Luke 24 - Ṉa Alaofua Falu 1923 1949

¹ Sui afa boṉi totonao ana uiki, si maṉa na kai bii dani, keka fula isana kwaiṉeia eri, keka ṉalia mai si do makwa lea ki na kera thauwai nia, ma tei ei lau bida.

² Ma kera rikia fau eri kera abulisia faisia kwaiṉeia.

³ Ma kera kotho iei, ma kesi rikia seena tha Lord Jesus.

⁴ Ma lalae mai, si maṉa na manatade nai rua sulia si do eri, rikia fasi, ro nonii wane keka takwe isada fafia maku ne faarora maada:

⁵ Ma si maṉa na kera mau, ma kera agwaoro fafia maada uri theegano, keko soree isada, Uria ta na muki rofea wane ne maruki isana toa mae ki?

⁶ E ai si ni kunei, e tatae naa: muki manatatoona fasi ṉata la ne ṉata ania isamulua si maṉa ne ni u i Galili,

⁷ Be una eri, Kaluwane imole keki fale nia e ai si ei boo i abana toa na kera abula taa, keka fota fafi nia ana’ai rarafolo, ma ula fa boṉi nia kai tatae lau.

⁸ Ma keka manatatoona bae lana,

⁹ Ma keka oli faisia kwai ṉeia eri, ma keka faaroṉoa akwala ma tee wane eki, bia toa eki sui boo, asi do eki sui bana.

¹⁰ Ma ai eki ni Meri Makadaline, bia ni Joana, ma ni Meri thainana tha Jemesi, ma tei kini lau bida, na kera faaroṉoa aposela ki asi do eki.

¹¹ Ma bae lada kera roṉoa e ’uria sa tonee si ṉata ki bana; me ai kesi faamamanea.

¹² Sui tha Pita ka tatae, ka fita isana kwaiṉeia eri; me agwaoro, ka rikia si maku kwakwaoa eki kai teo talitoona; ma nia ka lae nana, ka kwele asi do ne fula mai.

¹³ Ma rikia fasi, ro wane iada keko lae afa boṉi eri boo uria tee toaa faekwa na kera alaṉia ana Emeasi, ne to fuliṉana fiu fa maele faisia Jerusalema.

¹⁴ Ma keko tamani uri keroa sulia si do eki sui boo ne fula mai.

¹⁵ Ma lalae mai, si maṉa na keko tamani ma keko ṉata olili uri keroa, tha Jesus talani nia ka fula karaṉi, ma ka lae bida.

¹⁶ Ma maadaroa kera suusia fasi kesi thaitoomana tha Jesus.

¹⁷ Ma nia ka soree isada, Si ṉata ta ki na moki ṉata bamaroa sulia, si maṉa na moki lae, ma moki liodila nania?

¹⁸ Ma ta wane iadaroa, thatana tha Kiliopasi, e luua, ka soree isana, O wane o bii fula i Jerusalema nosi thaitoomana si do ne fula mai iei afa boṉi eki?

¹⁹ Ma nia ka soree isadaroa, Si ta ki? Ma keko soree isana, Si do sulia tha Jesus, wane i Nasaretha, porofeta ne sukwai ana ili lana si do ki ma ana bae lana inaofatha God ma toa eki sui boo:

²⁰ Ma si ade la na wane inoto ni foa ki ma wane gwauwai kulu ki kera ilia na keka fale nia fasi keki sore mae lana, ma keka fota fafi nia ana’ai rarafolo.

²¹ Sui mili manatatoo ṉado so ni nia naa na kai tae faisia Isirela. Ma ta si lau bia do eki sui boo, itaraena ula naa fa boṉi iburiana na kera ilia si do eki.

²² Iu, ma tei kini lau boo ana ofu la kamilia kera alu fatona lamilia, na kera fula si maṉa ne bii dani isana kwaiṉeia eri;

²³ Ma iburiana na kesi rikia seena, keka fula, keka sorea kera rikia lau boo angel na kera fatai lalaa anida, na kera sorea nia maruki naa.

²⁴ Ma tei wane na kera toto bi kamilia kera lae isana kwaiṉeia eri, ma keka rikia ka ’uria boo si do eki na kini eki kera sorea: ma ni nia kesi rikia.

²⁵ Ma nia ka soree isada, Ro wane moro oewanea, ma ruruumaroa e bokone, musi faamamanea si do ki sui na porofeta ba ki kera sorea!

²⁶ Ta na se talaana na Christ kai to ana taa la eki, ma kai fulatoona inotoa nia, mado?

²⁷ Me thafalia atha Mosesi ma porofeta ba ki sui bana, ka inifita si do ki isadaroa ana kekeda la abu eki sui boo suli nia.

²⁸ Ma keka fula karaṉia naa toaa faekwa eri, si kula na keko lae uria: ma nia ka ade ’uria sa kai tatha nana.

²⁹ Ma kero rata iana, keko una eri, Oki to bi kamarea: uria na kai thaulafia, ma thato e lio folo naa. Ma nia ka kotho fasi kai to bidaroa.

³⁰ Ma lalae mai, si maṉa ne teoreri isana faṉa la bida, nia ka ṉalia berede, ka sore lea, ka nia, ma ka falea ifadaroa.

³¹ Ma maada ka laa, ma keko thaitoomana; ma nia ka dola nana, kesi rikia.

³² Ma keko sorea uri keroa, Ta na sa i la ruruukaroa e lae olili, si maṉa nia ṉata isakaroa sula tale, si maṉa ne inifita kekeda la abu eki isakaroa, mado?

³³ Ma keko tatae asi kadee maṉa eri u boo, keko oli uri Jerusalema, ma keko fulatoona akwala ma tee wane eki kera ofu, bia toa na kera ni isada,

³⁴ Keka una eri, Na Lord e tatae mamana boo, me fula fatai isatha Saimona.

³⁵ Ma keko uunu sulia si do ne fula mai sula tale, ma si ade la eri na keko thaitoomana ana ni lana berede.

³⁶ Ma si maṉa na keka sorea si do eki, tha Jesus talani nia ka takwe i maalutada, ma ka soree isada, Enenoa kai to ani kamulua.

³⁷ Ma kera aanu ma keka mau, manatade soso sa kera rikia spirit.

³⁸ Ma nia ka soree isada, Uria ta na kai taa iamulua? ma uria ta na si lio eeta ka tae i manatamulua?

³⁹ Rikia fasi ro aba nau ki ma ro aae nau ki, ni nau boo nania: sua nau, ma muki rikia; uria na spirit e ai ana si mariko ma si ogi, na mulu rikia ka ni ani nau.

⁴⁰ Ma iburiana ne sorea si do eri, nia ka fatai nia ro aba nia ki ma ro aae nia ki isada.

⁴¹ Ma si maṉa na kesi faamamanea u bada sulia kera seethathala, ma kera kwele, nia ka soree isada, Amulua ta si do ni ania kunei?

⁴² Ma keka falea sina ia na kera naarea, ma si dudualiṉa ifana.

⁴³ Ma nia ṉalia, ka ania inaofada.

⁴⁴ Ma nia ka soree isada, Si baea eki nania na nau ku sosoree isamulua, si maṉa ku ni u bi kamulua, na si do ki sui bana kai mamana e ai si ei boo, na kera keda ana ṉa lo tha Mosesi, bia porofeta ba ki, ma ṉu ki, suli nau.

⁴⁵ Sui nia e faatooa manatada, fasi keka thaitoomana maalutana kekeda la abu eki;

⁴⁶ Ma nia ka soree isada, Kera kekeda una eri, ma ṉa Christ kera tooa kai to una eri ana taa la ki, ma kai tatae faisia toa mae ki ana ula fa boṉi;

⁴⁷ Bia keka ṉata sulia manata akele la ma doanita la ana abula taa la ki ana thatana i maalutana kulee toa ni sui, keka thafalia mai i Jerusalema.

⁴⁸ Ma ni kamulua toa ni faamamane lana si do mulu thaitoomana sulia si do eki.

⁴⁹ Ma rikia fasi, kwa arasia mai alaṉaia Maka nau fafi kamulua: sui muki to i la toaa susu i Jerusalema, maasia si maṉa na keki faatooni kamulua ana sukwaia ne ita mai ia.

⁵⁰ Ma nia ka talaida i thara, lalae mai keka fula otofana Bethani: ma nia ka tafoa ro aba nia ki, ka falea lea la ifada.

⁵¹ Ma lalae mai, si maṉa nia kai falea lea la ifada, nia ka lae faisida, ma kera ṉali nia uri thalo lo.

⁵² Ma kera faabaita nia, ma keka oli uri Jerusalema ana seethathala la baita:

⁵³ Ma keka to ṉado i la biu baita tha God, keka taṉoa ma keka ṉata sulia lea la tha God. Emeni.