Kolose 4 - Ṉa Alaofua Falu 1923 1949

¹ Wane inoto ki, muki falea si do ne kokoto me oolo ifana toa ni ra kamulua ki; uria na mulu thaitoomana Wane Inoto kamulua lau boo ni mai thalo.

² Muki seemabe ṉado ana foa la, ma muki lio uria asi sore lea la;

³ Ma muki foa uri kamilia lau boo, fasi tha God kai ifinia maa ifamilia ifana si baea eri, miki ṉata sulia si do tha Christ ne toto thaufuni, si do na kera kani nau lau boo fafia;

⁴ Fasi kwai fatai nia si do eri, asi ṉata ne kokoto ifaku.

⁵ Muki abula ana liotooa uria toa nai thara ki, ma muki duu i maana si maṉa totonao.

⁶ Lea la kai to fatai ṉado ana ṉata lamulua, kera faaamalila asi solita, fasi muki thaitoomana luu lana ṉata lana toa eki sui, ta wane iada si ei boo.

⁷ Si do ki sui bana ana to laku tha Tikikasi kai faaroṉo kamulua ania, na doora liliothaua kulu ma wane ni ra mamana ne wane ni ra la ofu bi kamilia ana ṉa Lord:

⁸ Wane na nau ku arasia kau isamulua uria si kula eri, fasi nia kai thaitoomana to lamulua, ma fasi kai faainamarukia ruruumulua;

⁹ Bia doora mamana liliothaua kulu tha Onesimasi, na wane ani kamulua. Keroa kekoi faaroṉo kamulua asi do ki sui bana na kera ilia kunei.

¹⁰ Tha Aritakasi wane na kera kania ofu bi nau e thathamia kwai ṉata isamulua ’uria sa ni nia kai ṉata, ma tha Makasi, kokoo tha Banabasi (wane na kera ṉata fifi isamulua suli nia; mada sa nia kai lae isamulua, muki thathagonia mai),

¹¹ Ma tha Jesus, na kera alaṉia atha Jasitasi, toa ana kwai kakali la neri: talifili kera na kera toa ni ra ofu la bi nau ifana tooa tha God, wane na kera faainamaruki nau.

¹² Epafarasi, wane ani kamulua, na wane ni ra tha Christ, e thathamia kwai ṉata isamulua ’uria sa ni nia kai ṉata, me aṉasi ṉado uri kamulua ana foa la nia ki, fasi muki takwe ṉado, muki sukwai teefau asi do ki sui bana na tha God e thathamia.

¹³ Sulaania nau ku faamamanea si do ku thaitoomana suli nia, na nia e ulafu faamau uri kamulua, ma uria toa nai Laodisia, ma toa nai Hirapolisi.

¹⁴ Tha Luke, doketa liliothaua eri, ma tha Dimasi kero thathamia kwai ṉata isamulua ’uria sa ni keroa kekoi ṉata.

¹⁵ Muki ṉata isana baree wai doorana eki nai Laodisia, ma tha Nimafasi, ma figua eri nai biu nia ’uria sa ni nau ku ṉata.

¹⁶ Ma buriana na kera teemai nia leta nai i maalutamulua ka sui naa, muki adea na keki teemai nia i la figua toa nai Laodisia lau boo; ma ni kamulua muki teemai nia lau boo leta na toa nai Laodisia keki falea.

¹⁷ Ma muki soree isatha Akipasi, Oki seemabe asi ra eri na kera falea ifamu ana ṉa Lord, fasi oki ilia.

¹⁸ Nata laku tha Polo ana abaku i talaaku nai nia. Muki onotoona kani la na kera kani nau ania. Lea la kai to bi kamulua. Emeni.