Luke 5 - Ṉa Alaofua Falu 1923 1949

¹ Ma lalae mai, si maṉa na toa eki keka beresi nia fasi keki roṉoa bae lana tha God, nia kai takwe sula amali i Genesarete;

² Ma nia rikia ro foorua kai to sula amali eri: ma wane ni de la ki kera sifo naa faisia, keki taua furei kera ki.

³ Ma nia ka tae i la ta foorua ana do eki, na do tha Saimona, ma ka sorea sa nia kai idu faekwa ania faisia i thara. Ma nia ka ono i la foorua ka kwaifamanatai isana toa eki.

⁴ Ma nia ṉaṉata ka sui naa, ka soree isatha Saimona, Idu uria si kula kukuruu, muki ala ana furei kamulua ki uria ṉali lana ia oro.

⁵ Ma tha Saimona e luua, ka soree isana, Wane inoto ae, mili ulafu sulia fa rodo laulau, ma misi ṉalia ta do: ma sui sulia ṉata lamu kwai ala ana furei.

⁶ Ma kera ilia si do eri e sui, keka tobia ia ooro ka oro; ma furei kera ka mu;

⁷ Ma keka fafuilala uria toa na kilu ra ofu bida na kera ni la ruana foorua, fasi keki lae mai keki adomida. Ma keka lae mai, keka faafuṉua ro foorua eki, adedea do eki sa kai thuthu.

⁸ Ma si maṉa na tha Saimona Pita e rikia, nia ka asi nia isana ururu tha Jesus, ka una eri, Oki lae faisi nau; uria nau wane ku abula taa, Lord.

⁹ Uria nia maata, bia toa eki sui bana na kera ni isana, sulia ia oro na kera ṉalia;

¹⁰ Ma tha Jemesi ma tha Jone lau boo, kaluwane tha Sebede ki, ro wane na kera ra ofu bia tha Saimona. Ma tha Jesus ka soree isatha Saimona, Osi mau; too asi maṉa eri ka liu alaa oki dea imole ki.

¹¹ Ma iburiana na kera falutei nia foorua kera ki uri thara, keka akwasia do eki sui boo, ma keka lae iburiana.

¹² Ma lalae mai, si maṉa e ni la tee toaa susu; rikia fasi, te nonii wane na seena e magara ana uru: ma si maṉa nia rikia tha Jesus, nia ka aru fafia maana, ma ka ṉata kwaitakoi isana, ka una eri, Lord, mado so thathamia, o thaitoomana faafalu laku.

¹³ Ma nia falea kau abana, ka sua nia, ma ka una eri, Ku thathamia boo; oe oki falu. Ma si maṉa eri u boo uru eri ka ai faisi nia.

¹⁴ Ma nia ka faaroṉo nia si faaroṉoa ta wane: lae kamua, oko fatai oe isana wane ni foa, ma oki faledo maana faafalu lamu, kai lae sulaania si do na tha Mosesi e sorea, ana faamamane la isada.

¹⁵ Ma faaroṉoa ka bii faamau ka bii talo suli nia: ma malului wane oro keka ofu uria roṉo lana, bia fasi kai faamarukida faisia feda la kera ki.

¹⁶ Ma nia ka lae nana uria fanua kwasi, kai foa.

¹⁷ Ma lalae mai ana tee fa boṉi, si maṉa nia kai kwaifamanatai ana, Farisi ki bia wane na keka kwaifamanatai ana ṉa lo keki ono isana, na kera toto mai ana toaa eki sui bana i Galili ma i Judia ma i Jerusalema keka lae mai: ma sukwaia tha Lord kai to bana uria faamaruki lada.

¹⁸ Ma rikia fasi, wane ki kera ṉalia mai tee nonii wane i la thamataia na afemae e thauṉia: ma keka rofea si ade la fasi keki kotho fafi nia, ma keka alua kai teo inaofana.

¹⁹ Ma uria na kesi fulatoona si ade la na sa keki ilia sulaania malului wane eki, keka raa i fafo biu, ma keka sifolaṉai nia i fafo biu mai bia thamataia faekwa nia uri initoo inaofatha Jesus.

²⁰ Ma si maṉa nia rikia fitooa kera, nia ka sorea, Wane ena, abula taa la oe ki kera manata lubea.

²¹ Ma wane ni kekeda ki bia Farisi ki keka laloma, keka una eri, Ni tei nai nia na kai sorea si baea ni faretoliṉi lana tha God? Ni tei ne farana manata lube lana abula taa la ki? ta na sa tee tha God boo.

²² Ma si maṉa na tha Jesus e thaitoomana lioda, nia luuda, ma ka soree isada, Si ta na muki laloma sulia i ruruumulua?

²³ Nifenia si do ne kwaiakaori ka tatha, kwai sorea, Abula taa la oe ki kera manata lubea; mado kwai sorea, Tatae, oki lae?

²⁴ Ma sui fasi muka thaitoomana na Kaluwane imole sukwaia ni ania i fanua nei iano ura manata lube lana abula taa la ki (ni kai soree isana wane afemae e thauṉi nia), Ku soree isamu, Tatae, ṉalia thamataia faekwa oe, ma oki lae uri biu oe.

²⁵ Ma si maṉa eri u boo nia ka tatae inaofada, ma ka ṉalia do ne teo ifafona, ma ka lae uri biu nia, kai taṉoa tha God.

²⁶ Ma tona la ka toea toa eki sui boo, ma kera taṉoa tha God; ma mau la ka durufida, keka una eri, Mili rikia si do eeta ki itaraena.

²⁷ Ma iburiana si do eki nia e lae kau, ka rikia tee wane ni ṉali lana takisi ki, thatana tha Lifae, kai ono asi kula ni ṉali lana takisi, ma ka soree isana, Lae mai iburiaku.

²⁸ Ma nia e akwasia si do ki sui bana, ka tatae ma ka lae iburiana.

²⁹ Ma tha Lifae ka baelia tee fafaṉa baita ifana i biu nia: ma malului wane oro ana wane ni ṉali lana takisi ki bia ta toa lau keka teoreri bida.

³⁰ Ma wane ni kekeda kera ki bia Farisi ki keka uubulu taa uria toa nia ne toleda, keka una eri, Uria ta na muki faṉa ma muki kuu bia wane ni ṉali lana takisi ki ma toa na kera abula taa?

³¹ Ma tha Jesus e luuda, ka soree isada, Toa na kera lukatai kesi rofea doketa; talitoona boo toa na kera matai.

³² E ai kwasi fula uria aili lana toa na kera kokoto, ku fula uria aili lana toa na kera abula taa uria manata akele la.

³³ Ma keka soree isana, Uria ta na toa na tha Jone e toleda kera abu ana faṉa la asi maṉa oro, ma keka foa; bia toa na Farisi ki kera toleda keka ade una eri; ma toa oe ki noki toleda keki faṉa ma keki kuu?

³⁴ Ma nia ka soree isada, Kamulua mulu farana ade lana kala wane na keki abetai nia wane seelea keki abu ana faṉa, asi maṉa na wane seelea eri ni isada?

³⁵ Ma fa boṉi ki kai fula na keki talaia wane seelea faisi kera; keki bii abu ana faṉa afa boṉi eki.

³⁶ Ma nia ka ṉata lau boo ana tarifula isada; E ai ta wane si sera si maku faisia tooni falu ka tairaoa ana lafui tooni; ada nia kai musia do falu eri, ma si maku eri lau boo ana do falu ka ai si totoo bia lafui do eri.

³⁷ Me ai ta wane si lula waene na kera bii thauwai nia i la lafui uṉee do ki tala waene; ada waene na kera bii thauwai nia kai fogea uṉee do eki, ma do eri kai kiki, ma uṉee do eki kai taa bonaa.

³⁸ Waene na kera bii thauwai nia keki lula e ai si ei boo i la uṉee do seelea ki; ma ro do eki sui boo kai lea.

³⁹ Me ai ta wane ne kuufia naa waene na kera thauwai nia u naa si thathamia si maṉa eri u boo do kera bii thauwai nia: uria nia sorea, Do u naa e lea ka tatha.