Luke 13 - Ṉa Alaofua Falu 1923 1949

¹ Ma tei toa kera to i kula eri asi maṉa eri na kera faaroṉo nia sulia tai toa i Galili, na abuda tha Paelate e dola ana do ni foa la kera ki.

² Ma tha Jesus e luuda, ka soree isada, Manatamulua e soso na toa eki i Galili kera abula taa ka tatha ana toa nai Galili sui boo, sulia na do taa eki e urida?

³ Nau ku soree isamulua, E ai: ma sui, mada se ai musi akeletania manatamulua, toto ni kamulua sui muki mae una eri.

⁴ Mado akwala ma kwalu imole ba ki, na faelaṉi ni toi la i Saeloama e aru fafida, ma ka thauṉida, manatamulua e soso ni kera kera abula taa ka tatha ana toa eki sui boo na kera to i Jerusalema?

⁵ Nau ku soree isamulua, E ai: ma sui, mada se ai musi akeletania manatamulua, toto ni kamulua sui muki mae una eri.

⁶ Nia ṉata sulia si tarifula nai lau boo; Tee nonii wane ana tee thakwari na kera fasia i la oolee faene nia; ma nia fula ka rofea foee do i gwauna, ma ka ai si rikia ta do.

⁷ Ma nia ka soree isana wane ni ra ana oolee faene nia, Rikia fasi, ulu fa ṉali eki nau ku fula ku rofea foee do ana thakwari nei, ma kwasi rikia ta do: kasia; uria ta na kai faathaefera ṉa gano eri?

⁸ Ma nia luua, ka soree isana, Lord, alua kai to si ana afa ṉali nei lau boo, kwai ili fasi kalia, ma kwai tharea:

⁹ Ma mada sa kai fuṉu, lea; mada se ai, oko bii kasia.

¹⁰ Ma nia kai kwaifamanatai i la ta biu ana biu ni ofu la ki afa boṉi mamaloa.

¹¹ Ma rikia fasi, tee kini na spirit ana feda la e thauṉi nia sulia tee tafulu fa ṉali ma kwalu fa ṉali; ma ai eri ka lolosi, me ai dodoloa ka thaitoomana thagasuli la.

¹² Ma si maṉa na tha Jesus e riki nia, nia ka ailia, ma ka soree isana, Kini ena, kera lube oe naa faisia feda la oe.

¹³ Ma nia ka alua ro aba nia ki fafi nia: ma si maṉa eri u boo kera kokotoa, ma nia ka taṉoa tha God.

¹⁴ Ma wane ne gwauwai ana biu ni ofu la e luuda ana rakeaṉoṉoa, sulia tha Jesus e kwaifaamaruki afa boṉi mamaloa, ma ka soree isana toa eki, Ono fa boṉi kai to bana ne lea na imole keki ra ania: mania afa boṉi eki muki lae mai keki faamaruki kamulua, ana fa boṉi mamaloa ka ai.

¹⁵ Mania ṉa Lord e luu nia, ka sorea, Oe wane o olodola, ta na sa kamulua sui, ta wane si ei, afa boṉi mamaloa muki lukea buloka kamulua mado ase kamulua faisia si kula ni faṉa, ma muki talaia uria faakuufai lana, mado?

¹⁶ Me ai si lea na kini nei, uria nia thari tha Aberahamo, na tha Satan e kania, nania, sulia tafulu fa ṉali ma kwalu fa ṉali, e ai si lea na keka lukea si do nai na kera kania faisi nia afa boṉi mamaloa?

¹⁷ Ma iburiana ne sorea si do eki, ka faaseenoni ana maalimae nia ki sui boo: ma toa eki sui boo kera seethathala sulia si do inoto eki sui boo na nia e ilia.

¹⁸ Mania nia ka sorea, Tooa tha God e ’uria na ta? ma si ta na kwai toolaṉai nia ania?

¹⁹ E ’uria foee masitata, na tee wane e ṉalia, ma ka u ania i la ra nia; ma ka tae, ka tae alaa ana ’ai baita; ma thaaro i mamatalea ki kera liki ana tharana.

²⁰ Ma sui lau nia ka sorea, Si ta na kwai toolaṉai nia ana tooa tha God?

²¹ E ’uria lefena, na tee kini e ṉalia, ka thaufunia i la ulu mae do ana mila, maasia si maṉa ka dola ka sui.

²² Ma nia ka liu i la toaa susu ki ma toaa faekwa ki, kai kwaifamanatai, ma kai lae uri Jerusalema.

²³ Ma tee nonii wane ka soree isana, Lord, toa eki kera ununa na kera faamarukida? Ma nia ka soree isada,

²⁴ Muki aṉasi uria kotho la ana maethaka ne sisikofi: uria nau ku soree isamulua, toa oro toto keki rofe uria kotho la, ma kesi talaana.

²⁵ Lalae si maṉa na wane ana biu e tatae naa, ma ka fonoa naa olofolo, ma muki takwe i maa, muki kikidi ana olofolo eri, muki una eri, Lord, Lord, oki ifini kamilia; ma nia kai luu kamulua, kai soree isamulua, Kwasi thaitoomana si kula na mulu too mai iei muka lae mai;

²⁶ Ma ni kamulua fasi muki una eri, Kamilia mili faṉa ma mili kuu inaofamu, mo kwakwaifamanatai sula tala kamilia ki;

²⁷ Ma nia kai sorea, Ku faaroṉo kamulua, Kwasi thaitoomana si kula na mulu too mai iei muka lae mai; lae kau faisi nau, kamulua sui toa na mulu ra ana ra na kera lufia.

²⁸ Si kula ana aṉi la ma didilifo la, lalae mulu rikia tha Aberahamo, ma tha Aesaka, ma tha Jekofo, ma porofeta ba ki sui boo, ana tooa tha God, ma ni kamulua keki sui kamulua i maa.

²⁹ Ma keki too mai ibali tae lana thato ma ibali su lana thato, i notoa ma i mutana, keki lae mai ma keki teoreri ana tooa tha God.

³⁰ Ma rikia fasi, tei toa na kera aru buri toto keki tatha inao, ma tei toa na kera tatha inao toto keki aru buri.

³¹ Afa boṉi eri boo tei Farisi ki kera fula, keka una eri isana, Oko lae i thara, oko lae faisia fanua nei: uria na tha Heroda e thathamia faamau kai thauṉi oe.

³² Ma nia ka soree isada, Lae, muki faaroṉoa fokisi eri, Rikia fasi, nau ku arasia spirit taa ki ma ku faamarukia mataia ki itaraena ma usuwadi, ma ula naa fa boṉi keki faasukwai teefau ani nau.

³³ Ma sui kwai liu e ai si ei boo itaraena ma i usuwadi ma i fafone: uria na do e afetai so ta porofeta kai mae asi kula eeta faisia Jerusalema.

³⁴ Jerusalema, Jerusalema no thauṉia porofeta ki, ma oko ufauna toa na kera arasia mai isamu! si maṉa oro sa kwai ofua wela oe ki, mala kukua na kai ofua kaela i fara kukubana, ma muka lalakwa!

³⁵ Rikia fasi, biu kamulua keka akwasia ifamulua ka gwau: ma mamana ku soree isamulua, Musi riki nau, lalae ka fula asi maṉa na muka sorea, Lea iana, wane na kai lae mai ana thatana tha Lord.