Luke 18 - Ṉa Alaofua Falu 1923 1949

¹ Ma nia ṉata sulia si tarifula isada uria si kula eri, so e lea na imole keki foa ṉado, ma kesi feda faisia;

² Ka una eri, Tee wane ni kotu e to i la tee toaa susu, ne ai si mau atha God, me ai si madoa ta wane:

³ Ma tee gwa oru e to i la toaa susu eri; ma nia kai fufula isana, ka una eri, Oko soboṉi nau fafia maalimae nau.

⁴ Ma nia e ai si makee ilia: ma iburiana nia ka sorea i ruruuna, Kwasi mau mena atha God, ma kwasi madoa ta wane;

⁵ Sui uria na gwa oru nei kai faafeda nau, kwai soboṉi nia, ada kai susuu fafi nau sulia fula ṉado lana.

⁶ Ma ṉa Lord ka sorea, Roṉoa fasi si do na wane ni kotu eri ne ai si kokoto e sorea.

⁷ Ma tha God ka ai si soboṉia toa ne filida, na keki ’ai thatana afa thato mafa rodo, nia ka to mena asi lio ne ai si rakeiri fofoa sulida?

⁸ Nau ku soree isamulua, nia kai soboṉida si tau lau. Ma sui lalae Kaluwane imole kai fula, nia kai rikia fitooa ana fanua nei iano?

⁹ Ma nia ṉata asi tarifula nei isana tei imole na kera manata ṉado ani kera i talaada na kera kokoto, ma kera fare faekwa ana toa eeta:

¹⁰ Ro nonii wane kera tae uri la biu baita tha God fasi keko foa; ta wane ṉa Farisi, ma ruana wane ṉa wane ni ṉali lana takisi ki.

¹¹ Farisi eri e takwe kai foa una eri ana i talaana, God ae, ku sore lea tale oe, na nau kwasi ’uria oroṉana toa, toa na keki laulau, toa na kesi kokoto, toa na kera oe, ma wane nei ni ṉali lana takisi ki mena e ai kwasi ’uria.

¹² Nau ro fa abu la ana faṉa afa uiki; ku falea taṉafula asi do ki sui bana na nau ku alua.

¹³ Ma wane eri ni ṉali lana takisi ki e takwe da mai, ma nia boro so maana mena ka lalakwee tafoa uri thalo lo, ma ka kumua ruruuna, ka una eri, God ae, oko tatakomi nau wane ku abula taa.

¹⁴ Nau ku soree isamulua, Wane eri e sifo uri biu nia kera sorea nia kokoto, ma ruana wane e ai: uria ni tei na kai tala faainoto nia i talaana keki faafaekwa nia; ma wane na kai tala faafaekwa nia i talaana keki faainoto nia.

¹⁵ Ma kera talaia lau bomai wela faekwa ki isana, fasi nia kai suada: ma si maṉa na toa ne toleda kera rikia, keka soreda:

¹⁶ Ma tha Jesus e ailida isana, ka una eri, Alamatania kala wela keka lae mai isaku, ma musi lufida: uria na toa na kera ’urida kera ni ana tooa tha God.

¹⁷ Mamana ku soree isamulua, Ni tei bana ne ai si ṉalia tooa tha God mala ta wela faekwa, e ai dodoloa nia ka fulatoona.

¹⁸ Ma tee wane gwauwai, e soetoona, ka una eri, Wane ni kwaifamanatai ae, oe na abula lamu e lea, si ta na kwai ilia fasi kwai fulatoona marukia tatha?

¹⁹ Ma tha Jesus ka soree isana, Uria ta oko alaṉi nau so ku abula lea? e ai ta wane si abula lea, tee tha God boo.

²⁰ O thaitoomana si ṉata fifi ba ki, Osi oee, Osi thathauwane, Osi bibili, Osi lolole fafia ta imole, Fare baita ana maka oe ma thainamu.

²¹ Ma nia ka sorea, Si do eki sui bana ku adede sulia ita na ku faekwa.

²² Ma si maṉa na tha Jesus e roṉoa si do eki, nia ka soree isana, Tee do e ai u faisi oe: oki usi asi do oe ki sui boo no rikidaki, ma oki toliṉia faisia toa na kesi rikii do, ma toto oki rikia ogogonia i thalo: ma lae mai, oki lae iburiaku.

²³ Ma si maṉa nia roṉoa si do eki, nia ka liodila faamau; uria nia rikia do oro.

²⁴ Ma si maṉa na tha Jesus e rikia na nia liodila faamau, nia ka sorea, E afetai faamau sa toa na kera rikii do keki kotho ana tooa tha God!

²⁵ E sukani afetai ana kamela kai tatha i maana ogila, me afetai faamau ana wane ne rikii do kai kotho ana tooa tha God.

²⁶ Ma toa na kera roṉoa keka sorea, Ni tei fetei keki faamarukia?

²⁷ Ma nia ka sorea, Si do na imole si talaana ili lana tha God e talaana.

²⁸ Sui tha Pita ka sorea, Rikia fasi, kamilia mili akwasia si do ki sui bana, ma mika lae iburiamu.

²⁹ Ma nia ka soree isada, Mamana ku soree isamulua, E ai ta wane ne akwasia maafera nia, mado maka nia ma thainana, mado doo rana kera, mado kwaina, mado wela nia ki, inunufana tooa tha God,

³⁰ Na toto si ṉalia do oro asi maṉa eri fuliṉana do ne akwasidaki, ma asi kada na ni u marukia tatha.

³¹ Ma nia ka ailia akwala ma ro wane eki isana, ma ka sorea isada, Rikia fasi, kuki tae uri Jerusalema, ma si do ba ki sui bana na porofeta ki kera keda sulia Kaluwane imole kai mamana.

³² Uria na keki fale nia ifana Jenetaele ki, keki aefara iana, keka ṉaṉasuala uri nia, ma keka ṉisufia:

³³ Ma keki kwae tataria ana suila ma keki thauṉi nia: ma ana ula fa boṉi nia kai tatae lau.

³⁴ Me ai kesi thaitoomana maalutana ta si asi do eki; ma si ṉata eri e thaufuni faisida, ma kesi thaitoomana si do na kera soredaki.

³⁵ Ma lalae mai, si maṉa ne lae mai karaṉia i Jeriko, tee nonii wane maane rodo e ono i ninimana tale, kai gani:

³⁶ Ma nia roṉoa malului wane kai tatha, ka soetoona i maalutana si do eri.

³⁷ Ma kera faaroṉo nia, na tha Jesus, wane i Nasaretha, kai tatha.

³⁸ Ma nia ’ai, ka una eri, Jesus, kaluwane tha Defeta, oki tatakomi nau.

³⁹ Ma toa na kera tatha inao keka sore nia, fasi nia kai bona: ma nia ka bii ’ai faamau, Kaluwane tha Defeta, oki tatakomi nau.

⁴⁰ Ma tha Jesus e takwe ṉado, ka sorea keki talai nia mai isana: ma si maṉa ne fula karaṉi mai, nia ka soetoona,

⁴¹ Ka una eri, Si ta no thathamia kwai ilia ani oe? Ma nia ka sorea, Lord, ku thathamia kwai lio.

⁴² Ma tha Jesus ka soree isana, Oki lio boo: fitooa oe e faamaruki oe.

⁴³ Ma si maṉa eri u boo nia ka lio, ma ka lae iburiana, kai taṉoa tha God: ma toa eki sui bana, si maṉa na kera rikia, keka fare inoto atha God.