Luke 19 - Ṉa Alaofua Falu 1923 1949

¹ Ma tha Jesus e fula ma kai tatha i Jeriko.

² Ma rikia fasi, tee nonii wane thatana tha Sakiasi; ne inoto ana toa ni ṉali lana takisi ki, ma nia rikii do.

³ Ma nia rofe uria riki lana tha Jesus fasi kai thaitoomana; ma sui ka dora ania sulia toa oro eki, uria nia wane ṉuṉuru.

⁴ Ma nia ka fita nana inao, ka raa i gwauna sikomo fasi kai riki nia: uria nia kai tatha ana tala eri.

⁵ Ma si maṉa na tha Jesus e fula i kula eri, nia ka lio alaa, ka riki nia, ma ka soree isana, Sakiasi, lakwasia, oko sifo mai; uria itaraena kwai to i biu oe e ai si ei boo.

⁶ Ma nia lakwasia, ka sifo, ma ka thathagoni nia ana seethathala la.

⁷ Ma si maṉa na kera rikia, kera sui boo keka uubulu taa, keka una eri, Nia e lae kai to si ana bia wane ne abula taa.

⁸ Ma tha Sakiasi e takwe, ka soree isana ṉa Lord, Rikia fasi, Lord, ta bali ana do nau ki kwai falea ifana toa na kesi rikii do; ma mada sa nau ku ṉalia ta si do ata wane ana banigaura la, kwai oli fafia ana fai si do.

⁹ Ma tha Jesus ka soree isana, Itaraena marukia e fula i biu nei, uria na nia kaluwane tha Aberahamo lau boo.

¹⁰ Uria na Kaluwane imole e fula uria rofe lana ma faamaruki lana si do ne lalae garo.

¹¹ Ma si maṉa na kera roṉoa si do eki, nia safua ma ka ṉata asi tarifula, uria ne to karaṉia i Jerusalema, ma uria na manatade soso na tooa tha God kai fula fatai asi maṉa eri u boo.

¹² Mania nia ka sorea, Tee nonii wane inamaruki e lae uria ta fanua da, fasi ka ṉalia ana ta tooa ifana, ma ka oli mai.

¹³ Ma nia ka ailia akwalee wane ni ra nia ki, ma ka falea tafulu pauda ifada, ma ka soree isada, Muki ra ania maasi nau kwai fula.

¹⁴ Ma toa na fanua nia kera riki nia ka taa, ma keka arasia toa ni ṉaliṉata iburiana, keka una eri, Misi thathamia sa wane nei kei inoto iamilia.

¹⁵ Ma lalae mai, si maṉa ne oli lau mai, buriana ne ṉalia naa tooa eri, nia ka sorea keki ailia mai wane ni ra eki isana, na nia e falea malefo ba ki ifada, fasi nia ka thaitoomana si do na kera toda ana ra la.

¹⁶ Sui wane totonao e fula, ka una eri, Lord, pauda oe ba e toda lau tee tafulu pauda.

¹⁷ Ma nia ka soree isana, Lea neri, wane ni ra no abula lea: uria no mamana asi do ne faekwa asia, oki gwauwai ana tafulu toaa susu ki.

¹⁸ Ma ruana wane e fula, ka una eri, Lord, pauda oe ba e toda lau ta lima pauda.

¹⁹ Ma nia ka sore una eri lau boo isana, Oki gwauwai lau boo ana lima toaa susu ki.

²⁰ Ma ta wane lau e fula, ka una eri, Lord, rikia fasi, pauda oe nania, na nau ku beta mai la si maku faekwa:

²¹ Uria nau ku mau iamu, uria ni oe wane o naunau: oki tafoa si do nosi ekwatania iano, ma oki kwaia unii do ne rafo nosi afusia.

²² Ma nia ka soree isana, Sulia si do ne tatha faisia fokomu nau ṉa wane ni kotu kwai ṉata suli oe, wane ni ra no taa. O thaitoomana ni nau wane ku naunau, kwa tafoa si do na kwasi ekwatania iano, ma kwa kwaia unii do ne rafo na nau kwasi afusia;

²³ Sui nifana ade lana nosi falea malefo nau asi kula na malefo kai toda malefo, fasi lalae ku fula kwa sorea keki falea mai malefo nau bia tei malefo lau ka safua?

²⁴ Ma nia ka soree isana toa na keki takwe isada, Ṉalia pauda eri faisi nia, muki falea ifana wane eri ne ana tee tafulu pauda.

²⁵ Ma keka soree isana, Lord, nia ana tee tafulu pauda.

²⁶ Uria nau ku soree isamulua, na ni tei ne rikia si do, keki falea si do ki ifana; ma wane ne ai ana ta si do, si do ne rikia mena keka ṉalia faisi nia.

²⁷ Ma maalimae nau ba ki, na kesi thathamia kwai inoto iada, muki talaida mai, muki thauṉida inaofaku.

²⁸ Ma si maṉa ne ṉata naa una eri, nia ka lae inao, kai tae uri Jerusalema.

²⁹ Ma lalae mai, si maṉa ne fula karaṉia Bethefage ma Bethani, isana gwa tolo na kera alaṉia ana Olifesi, nia ka arasia ro wane ana toa nia ne toleda,

³⁰ Ka una eri, Moki lae i la toaa faekwa na ni otofamaroa; toaa na lalae moro fula iei do moki fulatoona tee kalee ase na kera kania, na ta wane si ono u i suila: lubea, moki talaia mai.

³¹ Ma mada sa ta wane kai soetoomaroa, Uria ta na moki lubea? moki una eri isana, Uria na ṉa Lord e thathamia.

³² Ma wane ne arasida keko lae nadaroa, ma keko rikia si do ka ’uria boo si do ne soree isadaroa.

³³ Ma si maṉa na keki lubea kalee ase eri, toa na do kera keka soree isadaroa, Uria ta na moki lubea kalee ase ena?

³⁴ Ma keko sorea, Ṉa Lord e thathamia.

³⁵ Ma kero talaia mai isatha Jesus: ma keka naṉa ana tooni kera ki i fafona kalee ase eri, ma keka finua tha Jesus ka ono i fafona.

³⁶ Ma si maṉa nia kai lae, keka regweta tooni kera ki sula tale.

³⁷ Ma si maṉa nia fula karaṉi naa, ana si tala toli i gwa tolo i Olifesi, malului wane eki sui boo ana toa ne toleda keka bii seethathala ma keka taṉoa tha God ana ’ai la baita fafia si ra baita eki sui boo na kera rikia;

³⁸ Keka una eri, Lea iana, Kiṉa eri ne fula ana thatana tha Lord: enenoa i thalo lo, ma inotoa asi kula da ia ka tatha.

³⁹ Ma tei Farisi ana malului wane eki keka soree isana, Wane ni kwaifamanatai, oki sorea toa oe noki toleda.

⁴⁰ Ma nia luuda, ka soree isada, Ku faaroṉo kamulua, mada sa toa nei keki bona, fau ki kai ’ai si maṉa eri u boo.

⁴¹ Ma si maṉa ne fula karaṉi naa, nia rikia toaa susu eri ma ka aṉi sulia,

⁴² Ka una eri, Mado so thaitoomana, ni oe boo, itaraena mena afa boṉi oe, si do ana enenoa oe ki! ma si maṉa eri kera thaufuni naa faisia maamu.

⁴³ Uria na fa boṉi ki kai fulatoomu, na maalimae oe ki keki lakali faisi oe, ma keki to kali oe, ma keki suusi oe ta si kula si ei,

⁴⁴ Ma keki naṉatai oe i theegano, ma wela oe ki na kera ni isamu; ma kesi akwasia ta fau isamu fafona ta fau; uria nosi thaitoomana si maṉa ana thai la suli oe.

⁴⁵ Ma nia ka kotho i la biu baita tha God, ma ka bii taria toa na keki usi asi do ki iei, bia toa na keki usido,

⁴⁶ Ka una eri isada, Kera keda, Biu nau biu ni foa la: ma kamulua mulu adea biu nau ṉa maufi toa na keki laulau.

⁴⁷ Ma nia kai kwaifamanatai sulia boṉi la biu baita tha God. Ma wane inoto ni foa ki bia wane ni kekeda ki bia toa inoto ana toa eki kera rofe uri thauṉi lana:

⁴⁸ Ma keka dora ana rofetoona lana si do fasi mado e ai keki ilia; sulia na toa eki sui bana kera atabubu uri nia, keki roṉo uria ṉata lana.