Luke 4 - Ṉa Alaofua Falu 1923 1949

¹ Ma tha Jesus kera faafuṉua atha Spirit Abu, ka oli faisia i Jodana, ma tha Spirit e talai nia i la fanua kwasi,

² Tha devil ka bae aliṉana sulia fai tafulu fa boṉi. Ma afa boṉi eki nia e ai si ania ta si do: ma iburiana fa boṉi eki e sui, nia ka thaofa.

³ Ma tha devil ka soree isana, So ni oe Kaluwane tha God, oki sorea fau nei kai lioe berede.

⁴ Ma tha Jesus e luua, ka una eri, Kera keda, Imole so ka maruki ana talitoona bana berede e ai; kai maruki ana bae lana tha God kai sui bana.

⁵ Ma tha devil ka tole nia alaa uria gwauna gwa tolo ne fane ia, ma ka fatai nia tooa ki sui bana ana fanua nei iano isana ata kasi maṉa seseka.

⁶ Ma tha devil ka soree isana, Tooa nai sui bana kwai falea ifamu, bia inotoa ania: uria na kera falea ifaku; ma ni tei bana kwai thathamii falea ifana kwai falea.

⁷ Mania mada sa oki faabaita nau, do eki sui boo do oe ki.

⁸ Ma tha Jesus e luua ka soree isana, Oki lae iburiaku Satan: uria na kera keda, Oki faabaita tha Lord na God oe, ma nia talitoona boo oki ra ifana.

⁹ Ma nia ka tole nia uri Jerusalema, ma ka takwelaṉania asi kula ne fane ka tatha i duuna biu baita tha God, ma ka soree isana, So ni oe Kaluwane tha God, oi too kunei oki fusi ani oe iano:

¹⁰ Uria na kera keda, Nia kai faaroṉoa angel nia ki ani oe, keki beta suli oe:

¹¹ Ma, Keki kwau oe ia i abada, Ada mado e ai aaemu kai too ana gwa fau.

¹² Ma tha Jesus e luua, ka soree isana, Kera sorea, Osi ilitoona tha Lord na God oe.

¹³ Ma iburiana na tha devil e faasuia bae aliṉa la eri sui bana, nia ka lae nana faisi nia sulia ta si maṉa.

¹⁴ Ma tha Jesus e oli ana sukwaia tha Spirit uri Galili: ma kera uunu suli nia ka talo i la fanua eki sui bana kakali ki mai.

¹⁵ Ma nia ka kwaifamanatai la biu ni ofu la kera ki, toa ni sui bana keki taṉo nia.

¹⁶ Ma nia ka fula i Nasaretha, fanua ne toto iei ka baita: ma ’uria biraṉana naa, nia ka kotho i la biu ni ofu la afa boṉi mamaloa, ma ka takwe fasi kai teemai.

¹⁷ Ma keka falea buka tha Aisaia ṉa porofeta ifana. Ma si maṉa ne egwea naa buka eri, ka fulatoona si kula na kera keda,

¹⁸ Spirit tha Lord ni fafi nau, Uria nia e gwai nau uria ṉata la sulia si faaroṉoa lea isana toa na kesi rikii do: Nia e arasi nau mai uria faamaruki lana toa liode dila faamau, Uria ’ai kwaitalofi la ana to laa la isana toa na omea e lauda, Ma ade lana imole maane rodo ka lio, Uria faaseelaa lana toa na kera kwae tataria anida,

¹⁹ Uria ’ai kwaitalofi la ana fa ṉali tha Lord na kera ala fafia.

²⁰ Ma nia kosua buka eri, ka oli fafia isana wane ni ra, ma ka ono: ma maana toa eki sui boo i la biu ni ofu la ka tede ani nia.

²¹ Ma nia kai soree isada, Itaraena kekeda la eri e mamana naa i aliṉamulua.

²² Ma toa eki sui boo keka faamamanea si do kera thaitoomana suli nia, ma keka kwele asi baea lea ki ne asia faisia fokona: ma keka sorea, Ta na sa kaluwane tha Josefa nania, mado?

²³ Ma nia ka soree isada, Toto si ei boo do muki tarifula asi tarifula nei uri nau, Doketa ena, oki faamaruki oe i talaamu: atona bana si do na mili roṉoa kera ilia i Kapaneama, oki ilia lau boo kunei i fanua oe u boo.

²⁴ Ma nia ka sorea, Mamana ku soree isamulua, E ai ta porofeta na kera ala fafia i fanua nia u boo.

²⁵ Ma sui mamana ku soree isamulua, Gwa oru oro ki kera toto i Isirela asi maṉa na tha Elaeja e to bana, si maṉa na thalo lo e fono sulia ulu fa ṉali ma ono madami, si maṉa na unii thaofa baita e liu ana fanua eri sui bana;

²⁶ Ma kesi arasia tha Elaeja isata ai iada, kera arasia uria Sarepeta bana, ana fanua i Saedona, isana tee kini ne oru.

²⁷ Ma wane oro na uru e thauṉida kera toto i Isirela asi maṉa na tha Elaesa ṉa porofeta e to bana; me ai kesi faafalua ta wane iada, talitoona boo tha Nemana wane i Siria.

²⁸ Ma toa eki sui la biu ni ofu la eri, si maṉa na kera roṉoa do eki, keka rakeiri faamau;

²⁹ Ma kera tatae, keka suia kau i thara faisia toaa susu eri, ma keka talai nia uria gwauna dioṉolia na kera kasia toaa susu kera iei, fasi keki u ania ka igiliu.

³⁰ Ma nia ka tatha i maalutada ka lae nana.

³¹ Ma nia ka sifo uri Kapaneama, tee toaa susu i Galili, ma kai kwaifamanatai isada afa boṉi mamaloa ki:

³² Ma keka kwele ana kwaifamanatai la nia; uria bae lana sukwaia ni ania.

³³ Ma i la biu ni ofu la eri tee nonii wane ka ni iei, na spirit taa ni ani nia; ma nia ’ai ana ’ai la baita,

³⁴ Ka una eri, To ana! ta si ta fetei na miki kwaimani bi oe fafia, Jesus, wane i Nasaretha? o lae mai fasi oki labatai kamilia? nau ku thaitoomamu, oe Wane Abu tha God.

³⁵ Ma tha Jesus e sore nia, ka una eri, Bona amua, ma oko kotho mai faisia. Ma spirit taa eri e u ania iano i maalutada, sui ka kotho i maa faisia, me ai si ilia ta si do taa ani nia.

³⁶ Ma toa eki sui bana keka maata, ma keka ṉata kwailiu uri kera, keka una eri, Si baea ta nania? uria nia kai ṉata ana inotoa ma sukwaia isana spirit taa ki, ma keka kotho i maa.

³⁷ Ma ṉata la suli nia ka fula i la fanua eki sui boo ne ni kakali ki mai.

³⁸ Ma nia ka tatae faisia i la biu ni ofu la, ma ka kotho i maafera tha Saimona. Ma kini na waifuṉa tha Saimona fule baita e thauṉi nia; ma keka ṉata kwaitakoi isana fasi nia kai faamarukia.

³⁹ Ma nia ka takwe isana, ka sorea fule eri; ma ka ai faisi nia: ma si maṉa eri u boo nia ka tatae ka ra iada.

⁴⁰ Ma si maṉa na thato kai su, toa na mataia ki ni isada, na kera matai ana mataia oro ki, keka talaida mai isana; ma nia ka alua ro aba nia ki fafida sui boo, ma ka faamarukida.

⁴¹ Ma spirit taa ki lau boo keka kotho i maa faisia toa oro, keka ’ai, keka una eri, Oe ṉa Christ, Kaluwane tha God. Ma nia ka soreda, ma ka ai si alamatanida keki bae, uria na kera thaitoomana nia ṉa Christ.

⁴² Ma si maṉa fanua e dani, nia ka lae nana, ka lae i la fanua kwasi: ma toa eki keka rofe iburiana, keka fula isana, ma keka thathamia sa keka lufi nia, fasi nia si lae faisida.

⁴³ Ma nia ka soree isada, Nau kwai ṉata e ai si ei boo sulia tooa tha God isana toa ana toaa susu ki ne ni ki u lau boo: uria na si do eri kera arasi nau mai uria.

⁴⁴ Ma nia kai ṉata i la biu ni ofu la ki i Galili.