Luke 15 - Ṉa Alaofua Falu 1923 1949

¹ Sui toa eki sui bana ni ṉali lana takisi ki bia toa na kera abula taa keka idu karaṉi nia fasi keki roṉoa ṉata lana.

² Ma Farisi ki bia wane ni kekeda ki keka ubulutai nia, keka una eri, Wane nei kai thathagonia toa na kera abula taa, ma kai faṉa bida.

³ Ma nia ka ṉata asi tarifula eri isada, ka una eri,

⁴ Nifana wane iamulua, ana ta talaṉee sifi, mada sa tee do iada ka aana, si ekwa ana sikwa tafulu sifi ma sikwa sifi eki la fanua kwasi, si lae iburiana do ne aana, ma rorofe kai rikia boo?

⁵ Ma lalae e rikia naa, nia ka alua i gwauna abana, kai seethathala.

⁶ Ma lalae e fula naa i la toaa, nia ka ailia toa ne ado bida ma toa nia ki keki ofu, kai una eri isada, Muki seethathala bi nau, uria na ku rikia naa sifi nau ba ne aaana.

⁷ Nau ku soree isamulua, una eri lau boo seethathala la kai ni thalo lo fafia tee wane ne abubula taa ne akeletania manatana, kai tatha ana sikwa akwalee imole ma sikwa imole kokoto ki, ne ai ada ta si do fasi keki akeletania manatada faisia.

⁸ Mado nifana kini ne ana akwalee malefo ana silifa, mada sa ta tee fa do e aana faisi nia, e ai si faatharua laeta, si kaofia i la maafera eri, si rofe taiṉei, rorofe kai rikia boo?

⁹ Ma lalae e rikia naa, nia ka ailia toa ne ado bida ma toa nia ki keki ofu, kai una eri, Muki seethathala bi nau, uria na ku rikia naa do nau ba ne aaana.

¹⁰ Una eri lau boo, nau ku soree isamulua, seethathala la ni inaofana angel tha God ki fafia tee wane ne abubula taa ne akeletania manatana.

¹¹ Ma nia ka sorea, Tee nonii wane ana ta ro kaluwane:

¹² Ma ai buri ani keroa ka soree isana maka nia, Maka ae, oko falea si do thataku ki na kera talua naa ifaku. Ma nia ukalia do nia ki faisidaroa.

¹³ Me ai tei fa boṉi si oro iburiana, kaluwane buri eri ka ofua si do ki sui bana, ma ka lae ana laea nia uria ta fanua da; ma i kula eri nia ka faakoka si do nia ki ana abula la ne taa ka thasiasia.

¹⁴ Ma iburiana ne arua si do eki ka daṉa, unii thaofa fualaṉaa ka liufia fanua eri; ma nia ka to ana rofe la.

¹⁵ Ma nia lae ka adomai nia bia ta wane i fanua eri; ma nia ka arasi nia i la ra nia ki kai fale ana botho ki.

¹⁶ Ma nia thathamia faamau sa kai abusu ana foana ’ai na botho keki ania: me ai ta wane si fale iana.

¹⁷ Ma lalae e manata naa, nia ka sorea, Toa ni ra maka nau na nia kai usida kera oro mena, berede kera e talaada ma kai teo, ma nau kwai mae ana thaofa!

¹⁸ Nau kwai tatae, kwai lae isana Maka nau, ma kwai soree isana, Maka ae, nau ku abula taa ana thalo, ma ku abula taa ani oe:

¹⁹ Me ai kwasi farana naa sa keki alaṉi nau ana kaluwane oe: oko alu nau kwai ’uria ta wane ana wane ni ra oe ki noki usida.

²⁰ Ma nia tatae, ka lae mai isana maka nia. Ma si maṉa ne ni da u mai, maka nia ka riki nia, ma ka tatakomi nia, ma ka fita, ka kalilua bia, ka nonoia.

²¹ Ma kaluwane eri ka soree isana, Maka ae, nau ku abula taa ana thalo, ma ku abula taa ani oe: me ai kwasi farana naa sa keki alaṉi nau ana kaluwane oe.

²² Ma maka nia ka soree isana wane ni ra nia ki, Ṉalia mai tooni ne lea ka tatha, muki faatooni nia ania; ma muka alua ta kome ana abana ma butu ki ana aaena:

²³ Ma muka tolea mai kalee buloka ne gwagwarurutaa, muka kwaia, kuki ania, kuka seethathala:

²⁴ Uria na kaluwane nau nei e mamae, ma ka maruki lau; e aaana naa, ma keka rikia lau. Ma keka bii seethathala.

²⁵ Ma ulunao nia e to i la ra: ma si maṉa ne lae mai ka fula karaṉia biu, nia ka roṉoa aga ma wae la.

²⁶ Ma nia ka ailia ta wane ana toa ni ra, ma ka soetoona uria maalutana si do eki.

²⁷ Ma nia ka soree isana, Dooramu e fula; ma maka oe e kwaia kalee buloka ba ne gwagwarurutaa, uria ne riki nia lau, ta si do si uria.

²⁸ Ma nia rakeiri, ma ka lalakwee kotho i biu: mania maka nia ka kotho i maa, ka mamasoroa.

²⁹ Ma nia luua, ka soree isana maka nia, Lio fasi, fa ṉali oro eki nau ku ra iamu, ma kwasi ade faisia ṉata lamu ta si maṉa: ma sui osi falea ta kalee gota ifaku ta si maṉa, fasi kwa seethathala bia toa na ku ado bida:

³⁰ Ma si maṉa u boo na kaluwane oe nei e fula, ne labatania si do oe ki bia sesele ki, oko kwaia bamua kalee buloka ba ne gwagwarurutaa ifana.

³¹ Ma nia ka soree isana, Kaluwane nau, o to ṉado bi nau, ma si do nau ki sui bana si do oe ki.

³² Si do e lea na kuki seethathala ma kai lea iakulua: uria na dooramu nei e mamae, ma ka maruki lau; e aaana naa, ma keka rikia lau.