Luke 11 - Ṉa Alaofua Falu 1923 1949

¹ Ma lalae mai, si maṉa nia kai foa ana tee si kula, lalae e sui, tee nonii wane ana aini toa nia ne toleda e soree isana, Lord, oki to’oa foa la isamilia, ’uria lau boo na tha Jone e to’oa isana toa nia ne toleda.

² Ma nia ka soree isada, Si maṉa na muki foa muka sorea, Maka kamilia no ni thalo, Keki faaabua thatamu. Tooa oe kai lae mai. Keki ilia si do no thathamidaki iano kai ’uria lau boo i thalo.

³ Oki falea mai faṉa kamilia itaraena kai talaana itaraena.

⁴ Ma oki manata lube kamilia ana abula taa la kamilia ki; uria ni kamilia lau boo miki manata lubea toa eki sui boo na keki abula taa iamilia. Ma osi talai kamilia isana bae aliṉa la; oki suusi kamilia faisia taa la.

⁵ Nifana wane iamulua ne ana tee wane ne ado bi nia, ka lae isana i la initoona rodo, ma kai soree isana, Wane lea nau ae, oki falea si mai ta ulu fa bisikete ifaku;

⁶ Uria na tee wane na mere ado e lae mai ana laea nia, ka fula isaku, ma ni nau e ai ta si do fasi kwai alua inaofana;

⁷ Ma nia to i la maafera ka luua mai, ka sorea, Osifaafeda nau: maa eri kera fonoa naa, ma wela nau ki kera ni isaku i la thamataia: ku dora ana tatae la kwai fale amua?

⁸ Nau ku soree isamulua, Nia si tatae mena si falea, uria nia wane na kero ado, ma sui, uria ne seeraraa ana gani la, nia kai tatae, ka fale sulia rofe la ne rofea.

⁹ Ma nau ku soree isamulua, Muki gani, ma keki fale ifamulua; muki rofe, ma muka rikia; muki kikidi, ma keki ifini kamulua.

¹⁰ Sulia ni tei na kai gani kai ṉali; ma wane na kai rofe kai rikia; ma wane na kai kikidi keki ifi uri nia.

¹¹ Mada sa kaluwane nia kai gania berede ana ta wane iamulua ne welaa, nia ka falea si fau ifana? mado e gania ta ia, nia ka tala ia ana wa aala?

¹² Mado nia gania thalui thaaro, nia ka falea fafari ifana?

¹³ Mania mada sa ni kamulua, toa na mulu taa, muki thaitoomana fale lana si do lea ki na keki tona falea ifana wela kamulua ki, ta na sa fale la ne tatha na Maka kamulua kai fale ana Spirit Abu ifana toa na keki gani nia, mado?

¹⁴ Ma nia kai arasia spirit taa, ma do eri fokone ato. Ma lalae mai, si maṉa na spirit taa e lae naa, fokoato eri ka bae; ma toa eki kera kwele.

¹⁵ Ma tei wane iada keka sorea, Nia kai arasia spirit taa ki atha Bielasibaba ne inoto ana spirit taa ki.

¹⁶ Ma tei wane lau kera ilitoona, kera thathamia nia ka fatai nia bala si do i thalo mai.

¹⁷ Ma ni nia, uria ne thaitoomana manatada, ka soree isada, Tooa ni sui bana na keki tala firu bi kera i talaada keki funu; ma biui wane na keki tala firu bi kera i talaada keki sui.

¹⁸ Ma mada sa tha Satan lau boo kai tala firu bi nia i talaana, tooa nia kai ṉado ufita? uria na mulu sorea nau ku arasia spirit taa eki atha Bielasibaba.

¹⁹ Ma ni nau mada sa kwai arasia spirit taa ki atha Bielasibaba, kaluwane kamulua ki keki arasida ani tei? mania keki wane ni kotu kamulua ki.

²⁰ Ma ni nau mada sa kwai arasia spirit taa ki ana kukuna tha God, tooa tha God e fula naa isamulua e ai si ei boo.

²¹ Si maṉa na wane sukwai ne rau lea kai toofolo faisia labata nia, do nia ki kai to ana enenoa:

²² Sui lalae ta wane ne sukwai ka tatha ani nia e fulatoona, ma si nia e tatha fafi nia, nia ka ṉalia rauma nia ki sui boo ne fifitoona faisi nia, ma ka lagua si do nia ki, ka ukalia.

²³ Wane ne ai si ado bi nau kai firu bi nau; ma wane ne ai si ofudo bi nau kai u tataka.

²⁴ Si maṉa na spirit taa e lae naa faisia wane, kai tatha asi kula ne ai ta kafo iei ki, kai rofea mamaloa; ma si maṉa ne ai si rikia, nia ka sorea, Nau kwai oli lau bakua uri biu nau na nau ku lae mai faisia.

²⁵ Ma si maṉa nia fula, nia ka rikia kera kaofia ma kera lauṉia naa.

²⁶ Ma nia lae, ka talaia lau mai ta fiu spirit lau bi nia na kera taa ka tatha ani nia; ma kera kotho kau, keki to nada iei: ma to lana wane eri iburi ka bii taa ka tatha ana to la nai nao.

²⁷ Ma lalae mai, si maṉa nia kai sorea si do eki, tee kini ana toa eki e ’ai ana ’ai la baita, ka soree isana, Lea iana, rakena ai ne kwalafi oe, ma uumu no susufia.

²⁸ Ma nia ka sorea, Iu, ma si do ne lea ka tatha nania, lea iada, toa na kera roṉoa bae lana tha God, ma keka ade sulia.

²⁹ Ma si maṉa na malului wane eki keki ofu, nia kai sorea, Unii wane nei unii wane taa: kai rofe uri bala si do; sui sa keki fatai nia bala ta si do isana e ai, talitoona bala tha Jona ṉa porofeta.

³⁰ Sulia alafana na tha Jona kera alu nia ana bala, si do ifana wane ba ki i Ninifa, Kaluwane imole toto kai alafana lau boo ifana unii wane nei.

³¹ Kiṉa kini ba i mutana kai tatae afa boṉi ana kotu baita isana unii wane nei maṉa eri, ma kai sorea kera abula taa boo: uria nia too mai i susui lana fanua nei iano ka lae mai uria roṉo lana liotooa tha Solomona; ma rikia fasi, tee wane ne baita ka tatha atha Solomona ni kunei.

³² Wane ba i Ninifa ki toto keki takwe afa boṉi ana kotu baita isana unii wane nei maṉa eri, ma keki sorea kera abula taa boo: uria na kera akeletania boo manatada sulia ṉata lana tha Jona; ma rikia fasi, tee wane ne baita ka tatha atha Jona ni kunei.

³³ E ai ta wane, buriana ne faatharua laeta, si alua asi kula thaufuni, mado ifara ta kwadee do, kai alua i fuila, fasi toa na keki kotho mai keki rikia laa lana.

³⁴ Lalaa la ana seena imole na ṉa maana: mania si maṉa na maamu e laa, seemu sui boo e laa teefau lau boo; ma si maṉa ne taa, seemu lau boo e rorodoa teefau.

³⁵ Mania oki lio ada mado e ai lalaa la ne ni ani oe na ṉa maerodo.

³⁶ Mania mada sa seemu sui boo kai laa teefau, ta si kula si rorodoa, kai laa teefau bonaa ta si kula si ei, ’uria si maṉa na laeta kai laa isamu ana laa lana na ka faarora maana imole.

³⁷ Ma si maṉa nia kai ṉata, tee Farisi e aili nia fasi kai faṉa bi nia: ma nia kotho i biu, ka teoreri isana faṉa la.

³⁸ Ma si maṉa na Farisi eri e rikia, nia ka kwele uria ne ai si sisiu totonao, sui ka bii faṉa.

³⁹ Ma ṉa Lord ka soree isana, Si ade la ni kamulua Farisi ki muki ilia maṉa eri, muki faafalua seena titiu ma labeṉa; ma i la ruruumulua e fuṉu ana laulau la ma taa la.

⁴⁰ Kamulua toa mulu oewanea, Ta na sa nia ne thauwai nia seena imole e thauwai nia lau boo i lala imole, mado?

⁴¹ Ma sui muki tona fale asi do na mulu rikidaki; ma rikia fasi, si do ki sui bana e falu ifamulua.

⁴² Sui taa la kai thauṉi kamulua, Farisi ki! uria na muka falea taṉafula ana roketa ma konare ma kala lolo ni ania ni sui bana, ma muki ekwa ana kotu kokoto la ma liothau la uria tha God: si do eki sa muki ilia naa na ba, bia si do ba ki ka safua.

⁴³ Taa la kai thauṉi kamulua, Farisi ki! uria na mulu liothau ana si kula inoto ni ono la ki la biu ni ofu la ki, bia kwaiaratai lea la ki la usia ki.

⁴⁴ Taa la kai thauṉi kamulua, wane ni kekeda ki ma Farisi ki, toa muki olodola! sulia na mulu ’uria kwaiṉeia eki ne ai si to fatai, ma imole na keki liu i fafona kesi thaitoomana.

⁴⁵ Ma tee wane ni kwaifamanatai ana ṉa lo e luua, ka soree isana, Wane ni kwaifamanatai ae, o sorea si do eri oki ṉata ṉaṉasuala uri kamilia lau boo neri.

⁴⁶ Ma nia ka sorea, Taa la kai thauṉi kamulua lau boo, wane na muki kwaifamanatai ana ṉa lo! uria na muki alua si do na ṉali lana e taa ki fafia imole, ma ni kamulua i talaamulua musi suana ana ta fa kuku ana kukumulua.

⁴⁷ Taa la kai thauṉi kamulua! uria na muki tabalia si do ana thaitoomana lana porofeta i gwauna kwaiṉeia kera ki, ma maka kamulua ki kera thauṉida.

⁴⁸ E mamana muki tala faamamanea si do na mulu thaitoomana na muki ala fafia abula lana maka kamulua ki: uria na kera thauṉida boo, ma muki tabalia si do ana thaitoomana lana kwaiṉeia kera ki.

⁴⁹ Mania lau boo liotooa tha God e sorea, Nau kwai arasia porofeta ki isada bia aposela ki; ma tei wane iada keki thauṉida ma keki tona ilamatanida;

⁵⁰ Fasi abuna porofeta ki sui bana, ne igwa too mai ana boa lana fanua nei iano, toto keki duua ana unii wane nei;

⁵¹ Too mai ana abuna tha Ebela lalae mai ka fula ana abuna tha Sakaraiasi, ne mae i maalutana fulii era ni foa ma si kula ne abu: mamana ku soree isamulua, keki duua ana unii wane nei.

⁵² Taa la kai thauṉi kamulua, wane na muki kwaifamanatai ana ṉa lo! uria na mulu ṉalia naa ṉa ki ana thaitoomana lana si do ki: kamulua musi kotho iei, ma toa na sa keki kotho iei mulu suusida.

⁵³ Ma si maṉa nia sorea si do eki isada, wane ni kekeda ki bia Farisi ki manatade teo ani nia fafia, ma kera taeṉata uri nia fasi kai sorea si do oro ki;

⁵⁴ Kera maasi nia, ma keka thathamia sa keki bulasi garo ana ta si ṉata na kai asia faisia fokona, fasi keki alaṉi nia ania.