Luke 6 - Ṉa Alaofua Falu 1923 1949

¹ Ma lalae mai ana ruana fa boṉi mamaloa iburiana fa boṉi mamaloa totonao eri, nia kai tatha i la oolee aialo; ma toa nia ne toleda keka inia fuṉii aialo eki, ma keka ania, keki akatha ana abada.

² Sui tei wane ana Farisi ki keka soree isada, Uria ta na muki ilia si do na kesi alamatania afa boṉi mamaloa ki?

³ Ma tha Jesus e luuda, ka sorea, Musi teemai nia si do eri mena, na tha Defeta e ilia na ba, si maṉa nia thaofa, bia toa na kera lae bi nia;

⁴ Be kotho i la biu tha God, ka ṉalia ma ka ania berede abu, ma ka falea lau boo ifana toa na kera lae bi nia; do eri kesi alamatania ani lana, do uria talitoona wane ni foa ki?

⁵ Ma nia ka soree isada, Kaluwane imole e inoto lau boo ana fa boṉi mamaloa.

⁶ Ma lalae mai ta fa boṉi mamaloa lau, nia ka kotho i la biu ni ofu la, ka kwaifamanatai: ma tee wane ka ni kula eri, na aba aola nia e mae.

⁷ Ma wane ni kekeda ki bia Farisi ki keka lio uria, mada sa nia kai kwaifaamaruki afa boṉi ni mamaloa; fasi keka fulatoona ta si do keki alaṉi nia ania.

⁸ Sui nia e thaitoomana lioda; ma ka soree isana wane eri na abane mae, Tatae, oki takwe i maalutamilia. Ma nia tatae, ka takwe.

⁹ Mania tha Jesus ka soree isada, Kwai soetoomulua uria tee si do, Kera alamatania ili lana do lea afa boṉi mamaloa ki, mado ili lana do taa? keki faamarukia maṉona imole, mado keki labatania?

¹⁰ Ma nia lilio kali kera sui boo, ma ka soree isana wane eri, Tekwasia abamu. Ma nia ka ilia: ma abana ka lea lau bana ’uria ruana aba nia.

¹¹ Ma rakeiria ka burasida; ma keka ṉata kwailiu uri kera sulia si do na sa keki ilia atha Jesus.

¹² Ma lalae mai afa boṉi eki, nia ka lae i la gwa tolo fasi kai foa; ma nia e to afa rodo laulau ana foa la atha God.

¹³ Ma si maṉa fanua e dani, nia ka ailia toa nia ne toleda isana: ma nia ka filia tee akwala ma ro nonii wane iada, na nia ka alaṉida lau boo ana aposela ki;

¹⁴ Tha Saimona na nia alaṉia lau boo atha Pita, bia doorana na tha Adaru, ma tha Jemesi bia tha Jone, ma tha Filifi bia tha Batholomiu,

¹⁵ Ma tha Mathiu bia tha Tomasi, ma tha Jemesi kaluwane tha Alafeasi, ma tha Saimona na kera alaṉia ana wane Selota,

¹⁶ Ma tha Judasi doorana tha Jemesi, ma tha Judasi Isikarioto, wane eri lau boo ne faaalamai nia;

¹⁷ ma nia sifo mai bida, ka takwe asi kula dedema, ma aini toa nia ne toleda, bia malului wane oro ana toa na kera toto i Judia sui bana bia Jerusalema, ma i fafoasi i Taera ma Saedona, na kera lae mai uria roṉo lana, ma uria faamaruki lada faisia mataia kera ki;

¹⁸ Ma toa na spirit taa ki labatai kera; ma kera faamarukida.

¹⁹ Ma malului wane eki sui keka rofe uria sua lana: uria na sukwaia e lae faisi nia, ma ka faamarukida sui boo.

²⁰ Ma nia tafoa maana ka lio uria toa nia ne toleda, ma ka sorea, Lea iamulua, toa na musi rikii do: uria na do kamulua ni naa tooa tha God.

²¹ Lea iamulua, toa na muki thaofa maṉa eri: uria na toto muki abusu. Lea iamulua, toa na muki aṉi maṉa eri: uria na toto muki waela.

²² Lea iamulua, si maṉa na imole keki riki kamulua ka taa, ma keki lalakwatai kamulua faisi kera, ma keki tamani taa seemulua, ma keki lalakwa ana thatamulua ’uria do taa, inunufana Kaluwane imole.

²³ Muka seethathala afa boṉi eri, ma muki thaka alaa ana seethathala la: uria rikia fasi, kwaiara kamulua e baita mai thalo: uria na maka kera ki kera ade una eri lau boo ana porofeta ba ki.

²⁴ Ma taa la kai thauṉi kamulua, toa na mulu rikii do! uria na mulu ṉalia naa lea la kamulua.

²⁵ Taa la kai thauṉi kamulua, toa na mulu abusu! uria na toto muki thaofa. Taa la kai thauṉi kamulua toa na muka waela maṉa eri! uria na toto muki tatao ma muki aṉi.

²⁶ Taa la kai thauṉi kamulua, si maṉa na imole ni sui keki ṉata lea suli kamulua! uria na maka kera ki kera ade una eri lau boo ana porofeta na kesi mamana ki.

²⁷ Ma nau ku soree isamulua, toa na muki roṉoi, Muki liothau ana maalimae kamulua ki, muki ade lea ana toa na kera riki kamulua ka taa,

²⁸ Muki falea lea la ifana toa na kera alua taa la kai to fafi kamulua, ma muki foa fasi toa na kera fare taa iamulua.

²⁹ Ma wane na kai fidalia babalimu, oko falea ruana babali ifana; ma wane na kai ṉalia tooni i thara oe, osi lufia tooni lalo oe lau boo faisi nia.

³⁰ Oko fale ani tei na kai gani oe; ma wane na kai ṉalia si do oe ki, osi gania lau uria.

³¹ Ma si do na mulu thathamia imole keki ilia ifamulua, muki ilia lau boo ifana imole ka una eri lau boo.

³² Uria na mada sa muki liothau ana toa na kera liothau iamulua, nifenia kwaiara kamulua? uria na toa eki lau boo na kera abula taa keki liothau ana toa na kera liothau iada.

³³ Ma mada sa muki abula lea ana toa na keki abula lea iamulua, nifenia kwaiara kamulua? sulia toa eki lau boo na kera abula taa keki ilia lau boo si do eri.

³⁴ Ma mada sa muki falea si do na keki duua ifana toa na mulu manatatoo ṉado na toto muki ṉalia si do isada, nifenia kwaiara kamulua? uria toa eki lau boo na kera abula taa keki fale ana toa na kera abula taa, fasi toto keki ṉalia lau si do ne talaana si do eri.

³⁵ Muki liothau ana maalimae kamulua ki, ma muki abula lea, ma muki falea si do na keki duua, musi onotoona lau ṉali lana ta si do i maana; ma kwaiara kamulua kai baita, ma ni kamulua kaluwane Nia ne Inoto ka tatha ki: uria nia kai ade lea ifana toa na kesi sore lea bia toa na kera taa.

³⁶ Mania muki tatakomi, ka ’uria Maka kamulua kai tatakomi.

³⁷ Musi ṉata mala wane ni kotu sulia imole, ma wane ni kotu toto si ṉata suli kamulua: musi sorea kwae lana imole, me ai kesi sorea kwae lamulua: muki manata lube, ma keki manata lubea abula lamulua.

³⁸ Muki fale, ma keki fale iamulua; do ni olotooa kai fuṉu lea, na kera feledudua, ma kera isua ka ofu tee si kula, ma kai olomaaliṉa, keki falea i ruruumulua. Uria si do ni olotooa na muki olotoona si do ania, si do eri keki olotoona lau ifamulua.

³⁹ Ma nia ka ṉata asi tarifula isada, Imole maane rodo e thaitoomana tatha la inao ana imole na maane rodo? keroa sui boo kesi aru i la kilu?

⁴⁰ Wane na kera tolea e ai is inoto ana wane ni kwaifamanatai nia: ma wane ni sui bana ne thaitoomana lea naa si do ki kai ’uria wane ni kwaifamanatai nia.

⁴¹ Ma uria ta noko rikia kasi lolo ni la maana dooramu, ma osi manataia ṉa falo ni la maamu lau bana?

⁴² Mado oko sore ufita isana dooramu, Doora ae, alamatai nau kwai gaua kasi lolo ena faisia maamu, na ni oe i talaamu osi rikia ṉa falo na ni la maamu lau bana? Wane oko olodola, oki gaua ṉa falo faisia maamu lau bana inao, ma oki bii lio ni lea la uria gau lana kasi lolo faisia maana dooramu.

⁴³ Uria ne ai ta ’ai ne lea si fuṉu ana fuṉii do taa; bia e ai ta ’ai ne taa si fuṉu ana fuṉii do lea.

⁴⁴ Uria ’ai ni sui bana keka thaitoomana ana foana lau bana. Uria imole e ai kesi fufusia thakwari ana kwarafifi, me ai kesi fufusia foana faene ana ’ai totora.

⁴⁵ Wane lea kai ṉalia mai si do lea ki ana ogogonia lea i ruruuna; ma wane taa kai ṉalia mai si do taa ki ana ogogonia taa i ruruuna: sulia fokona kai ṉata asi do ne oro i ruruuna.

⁴⁶ Ma uria ta na muki alaṉi nau ana Lord, Lord, ma musi ilia si do ku soredaki?

⁴⁷ Ni tei bana ne lae mai isaku, ma kai roṉoa bae laku, ma kai ilia, nau kwai fatai nia wane ne ’uria isamulua:

⁴⁸ Nia e ’uria wane ne kasibiu, ne ili ka sifo ladoa, ma ka alua boa lana i fafona fau: ma si maṉa na kafo e luu, kafo eri e too ana biu eri, ma ka dora ana isu lana: uria na kera boa i fafona fau.

⁴⁹ Ma wane na kai ronoi, me ai si ilia, e ’uria wane ne kasibiu i la theegano me ai si boa ana ta si do; ma kafo ka too ania, ma si maṉa eri u boo ka aga; ma aga lana biu eri e baita.