Luke 23 - Ṉa Alaofua Falu 1923 1949

¹ Ma malului wane ana ofu la eri sui boo keka tatae ma keka tole nia isatha Paelate.

² Ma keka alaṉi nia asi do ki, keka una eri, Mili rikia wane nei ka bulasi garo ana kulee toa nei, ka lufia misi falea malefo atha Sisa, ka sorea ni nia ṉa Christ ṉa Kiṉa.

³ Ma tha Paelate e soe toona, ka una eri Oe ṉa kiṉa Ju ki? Ma nia luua, ka sorea, Oi sorea.

⁴ Sui tha Paelate ka soree isana wane inoto ni foa ki bia toa eki, Kwasi rikia ta si do si taa ana wane nei.

⁵ Ma keka bii susuu faamau uria, keka una eri, Nia kai faaṉalua toa eki, kai to’oa si do ki i Judia sui bana, ka thafalia mai i Galili lalae mai ka fula i fanua nei.

⁶ Si maṉa na tha Paelate e roṉoa kera sorea Galili, nia ka soetooda, Ma wane nei wane i Galili?

⁷ Ma si maṉa nia thaitoomana na nia wane ana tooa tha Heroda, nia ka arasi nia isatha Heroda, na nia lau boo ka ni Jerusalema asi maṉa eri.

⁸ Ma si maṉa na tha Heroda e rikia tha Jesus, ka lea faamau iana: uria no thathathamia ka tau naa sa kai rikia, uria ne roroṉoa si do oro ki suli nia; ma nia manatatoo ṉado kai rikia bala ta si do nia kai ilia.

⁹ Sui nia soetoona asi baea oro ki; ma nia e ai si luua ana ta si do.

¹⁰ Ma wane inoto ni foa ki ma wane ni kekeda ki kera takwe, keka inifeleṉai ana alaṉi lana asi do ki.

¹¹ Ma tha Heroda bia wane ana firua nia ki kera fare faekwa ania, ma keka aefara iana, ma keka faatooni nia ana maku ne lea eeta, ma keka arasia lau isatha Paelate.

¹² Ma afa boṉi eri boo tha Paelate ma tha Heroda keko ado: uria inao kero maalimae ani keroa.

¹³ Ma tha Paelate, si maṉa ne ailia ma ka ofua naa wane inoto ni foa ki bia wane gwauwai ki bia toa eki.

¹⁴ Ka soree isada, Mulu talaia mai wane nei isaku, mulu sorea nia bulasi garo ana toa eki: ma rikia fasi, ni nau ku soekalitana inaofamulua, kwasi rikia ta si do si taa ana wane nei asi do ba ki na mulu alaṉi nia ania:

¹⁵ E ai boo, ma tha Heroda mena ka ai: uria nau ku arasi kamulua isana na ba; ma rikia fasi, nia e ai si ilia ta si do ne farana sa kai maelia.

¹⁶ Mania kwai kwae nia, sui kwai lube nia kai lae.

¹⁷ (Uria si do ana ili lana e ai si ei, nia kai lubea ta wane kai lae kau ifada asi maṉa ana fafaṉa eri.)

¹⁸ Ma kera sui keka ’ai ana tee si maṉa eri, keka una eri, Thauṉia wane nei, ma oki lubea tha Barabasi kai lae mai ifamilia:

¹⁹ Tee wane na sulia firu la bia toa i Roma na kera ilia i la toaa susu, ma sulia thauwanea, kera suia uri la lokafo.

²⁰ Mania tha Paelate, uria ne thathamia kai lubea tha Jesus kai lae, ka ṉata lau isada;

²¹ Ma keka ’ai, keka una eri, Fota fafia, fota fafi nia ana ’ai rarafolo.

²² Ma nia ula ka soree isada, Uria ta, si ta ne taa ne ilia? Kwasi rikia ta si do sa nia kai maelia ani nia: mania kwai kwae nia, sui kwai lube nia kai lae.

²³ Ma keka susuu ana ’ai la baita ki, keka sorea sa keka fota fafi nia ana ’ai rarafolo. Ma ’ai lada bia ’ai lana wane inoto ni foa ki e susuu ka mamana.

²⁴ Ma tha Paelate ka sorea keka ilia si do na kera sorea.

²⁵ Ma nia ka lubea wane eri ifada na kera suia uri la lokafu sulia firu la bia toa i Roma ma thauwanea, wane eri na kera thathamia; ma tha Jesus nia ka falea fasi keki ilia si do na kera thathamia ani nia.

²⁶ Ma si maṉa na keki tole nia kau, kera rau ana tee nonii wane, tha Saimona wane i Saerini, e too ana tee fanua kakali mai ka lae mai, ma kera alua ’ai rarafolo eri fafi nia, fasi kai ṉalia buriatha Jesus.

²⁷ Ma malului wane baita kera lae iburiana, ma kini oro ki na kera aṉisi nia lau boo ma keka tatao uri nia.

²⁸ Ma tha Jesus e akele uri kera, ka sorea, Kini i Jerusalema ki, musi aṉisi nau, muki aṉisi kamulua i talaamulua, ma wela kamulua ki.

²⁹ Uria rikia fasi, fa boṉi ki kai fula, na toto keki sorea, Lea iada, ai na kera abaato, ma rakena toa na kesi tharewela boo, ma uumuna toa na kesi faasusu boo.

³⁰ Asi maṉa eri keki bii soree isana gwa tolo ki, Aru fafi kamilia; ma isana fanua ne adataela ki, Agwafai kamilia.

³¹ Uria na mada sa kera ilia si do eki ana ’ai katha, si ta na keki ilia ana ’ai dele?

³² Ma ta ro nonii wane lau, wane kero abula taa, kera toledaroa bi nia uri thauṉi lada.

³³ Ma si maṉa na kera fula asi kula na kera alaṉia ana Gwa Lelete, kera fota fafi nia i kula eri ana’ai rarafolo, bia ro wane eki na kero abula taa, ta wane ibali aba aola ma ta wane ibali mauli.

³⁴ Ma tha Jesus ka sorea, Maka ae, oki manata lube kera; uria na kesi thaitoomana maalutana si do na keka ilia. Ma keka ukalia tooni nia ki faisida, keka ilala.

³⁵ Ma toa eki kera takwe, keka bubu ada. Ma wane gwauwai ki lau boo bida keka aefara iana, keka una eri, Nia fafaamarukia toa eeta; kai faamaruki nia i talaana, mada sa nia ṉa Christ, wane na tha God e filia.

³⁶ Ma wane ana firua ki kera aefara lau boo iana, keka fula isana, ma keka faletoona waene afae ifana,

³⁷ Ma keka sorea, Mada sa ni oe Kiṉa Ju ki, oki faamaruki oe.

³⁸ Ma kera keda ta kekeda la lau boo fafi nia ana ṉata lana toa i Girisi, ma toa i Roma, ma Hibaru ki, ka una eri, KIṈA JU KI NAI NIA.

³⁹ Ma tee wane ana ro wane eki na kera abula taa na kera tarufanida ka ṉata taa uri nia, ka una eri, Mada sa ni oe ṉa Christ ba, oki faamaruki oe bi ni kamarea.

⁴⁰ Ma ruana wane e luua, ka sore nia, ka una eri, Osi mau atha God, uria no ni lau boo ana tee kwae la eri?

⁴¹ Ma si do ne uri koro e too; sulaania koro fulatoona si do maana abula lakaroa: ma wane nei e ai si ilia ta si do si garo.

⁴² Ma nia ka soree isatha Jesus, Lord, oki manatatooku si maṉa noko fula ana tooa oe.

⁴³ Ma tha Jesus ka soree isana, Mamana ku soree isamu, Itaraena oki to bi nau i fanua lea tha God.

⁴⁴ Ma si maṉa eri fuliṉana ona si kadee maṉa, ma maerodo ka to fafia fanua eri sui boo lalae ka fula ana sikwana si kadee maṉa,

⁴⁵ Ma kera faarorodoa thato: ma si maku ne taru faisia maana kadee biu lalo ana biu baita tha God ka seṉa i initoona.

⁴⁶ Ma si maṉa na tha Jesus e ’ai ana ’ai la baita, nia ka sorea, Maka ae, ku takofalea spirit nau i abamu: ma iburiana ne sorea si do eri, nia ka mae.

⁴⁷ Ma si maṉa na senitiurione e rikia si do na kera ilia, nia ka taṉoa tha God, ka una eri, Do e mamana na wane nei wane kokoto.

⁴⁸ Ma malului wane eki sui boo na kera figu uria riki lana, si maṉa na kera rikia si do na kera ilidaki, keka kumua ruruuda, ma keka oli.

⁴⁹ Ma toa eki sui boo na kera thaitoomana tha Jesus, ma kini na kera lae mai iburiana too mai i Galili, keka takwe da kau, keki lio uria do eki.

⁵⁰ Ma rikia fasi, tee nonii wane thatana tha Josefa, wane ana ofu la eri, wane na abula lane lea ma kokoto.

⁵¹ (Nia e ai si ala fafia si do kera thathamii ilia ma abula lada), wane i Arimathia, toaa susu Ju ki, na kai maasia lau boo tooa tha God:

⁵² Wane eri e lae isatha Paelate, ka gania seena tha Jesus.

⁵³ Ma nia sifolaṉai nia, ka afua asi maku kwakwaoa, ma ka alua i la kwaiṉeia na kera garua i la kale, kula na kesi alua u ta wane iei.

⁵⁴ Ma fa boṉi eri Boṉi Tagudo, ma fa boṉi mamaloa ka karaṉia na mai.

⁵⁵ Ma kini eki lau boo, na kera lae mai bi nia ita mai i Galili, keka lae mai buri, keka rikia kwaiṉeia eri, ma alu la na kera alua ana seena.

⁵⁶ Ma keka oli, keka thauwai nia do makwa lea ki ma si gwai. Ma kera mamalo afa boṉi mamaloa sulaania si ṉata fifi eri.