Luke 10 - Ṉa Alaofua Falu 1923 1949

¹ Iburiana si do eki ṉa Lord e alua ta fiu akwala lau, ma ka arasida, too ro wane, keka lae inaona maana uria toaa susu eki sui boo ma si kula eki sui boo, na nia toto kai lae uria.

² Mania nia ka soree isada, Unii do ne rafo e oro mamana boo, ma toa ni ra kera ununa: mania muki gani ana Lord ana unii do eri ne rafo, fasi nia kai arasia toa ni ra ki la unii do nia ne rafo.

³ Muki lae amulua: rikia fasi, nau ku arasi kamulua kau muka ’uria kaela sifi i maalutana koito kwasi ki.

⁴ Musi ṉalia ta wai ni alumalefo, ta wai ka ai, butu ki ka ai: ma musi aratai lea la ata wane sula tale.

⁵ Ma biu ifei na muki kotho iei, muki sorea inao, Enenoa ka to fafia biu nei.

⁶ Ma mada sa kaluwane ana enenoa e ni kula eri, enenoa kamulua kai to fafia: mada se ai bana, do kai oli mai isamulua.

⁷ Ma muki to i la tee biu eri, muki ania ma muki kuufia si do eki na keki falea: uria na wane ni ra eri e farana keki folia. Musi totoo na biu oro ki.

⁸ Ma toaa susu ifei na muki fula iei, ma keki thathagoni kamulua, muki ania si do eki na keki alua isamulua:

⁹ Ma muki faamarukia toa na kera matai kula eri, ma muki soree isada, Tooa tha God e fula naa karaṉi kamulua.

¹⁰ Ma toaa susu ifei na muki fula iei, ma kesi thathagoni kamulua, muki lae uria tala eki ana fanua eri ma muki sorea,

¹¹ Gegeona theegano eri mena ana toaa susu kamulua, ne raofia aaemilia, miki usua ana faamamane la suli kamulua: una ena muki thaitoomana lea si do eri, na tooa tha God e fula karaṉi kamulua.

¹² Nau ku soree isamulua, Si do taa na kai uria i Sodomo afa boṉi eri, kai faekwa asi do na kai uria toaa susu eri.

¹³ Taa la kai thauṉi oe, Korasina! taa la kai thauṉi oe, Betheseida! uria na ra baita ba ki na kera ilia ani kamaroa, so kera ilia i Taera ma i Saedona, do keki akeletania u naa manatada, keki tooni ana maku rarasieila ma keki ono i la foa.

¹⁴ Ma sui si do taa na kai uria i Taera ma i Saedona afa boṉi ana kotu baita, kai faekwa asi do na kai uri kamaroa.

¹⁵ Ma ni oe, Kapaneama, na kera kwau oe ia uri thalo, keki sifo fafi oe uri fanua toa mae ki.

¹⁶ Wane na kai roṉoa ṉata lamulua kai roṉoa ṉata laku; ma wane na kai lalakwatai kamulua kai lalakwatai nau; ma wane na kai lalakwatai nau kai lalakwatani nia ne arasi nau mai.

¹⁷ Ma fiu akwala eki keki oli ana seethathala la, keki una eri, Lord, spirit taa ki mena kera roo suli kamilia ana thatamu.

¹⁸ Ma nia ka soree isada, Nau ku rikia tha Satan e aru ka ’uria manu too mai thalo lo.

¹⁹ Rikia fasi, nau ku falea naa sukwaia ifamulua fasi muki uri fafia baekwa i tolo ki ma fafari ki, ma fafia sukwaia eri sui bana ana sukwaia maalimae eri: me ai dodoloa ta si do si labatai kamulua.

²⁰ Ma sui musi seethathala sulia si kula eri, na spirit taa ki kera roo suli kamulua; muki seethathala uria na kera keda thatamulua i thalo.

²¹ Asi kadee maṉa eri tha Jesus e seethathala atha Spirit, ma ka sorea, Nau ku sore lea iamu, Maka ae, Lord ana thalo lo ma fanua nei iano, uria no thaufunia si do eki faisia toa liode too ma toa manatade kali, mo fatai nia isana wela aabu ki: iu, Maka; sulia si do una eri o rikia ka lea.

²² Si do ki sui bana Maka nau e falea naa ifaku: me ai ta wane si thaitoomana ṉa Kaluwane, talitoona ṉa Maka e thaitoomana; me ai ta wane si thaitoomana ṉa Maka, talitoona ṉa Kaluwane e thaitoomana, bia ni tei bana na ṉa Kaluwane e thathamia kai fatai nia isana.

²³ Ma nia akele uria toa ne toleda, ka soree isada tee kera, Lea ana maada, toa na kera rikia si do na muka rikidaki:

²⁴ Uria nau ku soree isamulua, porofeta oro ki ma kiṉa oro ki kera thathamii rikia si do na muka rikidaki, ma kesi rikia; ma kera thathamii roṉoa si do na muka roṉodaki, ma kesi roṉoa.

²⁵ Ma rikia fasi, tee nonii wane ni kwaifamanatai ana ṉa lo e tatae ia kai ilitoona, ka una eri, Wane ni kwaifamanatai ae, si ta na kwai ilia fasi kwai fulatoona marukia tatha?

²⁶ Nia ka soree isana, Si ta na kera keda i la lo? ta noki teemai nia?

²⁷ Ma nia luua, ka sorea, Oki liothau atha Lord na God oe ana ruruumu teefau, ma maṉomu teefau; ma sukwaia oe teefau, ma manatamu teefau; ma oki liothau ana wane oe ’uria oki liothau ani oe i talaamu.

²⁸ Ma nia ka soree isana, O luua ka too: oki ilia si do eki, ma oko maruki.

²⁹ Ma nia thathamii sorea nia kokoto, ma ka soree isatha Jesus, Ma wane nau eri ni tei?

³⁰ Ma tha Jesus e luua, ka sorea, Tee nonii wane e toto i Jerusalema kai sifo uri Jeriko; ma nia tatha i la teoa toa na keki laulau, kera tanusia tooni nia, keka kwae mala ania, ma keka lae nada, keka akwasi nia karaṉia kai mae naa.

³¹ Ma si maṉa eri tee wane ni foa kai sifo ana tala eri: ma si maṉa ne riki nia, nia ka tatha nana ata balii tala.

³² Ma una eri tee wane ana kwalafa tha Lifae e lae mai, ka lio, ma ka tatha nana ata balii tala.

³³ Ma tee nonii wane i Sameria, si maṉa nia kai lae, ka fula asi kula ne ni iei: ma si maṉa ne rikia, nia ka tatakomi nia,

³⁴ Ma ka fula isana, ka binua mala nia ki, ka kikia ana gwai ma waene; ma ka alu nia i suila ase nia ni u boo, ma ka tole nia uria tee biu toa kwaita ki, ma ka rei nia.

³⁵ Ma fa boṉi eri e dani, si maṉa nia kai lae nana, nia ka tatha ro peni, ka falea ifana wane ana biu, ma ka soree isana, Oki rei nia; ma ta si ta noki arua lau, lalae ku fula lau, kwai duua ifamu.

³⁶ Nifana wane ana ulu wane eki, na manatamu e sorea e abula ’uria sa wane nia neri ne fulatoona toa na keki laulau?

³⁷ Ma nia ka sorea, Wane eri ne tatakomi nia. Mania tha Jesus ka soree isana, Lae, oko ade una eri.

³⁸ Ma lalae mai, si maṉa na keki lae nadalua, nia ka fula i la tee toaa faekwa: ma tee ai thatana ni Matha ka thathagoni nia i maafera nia.

³⁹ Ma nia ana ta doora kera alaṉia ani Meri, ne ono lau boo isana aaena tha Jesus, ma ka roṉoa bae lana.

⁴⁰ Ma ni Matha e manata fufuli sulia ra la oro ana fale la; ma nia fula isana, ka sorea, Lord, e ai si oga oe boo na dooraku e akwasi nau kwai ra ana fale la tee nau? mania oki faaroṉo nia kai adomi nau.

⁴¹ Ma tha Jesus e luua, ka soree isana, Matha, Matha, o laloma fufuli ma oko isi fufuli sulia do oro ki:

⁴² Muki rofe lau molo uria tee si do: ma ni Meri e filia si do lea na kera toliṉia, na kesi ṉalia faisi nia.