Luke 1 - Ṉa Alaofua Falu 1923 1949

¹ Uria na toa oro kera ili uria alu ofu la asi do ba ki na kera ilia ka mamana naa i maalutamilia,

² Ka ’uria fale la na toa eki kera falea ifamilia, toa kera tala rikia ana maada, ma keka ra asi baea eri too mai i thafali lana si do eki,

³ E lea ana manataku lau boo, uria nau ku mamanata sulia si do eki sui boo ka too ita mai i thafali lana, kwai kekeda kau isamu sulia lae lana, Thiofilasi, wane no inoto ka tatha;

⁴ Fasi oko thaitoomana mamana lana si do na kera toodaki isamu.

⁵ Asi maṉa na tha Heroda kai to bana, kiṉa ana fanua i Judia, tee wane ni foa, thatana tha Sakaraiasi, wane ana talee wane ni foa tha Abia ki: ma nia ana ta kwai ana baree thari tha Erona, ma thatana ni Elisabetha.

⁶ Ma keroa sui boo keko kokoto inaofatha God, keko abula sulia si ṉata fifi ma si ṉata too ṉado tha Lord ki, keko dodoloa.

⁷ Me ai adaroa ta wela, uria ni Elisabetha e abaato, ma kero arai naa.

⁸ Ma lalae mai, si maṉa na nia kai abarua ana ra wane ni foa inaofatha God i fuliṉana fa boṉi nia,

⁹ Sulaania biraṉana ra wane ni foa, si kula ana ilala lana na kotho la i la biu baita tha Lord ana naare lana do thasune makwa lea.

¹⁰ Ma malului wane eki sui boo keki foa bada i maa asi maṉa ana naare lana do thasune makwa lea.

¹¹ Ma angel tha Lord ka fula fatai isana, kai takwe ibali aola ana fulii era ni naare lana do thasune makwa lea.

¹² Ma si maṉa na tha Sakaraiasi e riki nia, ka taa iana, ma mau la ka durufi nia.

¹³ Ma angel eri ka soree isana, Osi mamau, Sakaraiasi: uria na kera roṉoa naa foa la oe, ma kwaimu ni Elisabetha kai tharea amu ta kaluwane, ma kio alaṉia atha Jone.

¹⁴ Ma toto oki fulatoona seethathala la ma ele la; ma toa oro toto keki seethathala sulia futa lana.

¹⁵ Uria na tha Lord kai riki nia e baita, ma nia toto si kuufia waene ma kafo bubula; ma keki faafuṉu nia atha Spirit Abu, i rakena thainana u bomai.

¹⁶ Ma toa oro ana kwalafa tha Isirela nia kai oli fafia isatha Lord na God kera.

¹⁷ Ma nia kai lae inaona ana spirit ma sukwaia tha Elaeja, fasi kai oli fafia ruruuna wane kera welaa ki isana kala wela ki, ma toa na kera ade faisia si do ki fasi keki abula ana liotooa imole na kera kokoto; kai beta ta toa na keki thathai maakwalia tha Lord.

¹⁸ Ma tha Sakaraiasi ka soree isana angel eri, Kwai thaitoomana ufita asi do eri? uria na ku arai naa, ma ai nau ka kukue naa.

¹⁹ Ma angel eri e luua, ka soree isana, Ni nau tha Gebiriela, na kwai takwe inaofatha God; ma kera arasi nau mai fasi kwa ṉata isamu, bia kwa ṉalia mai si faaroṉoa lea eki isamu.

²⁰ Ma rikia fasi, ni oe oko bona ma oko dora ana ṉata la, lalae ka fula afa boṉi na do eki kai mamana, uria nosi faamamanea bae laku, na toto kai mamana asi maṉa na kera alua uria.

²¹ Ma toa eki kera mamaasia tha Sakaraiasi, ma keka kwele uria nia to ka tau i la biu baita eri.

²² Ma lalae e kotho i maa, nia ka dora ana ṉata la bida: ma keka thaitoomana lea na nia e rikia si na kera fatai lalaa ania i la biu baita tha God: uria nia fafafuilala urida, ma fokona ka ato bonaa.

²³ Ma lalae mai, ka fula naa ana fuliṉana fa boṉi na ra nia kai sui naa, nia ka lae nana uri maafera nia.

²⁴ Ma iburiana fa boṉi eki kwaina na ni Elisabetha ka to ana wela; ma ka thaufuni sulia lima madami, ka una eri,

²⁵ Tha Lord e ade una eri iaku afa boṉi eki ne lio fafi nau, fasi ka ṉalia si do ne faaseenoni iaku faisia i maalutana imole.

²⁶ Me fula ana ona madami, angel eri tha Gebiriela tha God e arasia uria ta toaa susu i Galili, thatana Nasaretha,

²⁷ Isane tee thari ne ado bia tee wane thatana tha Josefa, wane ana kwalafa tha Defeta; ma thari eri thatana ni Meri.

²⁸ Ma angel eri e kotho isana, ma ka sorea, Oki seethathala, ai na kera ala fafi oe ana lea la, tha Lord e ni isamu: kai lea iamu i maalutana kini ki.

²⁹ Ma si maṉa na thari eri ka rikia, nia ka mau faamau asi ṉata eri, ma ka manata uria maalutana kwaiaratai la eri.

³⁰ Ma angel eri ka soree isana, Osi mamau, Meri: uria na tha God e ala fafi oe.

³¹ Ma rikia fasi, toto oki to ana wela, ma oki tharea ta kaluwane, ma oko alaṉia atha Jesus.

³² Nia kai baita, ma keki alaṉia ana Kaluwane Nia ne Inoto ka tatha: ma tha Lord God kai falea do ni ono la ana inotoa maka nia tha Defeta ifana:

³³ Ma nia kai inoto ana kwalafa tha Jekofo toto si sui; ma tooa nia toto si funu.

³⁴ Ma ni Meri ka soree isana angel eri, Si do eri kai mamana ufita, na nau kwasi toowane bakua?

³⁵ Ma angel eri e luua, ka soree isana, Tha Spirit Abu kai fula fafi oe, ma sukwaia Nia ne Inoto ka tatha kai nunufi oe: mania lau boo si do abu na kai futa ani oe keki alaṉia ana Kaluwane tha God.

³⁶ Ma rikia fasi, ina lamu na ni Elisabetha ka to lau boo ana kaluwane i kukue lana: ma madami nei ona naa madami nia neri, ai na kera alaṉia ana abaato.

³⁷ Uria na tha God e ai ta si do si afetai iana.

³⁸ Ma ni Meri ka sorea, Rikia fasi, ai ni ra tha Lord; keki ilia boo iaku sulaania bae lamu. Ma angel eri ka lae nana faisi nia.

³⁹ Ma ni Meri e tatae afa boṉi eki, ka lae fofoa uria fanua na gwa tolo ki ni iei, uria ta toaa susu i Juda;

⁴⁰ Ma ka kotho i maafera tha Sakaraiasi, ka aratai nia ni Elisabetha.

⁴¹ Ma lalae mai, si maṉa ni Elisabetha e roṉoa aratai la ni Meri, wela ka thaka alaa i la rakena; ma ni Elisabetha kera faafuṉua atha Spirit Abu;

⁴² Ma nia ka ai asi ai la baita, ma ka sorea, Lea iamu i maalutana kini ki, me lea iana do na kai thauwai i la rakemu.

⁴³ Ma nifana ade lana si do nei ka fulatooku, na thainana Lord nau ka fula isaku?

⁴⁴ Uria rikia fasi, si maṉa na liṉana aratai la oe e fula i aliṉaku, wela ka thaka alaa i rakeku uria nia seethathala.

⁴⁵ Ma lea iana ai ne fitoo; uria na toto do eki kai mamana na kera soree isana too mai atha Lord.

⁴⁶ Ma ni Meri ka sorea, Maṉoku kai faabaita tha Lord,

⁴⁷ Ma spirit nau e seethathala atha God ne faamaruki nau.

⁴⁸ Uria nia e lio uria thafee to faekwa lana ai ni ra nia: Uria rikia fasi, too asi maṉa eri ka liu alaa unii wane ni sui bana keki alaṉi nau ana ai ne lea iaku.

⁴⁹ Uria nia ne sukwai e ilia si do baita ki ifaku; Ma thatane abu.

⁵⁰ Ma tatakomia nia kai to bana fafia toa na kera mau ani nia Too ata unii wane lae ka fula ata unii wane.

⁵¹ Nia e fatai nia sukwaia ana abana; Nia e foatata ana toa na kera fafakao kera asi lio ana ruruuda.

⁵² Nia e sifolaṉai nia toa sukwai ki faisia do ni ono la ana inotoa kera ki, Me faainotoa toa na kera thafee to faekwa.

⁵³ Toa na kera thaofa nia e faaabusuda ana do lea ki; Ma toa na kera rikii do nia ka arasida keka tona oli bada.

⁵⁴ Nia adomia wane ni ra nia na tha Isirela, Fasi nia kai onotoona tatakomia nia;

⁵⁵ ’Uria lau boo na nia e ṉata isana maka kulu nai nao ki, Isatha Aberahamo ma kwalafa nia toto si sui.

⁵⁶ Ma ni Meri e to isana sulia fuliṉana ta ulu madami, sui ka oli uri maafera nia.

⁵⁷ Ma si maṉa ni Elisabetha e fula naa fasi nia kai thare; ma nia ka tharea tee kaluwane.

⁵⁸ Ma toa nia ki ma ina lana kera keka roṉoa na tha Lord e faabaita tatakomia nia tale nia; ma keka seethathala bi nia.

⁵⁹ Ma lalae mai e fula ana kwaula fa boṉi, keka fula uria kwaikakali la ana wela eri; ma kera thathamia sa keka alaṉia atha Sakaraiasi, sulia thatana maka nia.

⁶⁰ Ma thainana e luuda, ka sorea, E ai; keka alaṉia atha Jone.

⁶¹ Ma keka soree isana, E ai ta wane ana ina lamu kera na kera alaṉia ana thata eri.

⁶² Ma kera fafuilala uria maka nia, uria thata na nia thathamia keka alaṉia ania.

⁶³ Ma nia ka gania ta rebee do ni kekeda la, me kekeda, ka una eri, Thatana na tha Jone. Ma toa eki sui boo keka kwele.

⁶⁴ Ma fokona ka laa si maṉa eri u boo, ma meana ka alube, ma nia ka ṉata, ka taṉoa tha God.

⁶⁵ Ma mau la ka fula fafia toa eki sui boo na kera to kakalida mai: ma si ṉata eki sui boo keka ṉata bada sulia i la fanua eri sui bana na gwa tolo ki ni iei i Judia.

⁶⁶ Ma toa eki sui boo na kera roṉoa kera alua i ruruuda, keka una eri, Ma wela nei toto kai ufita nania? Ma abana tha Lord e ni bi nia.

⁶⁷ Ma maka nia tha Sakaraiasi keka faafuṉua atha Spirit Abu, ma nia ka ṉata mala porofeta, ka una eri,

⁶⁸ Taṉoa tha Lord God Isirela; Uria nia e thai sulia toa nia me tae faisida,

⁶⁹ Ma ka falea susukee do ana marukia ifakulua Ana kwalafa wane ni ra nia tha Defeta;

⁷⁰ ’Uria lau boo na nia e ṉata ana fokona porofeta abu nia ki na kera to ita mai asi maṉa na kera boa fanua nei iano;

⁷¹ Fasi keki faamaruki kulu faisia maalimae kulu ki, ma faisia abana toa eki sui na kera riki kulu ka taa;

⁷² Fasi ka faamamanea tatakomia talea maka kulu nai nao ki, Ma kai onotoona alaofua abu nia;

⁷³ Othi la ne othia isana maka kulu na tha Aberahamo,

⁷⁴ Kai ilia si kula eri ifakulua na kera lau kulu naa faisia abana maalimae kulu ki Sa kuki ra naa ifana, kusi mau,

⁷⁵ Ana abu la ma kokoto la inaofana sulia fa boṉi na kuki to ki.

⁷⁶ Iu ma ni oe, wela nei, toto keke alaṉi oe ana porofeta ni Nia ne Inoto ka tatha: Uria na toto oki lae inaona maana tha Lord uria beta lana tala nia ki ka kwaimaakwali;

⁷⁷ Fasi ka falea thaitoomana lana marukia ifana toa nia ki Ana doanita la ana abula taa la kera ki,

⁷⁸ Sulia tatakomia i ruruuna God kulu, Na thato ne raraṉia fanue too mai ia e thai suli kulu sulia,

⁷⁹ Fasi ka laafia toa na keka ono i la maerodo ma nuna maea; Kai alua aaekulua kai lae sulia tala ana enenoa.

⁸⁰ Ma wela eri ka baita alaa, ma spirit nia ka sukwai alaa, ma nia ka to i la fanua kwasi lalae ka fula afa boṉi na kera fatai nia isana Isirela.