Luke 14 - Ṉa Alaofua Falu 1923 1949

¹ Ma lalae mai, si maṉa nia kotho i la biu tee wane ana toa inoto ana Farisi ki fasi kai ania berede afa boṉi mamaloa, keki lio uri nia.

² Ma rikia fasi, tee nonii wane e to inaofana na si kafo e uluṉia seena.

³ Ma tha Jesus e luuda, ka soree isana toa ni kwaifamanatai ana ṉa lo bia Farisi ki, ka una eri, Kera alamatania faamaruki lana imole afa boṉi mamaloa?

⁴ Ma keka bona bada. Ma nia tolea, ka faamarukia, ma ka alamatania ka lae.

⁵ Ma nia luuda, ka una eri, Nifana wane iamulua ne ana ta ase mado ta buloka ne aru i la malaui kafo, ma ka ai si kwaua si maṉa eri u boo afa boṉi mamaloa?

⁶ Ma keka dora ana luu lana lau sulia si do eki.

⁷ Ma nia ṉata asi tarifula isana toa na kera laefida mai, si maṉa ne rikia na keki firia si kula inoto ni ono la ki; ka una eri isada.

⁸ Lalae ta wane kai laefi oe mai isana fafaṉa ana lumaa, osi teoreri asi kula ni ono la ne inoto ka tatha; ada nia ka laefia mai ta wane ne inoto ka tatha ani oe,

⁹ Ma wane ne laefi kamaroa kai fula, kai soree isamu, Falea si kula eri ifana wane nei; ma oko bii lae bamu ana seenonia, oko to asi kula wane ne kelawanea asia boo.

¹⁰ Lalae kera laefi oe mai, oki lae, oki teoreri asi kula wane ne kelawanea asia boo; fasi lalae wane ne laefi oe mai e fula, nia kai soree isamu, Wane lea nau, oki tae mai uri si kula ne inoto: ma oki bii fulatoona fare baita la inaofana toa eki sui na keki teoreri isana faṉa la bi oe.

¹¹ Uria ni tei bana na kai tala faainoto nia i talaana, keki faafaekwa nia; ma wane na kai tala faafaekwa nia i talaana, keki faainoto nia.

¹² Sui nia ka sorea lau boo isana wane eri ne laefi nia mai, Lalae o thasi faṉa i la thato mado i thaulafi, osi laefia toa na kera ado bi oe, mado Jooramu kera, mado ina lamu kera, mado toa oe ki na kera rikii do; ada keki laefi oe lau boo, ma keki duua si do eri ifamu.

¹³ Lalae o thasi faṉa, oko laefia toa na kesi rikii do, ma toa na ta si kula iada e kodo, toa aede katu, toa maade rodo:

¹⁴ Ma ni oe kai lea iamu; uria na kesi talaana duu lana si do eri ifamu: uria na toto keki duua si do eri ifamu asi maṉa na tatae lana toa kera kokoto.

¹⁵ Ma si maṉa na tee wane ana toa na kera teoreri bi nia isana faṉa la e roṉoa do eki, nia ka soree isana, Lea iana, wane na kai ania berede ana tooa tha God.

¹⁶ Sui nia ka soree isana, Tee nonii wane e thasi faṉa ne baita i thaulafi; ma nia ka laefia toa oro:

¹⁷ Ma nia arasia kau wane ni ra nia i thaulafi fasi kai soree isana toa na kera laefida, Muki lae mai; uria si do ki sui bana kera alua naa maasi kamulua.

¹⁸ Ma kera sui boo kera alua tee si lio, keka fofo asi do ki. Wane totonao ka soree isana, Nau ku usia naa tee gano, kwai lae e ai si ei boo kwai rikia: ku ṉata kwaitakoi isamu, oki ṉata fasi keki doanita ani nau.

¹⁹ Ma ta wane lau ka sorea, Nau ku usia lima ioka ana buloka, ma kwai lae kwai ilitooda: ku ṉata kwaitakoi isamu, oki ṉata fasi keki doanita ani nau.

²⁰ Ma ta wane lau ka sorea, Nau ku tolekini naa, mania ku dora ana lae la kau.

²¹ Mania wane ni ra eri e fula, ka faaroṉoa wane inoto nia asi do eki. Ma wane ana biu eri, uria ne rakeiri, ka soree isana wane ni ra nia, Lae fofoa sula tala rerebaa ki bia tala faekwa ki ana toaa susu, oko tolea mai toa kesi rikii do ma toa na ta si kula iada e kodo ma toa aede katu ma toa maade rodo.

²² Ma wane ni ra eri ka sorea, Lord, si do no faaroṉo ania kera ilia naa, ma ta si kula kai tona to u bana.

²³ Ma wane inoto eri ka soree isana wane ni ra eri, Lae sula tala ana toaa faekwa ki ma i buira lakali ki, ma oki suuwai kera keka lae mai, fasi biu nau kai fuṉu.

²⁴ Uria nau ku soree isamulua, E ai ta wane ana toa ba ki na nau ku laefida mai si anitoona ta si ana faṉa i thaulafi nau.

²⁵ Ma malului wane baita ki kera lae bi nia: ma nia akele, ka soree isada,

²⁶ Mada sa ta wane ka lae mai isaku, me ai si lalakwatania maka nia, ma thainana, ma kwaina, ma wela nia ki, ma doorana kera, ma wai waena nia ki, iu, ma manoṉa lau boo, nau sa kwa tole nia e ai.

²⁷ Ma ni tei bana ne ai si ṉalia ’ai rarafolo nia, si lae mai iburiaku, nau sa kwa tole nia e ai.

²⁸ Uria nifana wane iamulua, ne thathamia kai kasia ta faelaṉi ni toi la, si ono totonao si teemai nia malefo na kai lae uria, mada sa nia alua malefo ne talaana faasui lana?

²⁹ Ada mado e ai, buriana ne alua gwa fau totonao ki, ma ka dora ana faasui lana, toa eki sui boo na kera rikia keka aefara iana,

³⁰ Keki una eri, Wane nei e thafalia kasibiu la, sui ka dora ana faasui lana.

³¹ Mado nifana kiṉa, si maṉa ne thafalia kai lae fasi kai firu bia ruana kiṉa, si ono totonao, si ṉata sulia ade la na keki ilia, mada sa nia lae bia molee wane kai farana kai toda ana wane na kai lae mai bia ro molee wane kai firu bi nia?

³² Fasi mada se ai, si maṉa na ruana kiṉa e ni da u mai, nia kai arasia toa ni ṉaliṉata, kai rofe uria si ade la na kai ilia fasi e ai kesi firu.

³³ Mania kai una eri lau boo, ni tei bana iamulua ne ai si luka teefau asi do ne rikidaki, nau sa kwa tole nia e ai.

³⁴ Solita e lea: sui mada sa solita eri e ai si amalila naa, si ta na keki faaamalila ania?

³⁵ E ai si lea naa uria alu lana i la si gano mado i la taerau ana faatae lana si do ki: keki u ania i thara. Wane ana ta ro aliṉa uria roṉo la, nia kai roṉoi fasi.