Luke 8 - Ṉa Alaofua Falu 1923 1949

¹ Ma lalae mai iburiana, nia ka liufia i la toaa susu ki ma toaa faekwa ki sui bana, kai ṉata ma ka fatai nia si faaroṉ a lea ana tooa tha God, ma akwala ma ro wane eki bi nia,

² Bia tei kini na nia e faamarukida faisia spirit taa ki ma feda la ki, ni Meri na kera alaṉia ani Makadaline, na fiu spirit taa ki e lae faisi nia,

³ Bia ni Joana kwai tha Tiusa wane na tha Heroda e takofalea asi do ki, bia ni Susana, ma ta toa oro lau, na kera ilia si do ki ifana asi do na kera rikidaki.

⁴ Ma si maṉa na toa oro kera figu, ma kera fula isana faisia toaa susu ki sui bana, nia ka ṉata ana tarifula:

⁵ Wane ni afusi lana foee do ki e lae kai afusia foee do nia ki: ma si maṉa nia kai afusia, tei fo e asia i ninimana tale; ma keka uria, ma thaaro ana mamaṉa keka ania.

⁶ Ma tei fo lau ka asia fafona fau; ma si maṉa ne tae u bomai, ka dele bonaa, uria ne ai si gwinagwina.

⁷ Ma tei fo lau ka asia i maalutana kwarafifi ki; ma kwarafifi eki e tae bia, ma ka suusia.

⁸ Ma tei fo lau ka asia i la gano lea, ka tae, ma ka fuṉu ana talaṉee do fuliṉana si do na kera fasia. Ma si maṉa nia e sorea naa si do eki, nia ka ’ai, Wane ana ta ro aliṉa uria roṉo la, nia kai roṉoi fasi.

⁹ Ma toa nia ne toleda keka soetoona, keka una eri, Nifana maalutana tarifula eri?

¹⁰ Ma nia ka sorea, Kamulua kera alamatai kamulua muki thaitoomana si do eki ne to thaufuni ana tooa tha God: ma ni kera keki ṉata boo isada ana tarifula ki; fasi keki lio ma kesi rikia ta si do, ma keki roṉoa ma kesi thaitoomana.

¹¹ Ṉa tarifula eri nai nia: Foee do ṉa bae lana tha God.

¹² Si do ba ki i ninimana tale na toa na kera roṉoa naa; sui tha devil ka fula, ka ṉalia si baea eri faisia ruruuda, ada keki fitoo ma keki faamarukida.

¹³ Ma si do i fafona fau na toa eki na, si maṉa na kera roṉoa, keka ṉalia si baea eri ana seethathala la; ma ni kera e ai ada ta lalii do, na keka fitoo sulia ta kasi maṉa faekwa, ma asi maṉa ana bae aliṉa la keka asi kera.

¹⁴ Ma si do ne asia i maalutana kwarafifi ki, kera neri na kera roṉoa, keka lae nada, ma si do na kai oga kera ki ma inotoa ma si do na kai faalea imole ana to lada i fanua nei iano kai suusi kera, me ai kesi fuṉu ana lea la.

¹⁵ Ma si do i fafona si gano lea, kera neri na kera roṉoa si baea eri ana ruruuna imole ne nunufa ma ka lea, keka rau ṉado ania, ma keka fuṉu ana foee do asi lio ni susuu la.

¹⁶ E ai ta wane, buriana ne faatharua laeta, si thu fafia ana kwadee do, mado si alua ifara thamataia; kai alua i fuila, fasi toa na keki kotho mai keki rikia laa lana.

¹⁷ Uria ne ai ta si do kera thu agwa fafia, na toto kesi fatai nia; me ai ta si do kera thaufunia, na toto kesi thaitoomana ma si to lalaa.

¹⁸ Mania muki fia roṉo la na muki roṉo ania: uria ni tei bana ne rikia si do, nia na keki falea si do ki ifana; ma ni tei bana ne ai ana ta si do, keki ṉalia si do eki mena faisi nia na riki lane ’uria sa nia alua ma ka ai.

¹⁹ Ma thainana bia doorana kera keka fula isana, ma keka dora ana fula la isana sulia toa oro eki.

²⁰ Ma keka faaroṉo nia, keka sorea, Thainamu bia dooramu kera keki takwe bada i maa, kera thathamia keki riki oe.

²¹ Ma nia luuda, ka soree isada, Thainaku ma dooraku kera nai nida, toa na keki roṉoa bae lana tha God, ma keki ilia.

²² Ma lalae mai tee fa boṉi afa boṉi eki, nia ka tae i la foorua bia toa nia ne toleda; ma nia ka soree isada, Kuki lae si akulua uri bali amali laba: ma ni kera keka lae i la matakwa.

²³ Ma si maṉa na keki lae nia ka biṉa: ma kuburu ka too i la amali; ma amali kai fuṉulia foorua, ma keka ni karaṉia maea.

²⁴ Ma kera fula isana, keka tharasia, ma keka una eri, Wane inoto, wane inoto, kulu mae naa. Ma nia ka tatae, ma ka sorea thauthau bia lulua baita: ma keka sui, ma amali ka daununu.

²⁵ Ma nia ka soree isada, Nifenia fitooa kamulua? Ma kera mau, keka kwele, keka una eri kwailiu uri kera, Wane ufita nai nia? uria nia kai ṉata isana thauthau ni mena ma amali, ma keka ade sulia bae lana.

²⁶ Ma keka fula ana fanua toa i Gadara, na ni otofana i Galili.

²⁷ Ma si maṉa nia sifo i thara, tee nonii wane ka toda ani nia ne toto i la toaa susu, na spirit taa ki kera to ania ka tau naa; me ai si tooni ata maku, me ai si to i la ta biu, kai toto bana asi kula ni aluwanea.

²⁸ Ma si maṉa nia rikia tha Jesus, nia ka ’ai, ma ka aru inaofana, ma ka sorea ana ṉata la baita, Si ta na kwai kwaimani bi oe fafia, Jesus, Kaluwane tha God ne Inoto ka tatha? Ku ṉata kwaitakoi isamu, osi kwae fifi iaku.

²⁹ Uria nia e faaroṉoa spirit taa eri ka lae faisia wane eri. Uria na si maṉa oro do eri e thauṉia: ma keka suusi nia, ma keka kania ana nailii thalo ma si do ni kani lana aaena imole; ma nia ka musia si do eki, ma spirit taa eri ka tari nia uri la fanua kwasi.

³⁰ Ma tha Jesus e soetoona, ka una eri, Thatamu ni tei? Ma nia ka sorea, Tha Omeabaita; uria na spirit taa oro ki kera ni ani nia.

³¹ Ma kera ṉata kwaitakoi isana fasi nia ka ai si faaroṉoda keka lae i la kilu kwasi.

³² Ma tee aini botho oro keki faṉa i kula eri la tolo: ma keka ṉata kwaitakoi fasi nia ka alamatanida keka kothofida. Ma nia ka alamatanida.

³³ Sui spirit taa eki keka kotho faisia wane eri, ma keka kothofia botho eki: ma aini botho eri keka thaka ugwasu ana kula ne gigiloa uri la amali, ma keka lola.

³⁴ Si maṉa na toa na kera thareda kera rikia si do na kera ilia, keka thaka, lae keka faaroṉo ania i la toaa susu ma fanua kakali mai.

³⁵ Sui kilu lae kau fasi kiku rikia si do na kera ilia; ma keka fula isatha Jesus, ma keka fulatoona wane eri, na spirit taa ki kera kotho faisi nia, kai ono ana isana aaena tha Jesus, e tooni ma ka manata naa: ma keka mau.

³⁶ Ma toa eki lau boo na kera rikia mai keka faaroṉoda ana ade la na kera ilia ana wane eri na spirit taa ki e toto ania, na ka maruki naa.

³⁷ Sui toa eki sui bana ana fanua i Gadara asi kula kakali ki mai keka thafee ṉata isana fasi nia ka lae faisi kera; uria na mau la baita e durufida: ma nia ka tae i la foorua, ka oli nana.

³⁸ Ma wane eri na spirit taa ki kera kotho faisi nia ka ṉata kwaitakoi sa kai lae bi nia: ma tha Jesus e arasia, ka una eri,

³⁹ Oli amu uri biu oe, ma oko faaroṉo asi do baita ki na tha God e ilia ifamu. Ma nia ka lae nana, ka faaroṉo faladoa i la toaa susu eri sui bana asi do baita eki na tha Jesus e ilia ifana.

⁴⁰ Ma lalae mai si maṉa na tha Jesus e oli mai, toa eki keka thathagoni nia; uria na kera sui boo keka maasi nia.

⁴¹ Ma rikia fasi, tee nonii wane thatana tha Jairasi ka fula, ma nia ṉa wane gwauwai ana biu ni ofu la: ma nia ka aru isana aaena tha Jesus, ka ṉata kwaitakoi fasi nia kai lae uri maafera nia;

⁴² Uria nia ana tee thari boo, na tee tafulu fa ṉali ma ro fa ṉali e sui ani nia, ma nia kai teo naa uri mae la. Ma si maṉa nia kai lae toa eki keki beresi nia.

⁴³ Ma tee kini ne nanai aṉaruu sulia tee tafulu fa ṉali ma ro fa ṉali, ne arua do nia ki ka daṉa ifana doketa ki, ma ta wane iada si thaitoomana faamaruki lana,

⁴⁴ Ka fula mai buriana, ka suana tagwarana tooni nia: ma si maṉa eri u boo igwa lana abuna ka raraṉea.

⁴⁵ Ma tha Jesus ka sorea, Ni tei ne sua nau kau? Si maṉa na toa eki sui bana keki tofe, tha Pita bia toa na kera ni bi nia keka sorea, Wane inoto ae, malului wane nei ki keki beresi oe ma keki taeafuni oe, ma oki sorea, Ni tei ne sua nau kau?

⁴⁶ Ma tha Jesus ka sorea, Tee imole e sua nau boo: uria nau ku thaitoomana sukwaia e lae faisi nau.

⁴⁷ Ma si maṉa na kini eri e rikia na nia e ai si thaufuni naa, nia ka lae mai, kai leleba, kai aru inaofana ma ka faaroṉo inaofana toa eki sui bana asi do ne sua nia uria, ma ka faaroṉo ania ne maruki si maṉa eri u boo.

⁴⁸ Ma nia ka soree isana, Thari nau ae, kai lea i manatamu; fitooa oe e faamaruki oe; oki lae ana enenoa.

⁴⁹ Si maṉa na nia kai ṉata u bana, tee wane e too mai maafera wane eri ne gwauwai ana biu ni ofu la ka lae mai, ka una eri isana, Thari oe e mae naa; osi adea Wane ni kwaifamanatai nei kai aṉasi lau.

⁵⁰ Ma si maṉa na tha Jesus e roṉoa, nia luua, ka una eri, Osi mamau: talitoona boo oko fitoo, ma keki faamaruki nia.

⁵¹ Ma si maṉa nia e fula i maafera eri, nia e ai si alamatania ta wane si kotho iei, talitoona boo tha Pita, ma tha Jemesi, ma tha Jone, bia maka wela eri ma thainana.

⁵² Ma toa eki sui boo keki aṉi, ma keki tatao uri nia: ma nia ka sorea, Musi aṉiṉi; nia e ai si mae, kai biṉa bana.

⁵³ Ma kera wawaela keka aefara iana, uria na kera thaitoomana e mae naa.

⁵⁴ Ma nia arasi teefau ani kera i maa, ma ka rau ana abana, ka ailia, ka una eri, Wela nai, tatae.

⁵⁵ Ma spirit nia ka oli lau mai, ma nia ka tatae si maṉa eri u boo: ma nia ka faaroṉo kera keka falea faṉa ifana.

⁵⁶ Ma maka nia ma thainana keka tona: ma nia ṉata fifi isada kesi faaroṉoa ta wane asi do na kera ilia.