Luke 7 - Ṉa Alaofua Falu 1923 1949

¹ Ma iburiana na nia e faasuia si ṉata nia ki sui bana i aliṉana toa eki, nia ka fula i Kapaneama.

² Ma tee senitiurione wane ni ra nia, na nia e liothau ania, e matai ma karaṉia kai mae naa.

³ Ma si maṉa nia roṉoa tha Jesus, nia ka arasia ulunao ana Ju ki isana, keki ṉata kwaitakoi isana sa nia kai lae mai kai faamarukia wane ni ra nia.

⁴ Ma si maṉa na kera fula isatha Jesus, kera seemabe ana ṉata kwaitakoi la isana, ma keka una eri, Nia e farana noki ilia si do eri ifana:

⁵ Uria nia liothau ana toa i fanua kulu, me kasia biu ni ofu la ifamilia.

⁶ Sui tha Jesus ka lae bida. Ma si maṉa ne ni asi kula ne ai si ni da faisia biu eri, senitiurione eri ka arasia toa na kera ado bi nia isana, keka una eri isana, Lord, osi aṉaṉasi: uria nau kwasi farana soki kotho mai fara raraofana biu nau:

⁷ Mania nau lau boo kwasi sorea so ku farana kwai fula isamu: oki sorea mai si baea, ma wane ni ra nau kai maruki.

⁸ Uria ni nau lau boo kera alu nau keka inoto iaku, ku inoto ana toa ana firua: ma ku soree isana wane nei, Lae, ma nia kai lae; ma ku soree isata wane lau, Lae mai, ma nia kai lae mai; ma ku soree isana wane ni ra nau, Ilia si do nei, ma nia kai ilia.

⁹ Si maṉa na tha Jesus e roṉoa si do eki, nia ka kwele ani nia, ma ka akele, ka soree isana toa na kera lae iburiana, Nau ku soree isamulua, e ai kwasi fulatoona fitooa ne baita una eri, i Isirela mena ka ai.

¹⁰ Ma toa na kera arasida kera oli mai uri biu, keka rikia wane ni ra eri ne mamatai, ka maruki naa.

¹¹ Ma lalae mai afa boṉi iburiana, nia ka lae uria ta toaa susu na kera alaṉia ana Nena; ma toa oro ana toa nia ne toleda kera lae bi nia, bia toa oro.

¹² Me lalae mai ka fula karaṉia maethaka ana toaa susu eri, rikia fasi, keka kotho i thara fafia tee wane ne mae, tee kaluwane eri bonaa thainana e tharea, ma nia e oru: ma toa oro ana toaa susu eri kera ni isana.

¹³ Ma si maṉa na ṉa Lord e riki nia, nia ka tatakomi nia, ma ka soree isana, Osi aṉiṉi.

¹⁴ Ma nia lae mai, ka suana fa eri: ma toa na kera fanasia keka takwe ṉado. Ma nia ka sorea, Wane no bii baita, ku soree isamu, Tatae.

¹⁵ Ma wane eri ne mae ka ono, ma kai ṉata. Ma nia ka falea ifana thainana.

¹⁶ Ma mau la ka durufia toa eki sui boo: ma keka taṉoa tha God, keka una eri, Porofeta baita e fula naa i maalutakulua: ma, Tha God e thai sulia toa nia ki.

¹⁷ Ma faaroṉoa eri ka lae suli nia i Judia sui bana, ma i la fanua kakali ki sui bana.

¹⁸ Ma toa na tha Jone e toleda keka faaroṉo nia asi do eki sui bana.

¹⁹ Ma tha Jone e ailia ro wane ana toa nia ne toleda, ka arasida isatha Jesus, ka una eri, Oe na wane ba na kai lae mai, mado miki lio uria ta wane eeta?

²⁰ Si maṉa na wane eki kero fula isana, keko sorea, Wane ni babataesi na tha Jone e arasi kamarea isamu, e una eri, Oe na wane ba na kai lae mai, mado miki lio uria ta wane eeta?

²¹ Ma asi kadee maṉa eri boo nia ka faamarukia toa oro faisia feda la ki ma si do ne thauṉida ma spirit taa ki; ma toa oro na maade rodo nia ka adea maada ka laa.

²² Sui tha Jesus e luuda, ka soree isada, Lae amaroa, moka faaroṉoa tha Jone asi do moro rikidaki ma si do moro roṉodaki; toa maade rodo keki lio, toa aede katu keki lae, toa uru e thauṉida keka faafaluda, toa aliṉade bani keki roṉo, toa mae keka tataeda, toa na kesi rikii do keka ṉata sulia si faaroṉoa lea isada.

²³ Me lea iana, ni tei bana na ka ai si fulatoona ta si do ana faataofai lana ani nau.

²⁴ Ma si maṉa na ro wane ni ṉaliṉata tha Jone ki kero lae naa, nia ka bii soree isana toa eki sulaania tha Jone, Si ta na mulu lalae kau uri fanua kwasi uri bubuṉi lana? fa ue na thauthau kai isua?

²⁵ Ma sui si ta na mulu lalae kau uri riki lana? wane ne tooni ana maku mausi? Rikia fasi, toa na kera to uria tooni la ana maku lea eeta, ma ili lana si do na kai fafalea kera, keka ni ana biu kiṉa ki.

²⁶ Ma sui si ta na mulu lalae kau uri riki lana? ṉa porofeta? Iu, nau ku soree isamulua, ma mulu lalae uria riki lana wane ne baita ka tatha ana porofeta.

²⁷ Wane eri boo neri na kera kekeda sulia na ba, Rikia fasi, kwai arasia wane nau ana ṉaliṉata kai tatha inaona maamu, Na kai beta tala oe maakwali oe.

²⁸ Uria nau ku soree isamulua, Ana toa na kera futa ana kini ki e ai ta wane si baita si tatha ana wane ni babataesi na tha Jone: una ena mena wane ne faekwa bana ana tooa tha God e baita ka tatha ani nia.

²⁹ Ma toa eki sui bana na kera roṉoa, bia wane ni ṉali lana takisi ki, keka faamamanea na tha God e kokoto, keka babataesida ana babataesi la tha Jone.

³⁰ Ma Farisi ki bia wane na kera kwaifamanatai ana ṉa lo, si do na tha God e thathamia keka faaaia faisi kera i talaada, kera lalakwa na nia ka babataesida.

³¹ Ma ṉa Lord e sorea, Mania nifana si do na kwai toolaṉania unii wane nei ania, ma kera ’uria ta?

³² Kera ’uria kala wela na keki ono isana usia, ma keka ’ai kwailiu uri kera, ma keki una eri, Kamilia mili ufifia aga uri kamulua, me ai musi wae boo; mili tatao uri kamulua, me ai musi aṉi boo.

³³ Uria na wane ni babataesi na tha Jone e fula, e ai si ania si berede me ai si kuufia waene; ma muka sorea, Spirit taa ni ani nia.

³⁴ Kaluwane imole e fula, ka faṉa ma ka kuu; ma muki sorea, Rikia fasi, wane kai fafaṉa kwasi, ma kai kuu ṉado ana waene, wane ne ado bia wane ni ṉali lana takisi ki bia toa na kera abula taa!

³⁵ Ma liotooa, wela nia ki sui bana kera faamamanea na nia e kokoto.

³⁶ Ma tee wane ana Farisi ki e thathamia sa nia kai faṉa bi nia. Ma nia kotho i la biu Farisi eri, ma ka teoreri isana faṉa la.

³⁷ Ma rikia fasi, tee kini ne to i la toaa susu eri, kini ne abula taa, si maṉa nia thaitoomana na nia kai teoreri isana faṉa la i la biu Farisi eri, ka ṉalia mai tee bii gwai, la fau dadaa,

³⁸ Ma kai takwe iburiana isana aaena, kai aṉi, ma kai taua aaena ana kafona maana, ma ka usua ana ifuna gwauna, ma ka nonoia aaena, ma ka gwaia ana gwai eri.

³⁹ Ma si maṉa na Farisi eri ne sorea nia ka lae mai e rikia, nia ka ṉata i manatana, ka una eri, Wane nei, mada sa nia ṉa porofeta, do nia ka thaitoomana ai nei ma ka thaitoomana to lana kini nei ne sua nia, uria nia ai ne abula taa.

⁴⁰ Ma tha Jesus e luua, ka soree isana, Saimona, nau akua tee si do kwai soree isamu. Ma nia ka sorea, Wane ni kwaifamanatai ae, oki sorea mai.

⁴¹ Ro wane ki kera ṉali laṉa ana tee nonii wane ni fale lana malefo na keki duua: tee wane e ṉali laṉa ana lima talaṉee peni, ma ruana wane lima akwalee peni.

⁴² Ma lalae e ai adaroa ta si do fasi keki duua, nia ka manata lube tathaa ani keroa. Mania oko faaroṉo nau, Nifana wane iadaroa na kai liothau ania ka tatha?

⁴³ Tha Saimona e luua, ka sorea, Manataku sa wane eri ne manata lubea naa si do oro eki. Ma nia ka soree isana, Nia bonaa neri no manatatoona.

⁴⁴ Ma nia akele uri kini eri, ma ka soree isatha Saimona, O rikia kini nei? Nau ku kotho i la biu oe, osi falea ta si kafo uria aaeku: ma nia e taua aaeku ana kafona maana, ma ka usua ana ifuna gwauna.

⁴⁵ E ai osi nonoi nau: ma kini nei, ita na ku kotho mai, e ai si to faisia nonoi lana aaeku.

⁴⁶ Gwauku e ai osi gwaia ana gwai: ma kini nei e gwaia aaeku ana gwai.

⁴⁷ Mania ku soree isamu Abula taa la nia ki, ne oro, kera manata lubea; uria nia liothau ka faamau: ma imole na kera manata lubea asi do faekwa, kai liothau kai faekwa bana.

⁴⁸ Ma nia ka soree isana, Abula taa la oe ki kera manata lubea naa.

⁴⁹ Ma toa na kera teoreri bi nia isana faṉa la keka sorea i manatada, Ni tei nai nia ne manata lubea lau boo abula taa la ki?

⁵⁰ Ma nia ka soree isana kini eri, Fitooa oe e faamaruki oe; oki lae ana enenoa.