Luke 22 - Ṉa Alaofua Falu 1923 1949

¹ Ma si maṉa eri fafaṉa ana berede e ai ta lefena iei e kwaikaraṉi na mai, na kera alaṉia ana fafaṉa Tathafafi la.

² Ma wane inoto ni foa ki bia wane ni kekeda ki kera rofe uria si ade la na keki ilia fasi keki thauṉi nia; uria na kera mau ana toa eki.

³ Sui tha Satan ka kotho i ruruuna tha Judasi na kera alaṉia atha Isikarioto, wane ana akwala ma ro nonii wane eki.

⁴ Ma nia ka lae nana, ka tamani bia wane inoto ni foa ki bia wane na kera inoto ana biu baita tha God, sulia si ade la na nia kai ilia fasi kai fale nia ifada.

⁵ Ma ka lea iada, ma keka ala fafia fale lana malefo ifana.

⁶ Ma nia ka alaṉai, ma ka rofe uria si maṉa ne ai si afetai fasi kai fale nia ifada si maṉa na malului wane kesi to isana.

⁷ Ma fa boṉi ana fafaṉa ana berede e ai ta lefena iei ka fula, fa boṉi ana kwai lana tathafafi la e ai si ei boo.

⁸ Ma nia arasia tha Pita ma tha Jone, ka una eri, Lae, moki naarea tathafafi la ifakulua, fasi kuka ania.

⁹ Ma keko soree isana, Si kula ifei no thathamia mika naare iei?

¹⁰ Ma nia ka soree isada, Rikia fasi, si maṉa na moro fula i la toaa susu, tee nonii wane kai toda ani kamaroa, kai ṉalia do kafo ni iei; moki lae iburiana uri biu na nia kai kotho iei.

¹¹ Ma moki soree isana wane ana biu eri, Wane ni kwaifamanatai e soree isamu, Nifana kadee biu na nau kwai makafa to fasi iei, kula kwai ania tathafafi la iei bia toa nau ku toleda?

¹² Ma nia kai fatai nia tee kadee biu laṉi ne baita isamaroa na do oro ni naa iei: muki naare i kula eri.

¹³ Ma keko lae, keko rikia boo si do na nia e soree isadaroa: ma keko naarea tathafafi la eri ka teo naa.

¹⁴ Ma si maṉa na kadee maṉa eri e fula naa, nia ka teoreri, ma akwala ma ro aposela ki bi nia.

¹⁵ Ma nia ka soree isada, Manataku e toea faamau, ku thathathamia faamau kwai ania tathafafi la nei bi kamulua maṉa kwasi to u ana taa la:

¹⁶ Uria nau ku soree isamulua, Nau kwasi ania lau sina, kai to uria si maṉa na kai mamana ana tooa tha God.

¹⁷ Ma nia ka ṉalia titiu, ka sore lea, ma ka sorea, Ṉalia si do eri, muki ukalia faisi kamulua:

¹⁸ Uria nau ku soree isamulua, Kwasi kuu lau ana foana faene, kai to uria si maṉa na tooa tha God kai fula.

¹⁹ Ma nia ka ṉalia berede, ka sore lea, ma ka nia, ma ka falea ifada, ka una eri, Seeku nai nia na kera falea uri kamulua: si do eri muki ilia ana manatai laku la

²⁰ Ma ka una eri lau boo ana titiu iburiana faṉa i thaulafi, ka una eri, Titiu nei ṉa alaofua falu ana abuku, ne igwa uri kamulua

²¹ Sui rikia fasi, abana wane na kai faaalamai nau e ni isaku ana tatafe nei.

²² Ma Kaluwane imole kai lae mamana boo, sulia si do kera to’oa u boo: ma sui taa la kai thauṉia wane eri na kai faaalamai nia!

²³ Ma keka soetoodalua i talaada, so ni tei iada na kai ilia si do eri.

²⁴ Ma oli susuu la ka fula lau boo i maalutada, so ni tei iada keki sorea kai baita ka tatha.

²⁵ Ma nia ka soree isada, Kiṉa Jenetaele ki keki thasi naunau uria toa eki; ma toa na kera inoto iada kera alaṉida ana toa na kera ade lea.

²⁶ Ma ni kamulua musi una eri: ma wane ne baita iamulua, nia kai ’uria susuburi; ma wane ne inoto, kai ’uria wane na kai ra.

²⁷ Uria nifana wane ne baita ka tatha, wane na kai teoreri isana faṉa, mado wane na kai ra? ta na sa wane na kai teoreri isana faṉa, mado? ma ni nau ku to i maalutamulua mala wane na kai ra.

²⁸ Ni kamulua toa na mulu toto ṉado bi nau si maṉa kera bae alinaku;

²⁹ Ma nau ku talua ta tooa ifamulua, ’uria lau boo na Maka nau e talua ifaku,

³⁰ Fasi muki faṉa ma muki kuu isana tatafe nau ana tooa nau; ma muki ono ana do ni ono la ki ana inotoa, muki wane ni kotu ki ifana tafulu kulee toa ma ro kulee toa Isirela.

³¹ Ma ṉa Lord e sorea, Saimona, Saimona, rikia fasi, tha Satan e gani kamulua ifana, fasi nia kai isu kamulua ’uria uiti:

³² Sui nau ku foa uri oe, fasi fitooa oe si sui: ma lalae o akele lau mai, oko faaṉadoa dooramu kera.

³³ Ma nia ka soree isana, Lord, nau ku to naa uria lae la bi oe i la lokafo ma uria maea.

³⁴ Ma nia ka sorea, Ku faaroṉo oe, Pita, kukua so ka ’ai itaraena e ai, maṉa nosi sorea u ana ulu fa sore lana no dora bamu iaku.

³⁵ Ma nia ka soree isada, Si maṉa ku arasi kamulua kau na ba musi ṉalia ta wai ni alumalefo, mado ta wai, mado butu ki, mulu rofea ta si do? Ma keka sorea, E ai boo.

³⁶ Mania nia ka soree isada, Ma si maṉa eri, wane ne ana ta wai ni alumalefo, kai ṉalia ana, ma ta wai lau boo: ma wane ne ai ana ta nini ni firu, nia kai usi ana tooni nia, kai usia ta do.

³⁷ Uria nau ku soree isamulua, na si do eri na kera keda kai mamana e ai si ei boo ani nau, Ma kera teemai nia bia toa na kera ilia si do na kera lufia: uria si do ki suli nau kai mamana.

³⁸ Ma keka sorea, Lord, rikia fasi, ro nini ni firu nania. Ma nia ka soree isada, Toto naa.

³⁹ Ma nia kotho mai i maa, ma ka lae, ’uria biraṉana naa, uri gwa tolo i Olifesi; ma toa nia ne toleda kera lae lau boo iburiana.

⁴⁰ Ma si maṉa ne fula naa i kula eri, nia ka soree isada Muki foa fasi musi liu i la bae aliṉa la.

⁴¹ Ma nia ka lae faisida uria si kula mada sa kera u ana fau ka fula iei; ma ka boururu ka foa,

⁴² Ka una eri, Maka ae, mado so thathamia, oki ṉalia titiu nei faisi nau: sui uria bana nau ku thathamia e ai, mamana lana ni oe.

⁴³ Ma tee angel e too mai i thalo ka fula fatai isana, kai faasukwai nia.

⁴⁴ Ma uria ne taa faamau iana nia ka bii foa fifi: ma iidana ka ’uria naa kwakwee abu baita ki kai asia i theegano.

⁴⁵ Ma si maṉa ne tatae faisia foa la, me fula isana toa nia ne toleda, nia rikida kera biṉa sulia liodila la,

⁴⁶ Ma ka soree isada, Uria ta na muki biṉa? tatae, muki foa, fasi musi liu i la bae aliṉa la.

⁴⁷ Ma si maṉa nia kai ṉata u bana, rikia fasi, malului wane, ma wane na kera alaṉia atha Judasi, wane ana akwala ma ro wane eki, e tatha inaoda; ma nia ka lae kau karaṉia tha Jesus fasi kai nonoia.

⁴⁸ Ma tha Jesus ka soree isana, Judasi oki faaalamai nia Kaluwane imole ana nonoi la?

⁴⁹ Si maṉa na toa na kera to kali nia kera thaitoomana si do na kai fula, keka soree isana, Lord, miki kwaeda ana nini ni firu?

⁵⁰ Ma tee nonii wane iada e kwaea wane ni ra aofia ni foa, ma ka kwaemusia aliṉa aola nia.

⁵¹ Ma tha Jesus e luua, ka sorea, Maṉo toto fasi. Ma nia suana aliṉana, ka faamaruki nia.

⁵² Ma tha Jesus ka soree isana wane inoto ni foa eki, bia wane na kera inoto ana biu baita tha God, ma ulunao ki, na kera lae mai isana, Mulu lae mai, mala toa na kera lae uri rau lana wane ne bili, fafia nini ni firu ki ma dia ki?

⁵³ Si maṉa nau ku toto sulia boṉi bi kamulua i la biu baita tha God, e ai musi tekwasia abamulua uria ṉali laku: sui kadee maṉa kamulua naa neri, ma sukwaia maerodo.

⁵⁴ Sui kera rau nia, keka tolea kau, ma keka tolea uria biu aofia ni foa. Ma tha Pita e lae da mai iburi.

⁵⁵ Ma si maṉa kera soonia naa era i la initoona lalabata, ma keka ono ofu naa, tha Pita ka ono i maalutada.

⁵⁶ Ma tee thari e riki nia si maṉa kai ono isana era, ma ka bubu tete uri nia, ka sorea, Wane nei e toto lau boo bi nia.

⁵⁷ Ma nia ka tofe, ka una eri, Thari ena, kwasi thaitoomana wane eri.

⁵⁸ Me ai si tau lau bana tee imole lau e riki nia, ma ka sorea, Ni oe lau boo tee wane iada. Ma tha Pita ka sorea, Wela ena, nau e ai.

⁵⁹ Ma iburiana fuliṉana tee kadee maṉa tee imole lau e ṉata seeraa, ka una eri, Wane nei lau boo e toto mamana boo bi nia: uria nia wane i Galili.

⁶⁰ Ma tha Pita ka sorea, Wela ena, kwasi thaitoomana si do noki sorea. Ma si maṉa eri u boo, si maṉa nia kai ṉata u bana, kukua ka ’ai.

⁶¹ Ma ṉa Lord e akele, ka lio uria tha Pita. Ma tha Pita ka onotoona bae lana ṉa Lord, na nia soree isana, Si maṉa na kukua e ai si ’ai u, ni oe ulu fa sore lana oki sorea o dora bamu iaku.

⁶² Ma tha Pita e kotho i maa, ka aṉiṉi ka tatai.

⁶³ Ma wane eki na keka rau atha Jesus kera aefara iana, ma keka thauṉia.

⁶⁴ Ma iburiana na kera bokosia maana, keka kwaea faisia maana, ma keka soetoona, keka una eri, Bae mala porofeta: ni tei ne kwae oe?

⁶⁵ Ma tei do oro lau kera sorea i seena, keka faretoliṉia.

⁶⁶ Ma si maṉa ne dani u boo, ulunao ana toa eki ma wane inoto ni foa ki bia wane ni kekeda ki keka ofu; ma keka talai nia isana ofu la kera, keka una eri,

⁶⁷ Ni oe ṉa Christ boo? faaroṉo kamilia. Ma nia ka soree isada, Mada sa ku faaroṉo kamulua, sa muki faamamanea e ai:

⁶⁸ Ma ni nau lau boo, mada sa ku soetoomulua, sa muki luu nau e ai, ma musi lube nau kwa lae.

⁶⁹ Too asi maṉa eri Kaluwane imole kai ono ibali aba aola ana sukwaia tha God.

⁷⁰ Ma kera sui keka sorea, Mania ni oe Kaluwane tha God boo? Ma nia ka soree isada, Mulu sorea naa; nau ni nia.

⁷¹ Ma keka sorea, Si ta lau kuki rofea toa ni faamamane lana si do kera thaitoomana uria? uria ni kulu kulu tala roṉoa si do i fokona.