Luke 21 - Ṉa Alaofua Falu 1923 1949

¹ Ma nia lio alaa, ka rikia wane na kera rikii do ki keki u asi do kera na keki tona faledaki la fuila malefo.

² Ma nia rikia lau boo tee gwa oru ne ai si rikii do bana ka u ana ro migee lifoia iei.

³ Ma nia ka sorea, Si do mamana ku soree isamulua, Gwa oru nei ne ai si rikii do e u asi do ne oro ka tatha ani kera sui boo:

⁴ Uria na toa nei ki sui boo kera u bada ana tei fo ana malefo oro kera ki isana do na kera tona falea ifatha God: ma ni nia, kai to mena ana rofe la, ka u asi do ne rikidaki sui boo.

⁵ Ma si maṉa na tei toa keki ṉata sulia biu baita tha God, na kera lauṉia asi fau lea ki ma asi do kera tona faledaki, nia ka sorea,

⁶ Ma si do nei ki na muka rikia, fa boṉi ki kai fula, na toto kesi ekwa ata fau si to fafona ta fau, keki aga teefau ania.

⁷ Ma kera soetoona, keka una eri, Wane ni kwaifamanatai ae, iaṉita na do eki kai mamana? ma nifenia bala si maṉa na do eki karaṉia keki ilia naa?

⁸ Ma nia ka sorea, Muki fia ada keki talai garo ani kamulua: uria na toa oro toto keki lae mai ana thataku, keki una eri, Nau ni nia; bia, Si maṉa ni karaṉi naa: mania musi lae iburiada.

⁹ Ma lalae muki roṉoa omea ki ma ṉalu la sulia omea ki, musi aanu: uria na kera tooa u boo sa do eki kai lae mai totonao e ai si ei; ma susui lana si do e ai si fula asi maṉa eri u boo.

¹⁰ Sui nia ka soree isada, Toa ata fanua toto keki tatae keki firu bia toa ata fanua, ma toa ta wane inoto keki firu bia toa ta wane inoto:

¹¹ Ma anunu baita ki kai liu ata fanua ma ta fanua na mai, ma unii thaofa ki, ma mataia taa ki ne sisigi; ma si do riki lana kwaifamaui ki ma bala si do baita ki kai ita mai i thalo.

¹² Ma si do totonao sui do eki ka bii fula, keki rau ani kamulua, ma keki tona ilamatai kamulua, keki fale kamulua ifana biu ni ofu la ki ma lokafu ki, keki talai kamulua inaofana kiṉa ki ma wane gwauwai ki inunufana thataku.

¹³ Si do fasi muki faamamanea si do na mulu thaitoomana.

¹⁴ Mania muki alua tee si lio ana ruruumulua, musi laloma totonao sulia si do na toto muki luuda ania:

¹⁵ Uria nau kwai falea ta fokee imole bia liotooa ifamulua, na maalimae kamulua ki sui boo toto keki dora ana luu lana ma suusi lana.

¹⁶ Ma toto maka kamulua ki ma thainamulua ki, bia dooramulua ki, ma ina lamulua kera, ma toa na muki ado ki, keki fale kamulua; ma keki adea keki thauṉia tei toa iamulua.

¹⁷ Ma toto toa ni sui keki riki kamulua ka taa inunufana thataku.

¹⁸ Ma ta kwakwee ifu ana gwaumulua so keka labatania e ai.

¹⁹ Muki ṉalia maṉomulua asi lio ni susuu la.

²⁰ Ma si maṉa na mulu rikia keki toria Jerusalema ana omea ki, si maṉa eri muki thaitoomana faafunu lana ni karaṉi naa.

²¹ Asi maṉa eri toa na kera ni Judia keki thaka ada uria gwa tolo lo ki; ma toa na kera ni initoona toaa susu eri keki lae nada faisia; ma toa na kera ni la fanua kakali ki mai kesi kotho iei.

²² Uria fa boṉi eki fa boṉi ana duu lana si do ki, fasi si do eki sui boo na kera keda kai mamana.

²³ Taa la kai thauṉia ai na kera iana ma ai na keki faasusu afa boṉi eki! uria na unii fualaṉa kai fula ana fanua nei, ma rakeiria uria toa nei.

²⁴ Ma keki mae ana ṉari lana nini ni firu, ma keki talaia toa omea e lauda uria fanua ni sui: ma Jenetaele ki keki uria Jerusalema, maasia si maṉa na si kada ana inotoa Jenetaele ki kai mamana nae.

²⁵ Ma bala si do ki kai to i la thato ma ṉa madami ma bubulu ki; ma fafia fanua nei iano unii fualaṉa toa na fanue ki, manatade rurua; amali ma lua kai kuru;

²⁶ Imole maṉoda ka ote sui sulia mau la, ma sulia fi lana si do na kai fula ana fanua nei iano: uria na do sukwai ki ana thalo lo ki keki igiigia.

²⁷ Asi maṉa eri keki rikia Kaluwane imole kai lae mai asi datha ana sukwaia ma inotoa baita.

²⁸ Sui lalae do eki e thafalia kai mamana, muki bii lio alaa, ma muki tafoa gwaumulua; uria na tae la faisi kamulua ni karaṉi naa.

²⁹ Ma nia ṉata isada asi tarifula: Muki rikia thakwari, ma ’ai ni sui bana:

³⁰ Si maṉa na keki ṉoṉothaa, muka rikia ma muki tala thaitoomana na unii thato ni karaṉi naa.

³¹ Una eri lau boo ni kamulua, lalae mulu rikia si do eki kai mamana, muki thaitoomana na tooa tha God e ni karaṉi naa.

³² Mamana ku soree isamulua, Kulee toa nei toto kesi sui u, ma si do ki sui boo kai mamana.

³³ Thalo lo ma fanua nei iano toto kai sui: ma bae laku toto si sui.

³⁴ Sui muki to kinakina ana beta lamulua la, ada ana ta si maṉa ruruumulua kai kulua asi do ne liliṉa, ma bula la na kafo bubula kai buloa imole, ma manata baita la asi do fanua nei iano ki, ma fa boṉi eri kai fula fatonamulua:

³⁵ Uria fa boṉi eri kai fula mala ta aikwai fafia toa eki sui na kera ni fafona fanua nei iano ni sui bana.

³⁶ Mania muki lio, ma muka foa ta si maṉa si ei, fasi keki ala fafi kamulua mulu farana si do eki sui bana na kai fula si fulatoomulua, ma muki takwe inaofana Kaluwane imole.

³⁷ Ma afa thato ki nia kai kwaifamanatai la biu baita tha God; ma afa rodo ki nia ka lae i thara, kai to ana i la gwa tolo na kera alaṉia ana Olifesi.

³⁸ Ma toa eki sui boo kera kalo isana afa uusuwadia ki la biu baita tha God, uria roṉo lana bae lana.