma ka arasia wane ni ṉaliṉata ki inaona maana: ma keka lae, keka fula i la toaa faekwa toa i Sameria, fasi keki ra asi do ki maasi nia.

⁵³ Ma kesi thathagoni nia, uria na maana e ’uria sa nia kai lae uri Jerusalema.

⁵⁴ Ma si maṉa na ro wane nia ki ne toleda, tha Jemesi ma tha Jone, kero rikia, keko sorea, Lord ae, o thathamia meki sorea era kai sifo mai faisia thalo lo, kai faafunuida, ’uria lau boo tha Elaeja e ilia?

⁵⁵ Ma nia akele, ka soreda, ma ka sorea, Mosi thaitoomana manatana Spirit na kai too ani kamaroa.

⁵⁶ Uria na Kaluwane imole e ai si fula uria labatai lana maṉona imole; e fula uria faamaruki lana. Ma keka lae nada uria ta toaa faekwa lau.

⁵⁷ Ma lalae mai, si maṉa na keki lae sula tale, tee nonii wane ka soree isana, Lord, kwai lae iburiamu atona bana si kula noki lae uria.

⁵⁸ Ma tha Jesus ka soree isana, Fokisi ki adalua malau ki, ma thaaro nei mamatalea ki adalua nui ki; ma Kaluwane imole e ai ana ta si kula fasi ka reriṉania gwauna iei.

⁵⁹ Ma nia ka soree isata wane lau, Lae mai iburiaku. Ma nia ka sorea, Lord, alamatai nau kwai lae kwai alua fasi maka nau inao.

⁶⁰ Tha Jesus ka soree isana, Oki akwasia toa mae ki keka alua wane kera ne mae; ma oko lae oko faaroṉo faladoa ana tooa tha God.

⁶¹ Ma tee wane lau ka sorea, Lord, nau kwai lae iburiamu; sui oki alamatai nau kwai lae totonao kwai alulu ana toa nai biu nau.

⁶² Ma tha Jesus ka soree isana, E ai ta wane, ne alua naa abana isana do ni ra, ma ka lio buri, si farana tooa tha God.